الاثنين، 21 ديسمبر 2009

وعزة نفسي منعااااااني




حيرت قلبي معاك وانا بداري واخبي..

قولي اعمل اية وياك ولا اعمل اية ويا قلبي..

بدي اشكيلك من ناااااااااااار حبي، بدي احكيلك عاللي في قلبي..

واقولك عاللي سهرني ، واقولك عاللي بكاني..


وعزة نفسي منعاااااااااااااااني :(

الثلاثاء، 15 ديسمبر 2009

بتلف الدنيا بينا

بتلف الدنيا بينا وساعات بتجرحنا

ايام بتفوت علينا وتخدنا من روحنا

ساعات بنتعلم وساعات بنستسلم

بس الاكيد مع كل جرح لازم بنتعلم

احنا اتخلقنا فى الحياة علشان نعيشها

مهما تكون فينا الجراح لازم نحوشها

الليل ساعات بيكون غميق، بس النجوم مليا الطريق

مش كل سكة هنمشى فيها الشوك هيفرشها


امممممممممممممم

الحمد لله
م

الأحد، 6 ديسمبر 2009

عيد حسباتك


عيد حسباتك شوف في حياتك

جي منين علي فييييييييييييين.؟

دلوقتي محتاجة اعيد حسباتي في كل حاجة بحياتي...

بس قلقانة اتنازل عن حاجات بحبها، قصاد حاجات تانية اهم في حياتي...



ربنا يستر واقدر اصلا اعملها..
واعيد حسباتي

لأني شايفة اني وصلت لمفترق الطريق من غير ما اخد بالي.. اللي برضة مش عارف هختار اي طريق فيهم...

الأربعاء، 2 ديسمبر 2009

احتفالي بعيد ميلادي علي مدونتي للسنة التانية

حفلة عيد ميلادي


زي النهارده من سبعة وعشرين سنه انا جيت للدنيا، شوفت نورها وحبـيته من اول ثانيه، معرفتش ايه هى عيوبها، شوفت بس مميزاتها، ومش بإيدى اختار انا دنيا تانيه...
النهارده من سبعة وعشرين سنه انا جيت للدنيا، جيت بحب وشوق مالينى، عشت بيه انا طول سنينى، دا غصب عنى ومش بإيدىأسعد بيه اللى حواليه..
النهارده من سبعة وعشرين سنه انا جيت للدنيا، لفت بيه سنين وايام عشت الحب وشفت احلام ، شوفت الدنيا بلونها الوردى كنت بنام ودموعى على خدى، لكن فى الاخر كملت وقدرت أخلى الشوك حنيه ، النهارده من سبعة وعشرين سنه انا جيت للدنيا...

ملحوظة: (الكلمات دي حقوقها محفوظة لمدونة رومنسي/ أحمد دسوقي).
وشكرا لية جداا علي انو وافق اني اقتبسها، لانها بصراحة عجبتني..

*********************************



(شيماء راضي)
قبل سنتين من دلوقتي يعني وانا عندي 25 سنة، كنت مجرد انسانة عادية عايشة وبحاول مع نفسي، علشان اطور نفسي، بس قبل كده مكنش في دماغي ولا يوصل لتفكيري، اني اوصل للي وصلتلة الحمد لله دلوقتي ده...

مجرد فكرة مكنتش اتخيل انها تنجح وتصولني لكل ده، مجرد بذرة رميت بذورها ( خير) في الارض (الفيس بوك) ورويتها بأهتامي واخلاصي، ونيتي الخير، اللي كانت اصلها اني افيد واساعد الناس لوجة الله، في انهم يطورو انفسهم..

وسبحان الله عاد علية بأحلي زرع خيييييييييييير.. بجد الجروب بتاعي بعتز بي قووووووووووي من الأنجازات اللي عملتها ومكنتش اتخيل انها تبقا من اهم الانجازات،وافضلها علي الاطلاق، وكمان فتحتلي باب واسع قوي من الخير...

وحقيقي كلة بفضل ربنا، وبفضل ان نيتي كانت من البداية خير اني افيد الناس واستفيد معاهم...

طبعا مش هقدر احصر كمية الأنجازات اللي حصلت خلال السنة دي من عمري، بسبب الجروب اللي بقالة سنتين وشوية...

لكن كل اللي اقدر اعملة في يوم زي ده.. اني اوجة رسالة لكل الناس اللي عرفتها، سواء علي جروبي، او في مدونتي، او من حسابي عالفيس بوك، او من جروب اصحاب اون لاين عالفيس بوك ( اجدع صحاب)..

او من كل شخص جالي وطلب مساعدة، وووثق فية، وبجد بحترم كل حد احترمني، وخصوصا اللي طلبو مني مساعدات، لأنهم قدروني، ويمكن اكتر ما بحلم كمان، وبجد لأني لما ساعدتهم ربنا ساعدني علي مساعدتهم وبفتخر وانا بقول بجد كده قوي لأني عايزة اوصل لكل الناس ان ساعدو بعض حقيقي لأننا محتاجين لبعض، وربنا بيساعدنا بمساعدتنا لبعض، في اشد الظروف...دي دعوة مني ليكم في عيد ميلادي، حقيقي محروم اللي ميقدمش خير وهو مش منتظرمقابل، لأن ربنا كرمة كبير قوووووووووووووي....

وشكرا خاص لمنتدي يوم جديد ولكل شخص وثق فية وادالي مساحة في المنتدي وخصوصا مستر سعيد عزت ، في منتدي يوم جديد وانه سمحلي بقسم برمج عقلك، حقيقي بشكركم جدااااااااااا

ولكل اصحابي اللي عرفتهم في المنتدي،ولكل اعضاء المنتدي، لأنهم ساهمو في نجاح القسم بتعليقاتهم وتشجيعهم ..

ولكل شخص استفدت منة بكلمة بحرف، وافادني في مستقبلي، وساعدني اطور نفسي سواء بقصد او بغير قصد منة، بجد شكرا لكل الناس حتي اللي قريتلة كتاب واستفدت منة...

ودي رسالة خاصة جداا مني لكل الناس الموجوده علي جروبي عالفيس بوك ( لكل من يعتقد انه فاشل)

سواء يعرفوني او لأ

بجد بحبكم في الله، واي حد يحتاج اي مساعدة تحت امركم ، لأني نجحت وحققت نجاحات كتير بيكم وبفضل اعجابكم بالجروب، سواء تعرفوني او لأ، فأنا تحت امركم :)

امضاء: شيماء راضي

وشكر خاص للي عملولي الصورتين ( محمد عبد النبي، واحمد ناجي ) تسلم ايدكم :)

الاثنين، 30 نوفمبر 2009

يوم في حياتي (الازهر بارك) تم التحديث

الـحــــمــــــــــــد لله بسم الله الرحمن الرحيم..

من المرات القليلة اللي ممكن افكر اخرج فيها في العيد، يمكن المرة الوحيدة اللي حصلت كانت السنة اللي فاتت، وكانت اخر الخروجة حصل، حاجات تضايقتني في الشارع، فقررت استقر في البيت في العيد بدل ما حد يضايقني، وكفي المؤمنين شر القتال :)
بس الغريب بقا ان سبحان الله كنت مقررة ان الـ 4 ايام بتوع العيد استريح فيهم لأني كنت مرهقة قوي قبل العيد وعارفة ان هرجع للشقا تاني بعد العيد...فقولت استغلها نووووووووووووووم، وفعلا قد كان اول يوم وتاني يوم نمت لما شبعت نووووووم...

وكنت مقررة اليومين اللي باقين اخلص بقا كل حاجة كنت مأجلاها لحد الاجازة علشان اخلصها ( سواء عالنت او المذاكرة) ..

المهم مرة واحده جاتلي رسالة عالفيس بوك من جروب احد المدربين اللي اعرفهم (محمد زكريا) بيقول ان في دعوة عاملاها بنوتة اسمها ( رشا خليفة) دعوة نتقابل 3 يوم العيد في الازهر بارك.....

فكرت الحقيقية كتير هل اروح ولا ملوش لازمة ....؟؟؟

حسبتها اكتر من مرة، مع اني مش بحتار قوي كده ،علشان اخد قرار بسيط زي ده، بس مش عارفة السبب في الحيرة، لكن قولت هشوف لأخر اليوم لو حسيت اني مرتاحة هروح مش كده مش رايحة...

بس قررت اروح بعد ما رتبت كل حاجة فعلا واتفقت مع كل الناس اللي هاقبلهم،،،

المهم اني قررت زي ما اتفقت انا واحدة صحبتي اني لو صحيت الصبح قادرة اروح هروح، غير كده مش مشكلة..

المهم نمت الساعة 3 الفجر...وصحيت قبل المعاد اللي ظابطة الموبيل علية كمان بحاولي ربع ساعة...

قومت ظبط اموري... ونزلت
اتصلت بالفون برشا خليفة وقلتها انا هنزل اقابلك هناك، قالتلي اوك انزلي محطة كذا هقابلك اخدك في طريقي بالعربية..
حصل وقابلتها بعد ما تهت طبعا بسبب انها كانت وصفالي مش صح...
بس اتقابلنا، وبمجرد ما قابلتها عرفتها سلمت علية ركبنا العربية، قابلت في العربية المدرب (نهاد رجب ) بس ورحنا الازهر بارك علي طول :)
كل ده وانا مش متخيلة ان اليوم ممكن يكون حلو قولت كبيري ساعة او اتنين وهقلبهم وامشي :(
بس سبحان الله انا نيتي اني اروح علشان اشوف الناس اللي اعرفهم في مجال التنمية البشرية، مجرد بس اسلم عليهم و بس...
رحت لاقيت كمية شباب وبنات مشاء الله، يمكن انا اكترم ن رشا نفسها مكنتش متخيلة الكم ده كلة...
وطبعا كل اللي عرفتهم واعرفهم قابلتهم هناك وقعدنا نتكلم عن نفسنا شويا كل واحد، وبعدين اتكلمنا علي نشاط كل واحد فينا...
وبعدها بداءنا نتحاور في حاجات كتير منها مشكلة البحث عن وظيفة للشباب ( دي حملة رشا خليقة) اللي هي ازاي تعلم الناس تبحث عن وظيفة ...


بجد انااكتر حاجة فرحتني في اليوم ده بخلاف اني شوفت كل الناس اللي اعرفهم لأني بقالي كتير مش شفهتم...اللي اسعدني قوي ان القاعدة كان فيها ناس كتير مشاء الله زي ما انتم شايفين في الصورة دا غير اللي استأذنو بدري ..
وكمان بيتكلمو في حاجات مهمة والقاعدة كانت كلها مفيد جدااااااااااااااا وحسيت قد اية ان لسة في شباب ناضج واعي، عندة حاجة بس محتاج حد يزقة، يشجعة، مش يديلة فرصة، لأن هو اللي هيخلق الفرصة بنفسة بمجرد بس ما نسيبة يحاول، بس حقيقي اعجبت بالشباب قوي اللي كانت بتتكلم، كلنا كان عندنا هدف ورسالة، كلة بيتكلم في شئ مفيد، كلنا اجتمعنا علي حاجة مفيدة...

مع العلم ان الازهر بارك بجد كانت لا تطاق في العيد، زحمة موت اطفال غريبة، وكل الناس كانت بتتفرج علينا اصلا، احنا الناس الوحيدة اللي عاملين دائرة كبيييييييييييييييييير مشاء الله كان العدد كبير، وقاعدين مستمعين جيدين للي بيتكلم عن نشاطة او بيتحاور، والناس مستغربة لأن اللي حوالينا كلهم بيلعبو او بيهزرو واحنا كنا بنضحك اه ومستمتعين لكن مركزين علشان نسمع اللي بيتكلم، وناس من الجروب بتاعنا بتصورنا ، فكل الي يعدي علينا يتسغربنا...!!!
وبرغم كل ده احنا كنا فاصلين نفسنا عن الدوشة، ومركزين في الكلام المفيد قوي ...
بس الحاجة الوحيدة اللي تعبتنا، ومش انا بس دا الكل هي القاعدة عالارض، ضهري اتقطم :)
ومع ذالك بجد انا كنت مستمتعة زي ما متأكدة ان الكل استمتع واستفاد زي علي الأقل اتعرفت علي ناس جديدة، بجانب الناس الجميلة اللي اعرفها من قبل..

خلصنا وكلنا مشينا ولحد كده اليوم في الازهر بارك انتهي، لكن المشكلة كانت برة علي البوابة، فضلنا نتكلم ونرغي ( محمد زكريا رشا خليفة، سامح طارق، وناس تانية كتير) فأقترحت رشا اننا نروح نقعد في كافية البورصة في وسط البلد نكمل كلامنا اللي شكلة مش هيخلص، اصلاة بجد كان مفيد قوي...

فعلا كملنا كلامنا هناك، وفي القاعدة دي بقا اليوم كمل حقيقي، قابلت ناس تانية اعرفهم برضة جت واحنا قاعدين ..
ومعاهم ناس معرفهاش

بس حقيقي استمتعت قوووووووووووووي بالنقاش اللي دار بينا في الكافية، سواء قبل ما رشا تمشي، او بعد ما مشيت ولما احمد محمود وصل ومعا نيلي وبنوتة كمان كانو لذاذ خالص
وكان في شباب تانية بجد عجبني تفكرهم قوي، برغم ان سنهم مش كبير قوي، بس اتبسط ان في لسة شباب تفكيرها حلو كده....

وبجد استمتعت قووووووووووووووي باليوم ، وفي حاجات غريبة حست ان في ناس لما اتكلمت معاها كأني اول مرة اعرفها برغم اني اعرفها من زمان...
وناس تانية عرفتهم مكنتش اعرفهم
وفي ناس تانية كنت اعرفهم قوي بس اكتشفت اني مش هما دول اللي عرفتهم قبل كده...
بس حقيقي انا استفدت واستمتعت، باليوم ده..

وبشكر رشا خليفة عالدعوة اللطيفة دي...
وكل حد خلا اليوم جميل كده
بس كده طبعا بخلاف اي حاجة اخر اليوم كالعاداة مش ظريف، لأني اتأخرت فبابا قام بالواجب هاهااها

بس برضة استمتعت واستفدت كتير...

الجمعة، 27 نوفمبر 2009

ذكريات دافية...

بمناسبة الجو الجميل ده اللي بعشقة ( جو المطروالشتا والدفء) افتكرت مرحلة بحياتي كانت..
و علي قد ما كانت مش حلوة، علي قد ما كانت دافية وكلها مشاعر وحب نادر الوجود...
كان أجمل مرحلة فيها لما كانت في الشتا..

ذكريااااااااااااااات كانت كده
مع بعض بمج واحد ( وانا اسعد)

دي كانت اجمل ذكرياتي اللي هتفضل طول العمر مجرد بس ذكريات جميلة مرت بحياتي ....



لكن دلوقتي بقت كده ( بالمج لوحدي)
وانا سعيدة :)
كانت ايام وعدت كانت ايام وراااااااااااااااااحت....

بس زي ما قولت قبل كده مابيفضلش منها غير مجرد ذكريات ومشاعر جميلة، مع ان الحالة خلصت من سنين لكن ليها في حياتي ذكريااااااااااااا ت...

مش عارفة الحقيقة اية اللي فكرني بالحالة دي، يمكن مش بس الجو الجميل ده، انما ممكن لأني في حالة حالمة شوية زيادة ...

يمكن...!!!

الاثنين، 16 نوفمبر 2009

عيد ميلاد مدونتي أنا :)

عدت سنة
والليلة هطفي شمعة ، عيد ميلاد مدونتي انا :)

حـــيــــاتـــــــي

طبعا انا مش كنت متخيلة اصلا ان فات سنة علي اول بوست نزل في المدونة هنا..

الوقت فات بسرعة، ويمكن من كتر ما استمتعت بالكتابة هنا محستش بالوقت :)

الحمد لله


بجد بحلم تفضل طول العمر، وحتي بعد ما يروح العمر،ياعالم بكرة في اية.

71 بوست لحد انهاردة من سنة 11/ 2008 حتي 11/ 2009

:)
ده اول بوست نزلتة كان بعنوان المدونة

16 نوفمبر, 2008
حــيــاتــي ..

http://shemolife-shemo.blogspot.com/2008/11/fdgfgf.html

الأحد، 15 نوفمبر 2009

يوم فرح بلدي :)


فكرت كتير قبل ما أكتب التدوينة دي، هكتبها لية ولميييييييييييين.؟؟؟
بس رجعت افتكرت ، هكتبها لأحفادي، لكل اولادي بعد 20 سنة هيرجعولها ويعرفو اية حصل في يوم زي ده، وهيفتخرو، ويتحفزو يكرروها من تاني بأذن الله...

بختصار انا مليش في الكورة ولا بحبها اصلا،لأني بعشق التنس، بس المرة الوحيدة اللي افترجت فيها علي ماتش كورة قدم كان مش فاكرة سنة كام، لكن كان وقت ماتش بين الاهلي والزمالك اللي كسبنا في 6/1 ، ودي كانت اول مرة اتابع ماتش، وتابعتة بس علشان خاطر الاهلاوية والزملاكاوية في الكلية كانو متراهنين علي مين يكسب، وكان للبنات شكولاتات وحاجات من دي :) طبعا كان لازم اتابع،،،وسبحان الله اول مرة اتابع يكسب الاهلي المكسب الساحق ده، كان برضة وقتها الجو وااااااااااااااااو بجد ملوش حل، ولو انة مفرقش كتير معايا وقتها....

بس المرة دي الاحساس مختلف، السبب لمتابعة المبارة مختلف تماما، الروح مختلفة، الصورة اللي اترسمت في البلد كلها، بكلمة يارب وعلم مصر، كانت حاجة تشجع بجد لوحدها اني لازم اتابع، دا في حاجة بتحصل مهمة في البلد، طب اية طب لية..؟؟

والله ولا كنت اعرف اصلا ان ده ماتش مهم غير من اسبوعين بالظبط، لما كل يوم اسمع في الراديو الصبح وانا بلبس كالعادة، رايو مصر وبرنامج ( طلعت شمس انهاردة) واسمع الاخبار وانهم عاملين نص ساعة تشجيع للفريق علشان نكسب...!!!

قولت مش شرط يعني عادي، بعدين اتفاجأت لما سمعت وانا راجعة من الشغل راديو اف ام برنامج ( كريم الحميدي من 4 الي 7 ) كل يوم برضة يخصص نص ساعة تشجيع للماتش...!!!!

قولت لأ دا أكيد في حاجة وحاجة كبيرة كمان، طب اما نشوف واتابع طبعا عالفيس بوك احس في حاجة غريب اكتر واكتر....سألت هو كل ده لييييييييييية، قالولي دي مبارة فيها حياة او موت للفريق بتاعنا..

طبعا اتبسط ان في حاجة مخلينا كلنا بندعي بقلب واحد بروح واحدة، لما كنت كل يوم الصبح وانا رايحة شغلي اشوف صورة ابو تريكة اللي واخدة مبني بطولة من فوق كوبري 26 يوليو... وهو رافع ايدة وبيقول ياااااااااااااااااااااارب دعوتكم معانا يا مصرين..

بجد حسيت بأحساس حلو قوي، احساس ميتوصفش، صعب اوصفة، بقيت ادعي واقول يارب يارب نولهم مرادهم،،،( لأني برغم كل المعلومات اللي عرفتها الا ان جهلي بالكورة مخلنيش مقدرة أهمية المبارة دي)..

بس بعد ما خلاص المبارة قربت جدااا، ومن 4 ايام بداءت احس بجد بالجو اللي بيقول كلنا لازم ندعي كلنا لازم نشجع، لو تشوفو منظر الشوارع في الكام يوم دول، احساس روعة ميتوصفش، كل يوم من المهندسين لمحطة الاسعاف، بعدي بالعربية علي التحرير والكورنيش، قد اية المنظر رووووووووووووووووووعة...

اما بقا يوم الماتش ده اللي بجد كنت مجهزالة قبلها بيومين،،، كان عندي في اليوم ده كورس انجليزي، اول يوم في المستوي اللي انا فية دلوقتي ،، طبعا اخدت بنصيحة اصحابي ومرحتش، لأن الكورس هيبداء 7 والماتش هيبداء 7.30 وتقريبا هينتي في نفس الوقت،، بخلاف الوقت الكورس في كوبري القبة ( معهد اللغات القوات المسلحة) كلة قالي انسي المنطقة دي هتبقا ضرب نااااااااااااااااار...

طبعا لغيت فكرة اني اروح الكورس :) ( مع اني كنت عايزة اروح جداااااااااا ومنة اتفرج علي شكل الناس بعد الفوز، بس خفت علي نفسي :)...

شغلي بقا كان في اليوم ده نص يوم خلصت الساعة 3، ونزلت مخصوص اتفرج علي الشوارع شكلها اية، سبحان الله البلد تحسوها فااااااااااااااااضية لأن في ناس كتير بتجهز لأنها تتفرج عالماتش، وصلت الاسعاف في حوالي 10 دقايق ( ودي مبتحصلش)..
بس الاجمل بقا شكل البلد في الوقت ده كل البيوت حطين علم مصر، وتحس ان البلد اتلونت احمر وابيض واسود الله عليكي يا مصر..
والجو كان جميل قووووووووي ، مفيهاش غير بياعين الاعلام مالين البلد :)

وحصل موقف طريف قوي طفل صغير راكب العربية اللي انا فيها، قاعد جنب اخوة الاكبر وماماتة، وقاعد يقول ماما بوصي العلم متعلق هناك اهو الله يا ماما هنكسب بجد جسمي قشعر من كتر الفرحة بالطفل، واملة في اننا نكسب، وهو سنة لا يتعدي الـ 4 سنين,..سكت شوية
ومرة واحدة قعد يقول وبصوت عالي، ارقص ياحضري ارقص يا حضري هنكسب هييييييييييييييييية
ههههههههههههه
مش قادرة اقولكم منظر العربية بعد ما الطفل ده عمل كده، والناس قعدت تقولة هنكسب يا حببيبي متخفش ربنا كبير ومش هكسفنا، وهنكسب :)

والمترو بقا حكاية، اتفاجأت اول ما حطيت رجلي في محطة ان صوت شادية شغال بصوت عالي في كل مكان في المترو ( يا حببتي يامصر، يابلادي يا احلي البلاد يا بلااااااااااااااادي ) وكمان حطين علم مصر كبيييييييييييييييييييير قوي

وعربية من عربيات المترو، كان فيها شباب معاهم طبل وبيهيصو وبيقولة مصررررررررررررر

بجد روح جميلة قوي واحساس اجمل والله،،، :)

طبعا رجعت البيت نمت شوية وقولتلهم في البيت صحوني قبل الماتش بنص ساعة ( لأن الناس هتبداء دعاء من 7.25 ) في المللعب ده عرفتة من الفيس بوك..
ماما استغربت قوي بتقولي هو انتي هتتفرجي علي الماتش ولا اية، قولتلها طبعا انتي مش متخيلة الماتش دهمهم قد اية.؟
بصتلي بستغراب طيب، بس اللي عايز يتفرج علي الماتش يدخل جوة يتفرج علية( في اوضة تاني تلفزيون صغير) صوت انا واخواتي وقلنلها في نفس واحد، ادخلي انتي جوة، كلنا هنتفرج عالماتش، طبعا الاغلبية خلتها تتفرج معانا اصلا هاهاها

نمت فعلا وصحيت قبلها بربع ساعة، ولاقيت كل الناس مستعدة، والجو هادي والبلد هس هس...

قعدنا كلنا منتظرين، وانا فضلت ادعي واقول يااااااااااااااااااااارب متكسفنا، يارب متكسرش بفرحتنا( بجد كنت خايفة علي الشعب اللي من الامل ممكن يجرالة حاجة لو خسرنا) قولت يارب علشان بس الناس الغلابة دي انصرنا يااااااااااااااارب
الماتش بداء فعلا كلة قبل الماتش دعوات وكلة بيقول يااااااااااااارب ووقت العشاء في الاستاد كان ملوش حل شوفتة فديو حاجة تفرح بجد

عايزين تشوفو اية اللي حصل قبل الماتش بعد اذان المغرب بجد حاجة مش هتتكرر تاني

http://www.facebook.com/video/video.php?v=1266393386966&ref=nf





تاتاتاتاتااااااااااااااااااااااااااااااااا

يادوبك وعلي خوانة جية الجون الاول، وماما بتقلب في القنوان بالغلط قبل الجون الاول بلحظات، وطبعا ملحقناش نشوفة، ماما مكنتش متخيلة ان في اللحظة دي يجي جون، فضلت اصوت وقولة شوفتي جووووووووووووووووووووووووووون انا واخواتي

طبعا عامل المفاجاة كان قوووووووووووي جدااا ( وقتها اتبسط قوي، لأن المحللين الرياضين قالو قبل الماتس بيومين ان لو جبنا جون في اول دقايق يبقا فرصتنا هتزيد في الفوز)...بس طبعا الجون الاول جعل الفريق بتاعنا يدعل شوية، كنت متخيلة هنجيب التاني بعدي بشوية بس قدر الله وما شاء فعل :)


فضلت بتابع الشوط الاول لأخرة وانا عندي امل في جون تاني زي ما سمعت من المحللين الرياضين ، بس محصلش،،، حسيت بخنقة شوية قولت تتعوض في الشوط التاني عادي جدااا، لسة في أمل...

تعالو بقا لحرقة الاعصاب، والشدة والعصبية والخنقة والخوف والرهبة في الشوط التاني مع الدقيقة 20 كنت خلاص بداءت انهار انهيار تام.
قولت لأ بجد حرام عليكم، ومع كل جون يروح علينا اصوت جدااا واقول لأاااااااااااااااااا ، وكل ما يصد الحضري جون ببقا بموت كل ما الكورة تقرب من شبكتنا :(
لحد بعد الدقيقة الـ 30 وانا خلاص جبت اخري، وبداءت احس في دموع هتخرج من عنية قولت اية ده هو انا مهتمة كده لية، بس من غير ما احس دي بلدي دي هتتهزم، الكاميرات جايبة وشوش الناس في الاستاد خلاص بقت اسود من رغيف العيش بتعانا، ولا جمال مبارك واخو خلاص بيضربو اخماس في اسداس، وجت الصورة علي ايهاب توفيق، وسعد الصغيرة وكام ممثلة كمان، خلاص منهارين وتقريبا منهم بيبكي،،، قولت خلاص بجد ،،، والجمهور بقا الغلابة بطلو تشجيع، وباين عليهم اتصدمو ان الماتش خلاص بيخلص، واحنا خسراينين،،،قام الحضري بس حماس، شاورلهم وقالهم شجعوووووووووووووووووووووووووو بايدية وقعد يحمس فيهم، شعلل الحماس فيهم من تاني، لكن مش زي اول المبارة...

صعبو علية قوي والله...

شوية ولاقيت بابا في الدقيق 40 خارج يقول خلاص خسرنا، واخويا الصغير رد قالة اه فعلا يابابا يا فرحة ما تمت، اختي جت هي كمان تكمل كلامهم وتقول ماخلاص الماتش خلص، بتتفرجو علي اية،،،قمت انا مصوتة في وشهم وقولتلهم بس متقولوش كده، لسة ف يامل، وبما اني مليش في الكورة اخويا الصغير مفهمني ان لينا وقت بدل ضايع يعني لسة فاضل وقت ، بس برضة عالفاضي,....والمذيع اللي بيذيع المبارة بيقول ياجماعة خلاص مش عايزين نضايق نفسنا، والفريق بتاعنا عمل اللي علية، والحمد لله لحد كده، الكورة مكسب وخسارة، كان نفسي اقتلة...


من غير ما احس اتحطيت في حلظة الدقيقة 45 بصيت كده للمنظر والصوت اللي جنبي، والناس اللي في الشقة اللي تحتي بتخبط في الحيطة وبتصوت من الخسارة، والمنظر مرعب، قولت دعوة واحدة وانا ببكي، يارب زي ام فاجأتنا بالجون الاول في اول لحظات يااااااااااااارب متكسفنا وادينا الجون التاني علي اخر لحظة برضة

مكملتهاش كان الجون التاني جية من الفرحة مركزتش في لأن الصويت حولية كان اسرع من الكورة
بجد محستش بنفسي ( ماما كانت راحت في النوم بين الشوط الاول والتاني،) قامت علي صويتنا اتخضت ، جوووووووووووووووووووووووووووون يا مصر


لولولولييييييييييييييييييييييييييييييييي

بقيت اتنطت واصوت واقول انا واخواتي جوووووووووووووووووون كسبنا لااااااااااااااااااااااا مش مصدقين نفسنا اساسا، احنا كنا خسرانين احنا مكنش في اي امل نكسب بجد مش مصدقة نفسي الدنيا اتقلبت بجد...

حلاوة الجون ده بالتحديد والاول انة جية علي خوانة ، والتاني بقا جية بالدموع بجد يعني جون بكينا فية كلنا اكتر ما فرحنا بي :) الحمد لله...
وده الجون التاريخي لعماد متعب، بجد حاجة تشرح القلب الحزين :)






بس طبعا بما اني منزلتش من البيت،
فضلت اقلب في القنوات واتفرج علي شكل البلد بعد الفوز الساحق ده، ودخلت عالفيس بوك ادور عالشوط التاني لأني ملحقتش اتفرج علية بجد، كان نفسي استمتع بشكلة من كتر العياط اللي عيطة، والحسرة اللي كانت في قلبي، لا قيتة الحمد لله وبجد شكل الفيس بوك كان تحفة بالتهليلات والفرحة بالنصر، بجد بحبك يا مصرررررررررررررررررر..

بجد معرفتش انام من الفرحة، مش جايلي نوم، حسيت زي ما يكون فرحي والله العظيم، يمكن الواحد مفرحش الفرحة دي بقالة زماااااااااااااااان قوي، وخصوصا ان كلنا قلب واحد روح واحدة فرحة واحدة...

حسيت ان مصر هي العروسة والمنتخب هو العريس، وبجد الفوز ده كان احلي فرحة لينا كلنا :)

انتم عارفين كلنا لعبنا، كلنا كنا بنشارك الفريق باللعب، اللي مشاركش لعب شارك دعوات، واللي مشاركش دعوات شارك صلوات، وبجد الفرحة مكنتش سايعانا، وكنت حسة ان العين علي مصر بشكل خلاص من فرحتها هتتحسد،،،طبعا احنا طماعين كان نفسنا في الـ 3 بس قد اخف من قضا، انا مكنتش متخيلة ان الجمهور كان هيسيب اللعيبة غير بعد ما يقتلهم لأنهم عشموهم بالفوز وبعدين حسروهم بالخسارة ...

الحمد لله بجد

بليل معرفتش انام شغلت محطة الاف ام علي برنامج احمد يونس ( برنامج عالقهوة) ياااااااااااااه علي كمية السعادة والفرحة، اللي حسيتهم من صوت الناس في الشارع، وكل واحد يتصل يبقا حوالية مليون حد بيشجعو وبيصوتو كان نفسي ابقا معاهم والله ، من كتر الفرحة مش عارفة انام عندي شغل الصبح لازم انام :)
الحمد لله بجد
الصبح طبعا من الفرحة لبست اللوانالعلم بقا احمر في اسود وابيض، وبجد عايزة امشي كده طول الطريق واقول أنا مصرية وافتخر :)
والله من فرحتي دخلت صليت قبل ما انام ركعتين شكر لله انه كرمنا، ودعيت يارب ما تكسر بفرحتنا وتكمل علي خير يوم الاربعاء

تحسنا كلنا كان عندنا فرح، كلنا فرحانين لنفس السبب، لنفس الروح، بجد شكلنا حلو قوووووووووووي واحنا متعاونين مع بعض علي حاجة واحدة، بقلب رجل واحد..

وقتها بس قولت ان لاقدر الله لو حصل واتحطينا في موقف حرب، هننتصر بأذن الله، الارادة عندنا قووووووووووي جدا، غير اي حد، بس لما نتفق علي حاجة واحدة ونتفق بروح واحدة..اكيد ربنا هينصرنا بأذنه....

بس ماماتي قالتلي مين يشجع اللي لابس بنطلون ومسقطة، ولا اللي مش فالح في حاجة غير القاعدة عالقهاوي، قولتلها يا ماما هما محتاجين فرصة، لو ادنلهم الفرصة يثبتو نفسهم هيثبتو نفسهم بجد من خلال الروح دي...
نفسي زي ما قدرنا 80 مليون واكتر نتجمع علي حاجة واحدة اننا نحسن من بلدنا بجد، نعمل حاجة، احنا كتير والكترة تغلب الشجاعة، بس المهم نعمل نحاول، وخلينا فاكرين زي ما قدرنا نعملها في المبارة دي نقدر نعملها في اي وقت واي مكان :)

الحمد لله وربنا يكمل فرحتنا علي خييييييييييير يوم الاربعاء، يارب ما تكسر فرحتنا بأذن الله..

الجمعة، 6 نوفمبر 2009

علي فيييييين.؟؟


ولا عارف قلبي مين حبيبة ولا عارف قلبي فين نصيبة...وبياخدة شوق، وشوق يجيبة، وعيوني ورااااااااه..

بتقول مش عارف وانا جنبك دي الناس عارفين اني بحبك منك للشوق اه من قلبك اه منك ااااااااااااااااااه..

مش عارف انا خايف اقرب اتجرح او اتوه واتغرب، انا قلبي من قبلك جرب و رجعلي باااااااااااااااااه..

أنا حسة بجرحك كان بيا، ومحدش كان حاسس بيا، صدقني وسيب قلبك لية ومعايا دواااااااااااااااااااه..
هات حبيبي عيونك...جوا قلبي عذاب واهات...
هو مين مرتاااااااااااااااح..؟؟؟
كفاينا جرااااح

مالك ومالنا يا هوا، مكفاية وسبنا يا هوا ، في اللي جرالنااااااااااااااااا....



الجمعة، 30 أكتوبر 2009

ربنا حب يطبط عليكي بطريقتة،، الحمد لله

رايح مشوارك وفي نفس السكة ركبت غلط، طبيعي تهت، ومبقتش عارف تعمل اية، وتيجي تتدور علي اللي يدلك عالطريق الصح يتوهك اكتر واكتر ما انت تايه....
وبعد ما تفقد الامل في كل السكك وكل البشر، تلاقي حد طلعلك من حيث لا تحتسب، ويجي في عز الوقت اللي فقدت فية الامل في انك تعرف توصل للمكان اللي عايز تروحة،،،يشدك ويقولك يلا انت مستني اية تعالي انا كنت هموت وانا جيلك يلا اركب معايا( طبعا انت مزبهل ومتنح وبتقول هو في اية، والف علامة استفهام .؟؟؟ ) لأن الشخص ده ولا كان يخطر علي بالك يجي المكان ده، والاهم انة كان اخر حد ممكن تفكر في ويساعدك علشان توصل لطريقك :)
الغريب بقا اللي بيدور في ذهنك في اللحظة دي..
اية ده سبحان الله اكيد ماما دعتلي امبارح لما كنت بدردش معاها عن مشاكلي واضايقت علشاني فدعتلي من قلبها :(
طب ما ممكن يكون المساعدات اللي بتساعدي الناس فيها بدون مقابل، فربنا حب يجازيك عنها ولاقيت رصيد عند ربنا يساعدك ، وتتكل علية ( كما تدين تدان).
وكل ده وانت مش عارف الف استنتاج في دماغك....
بس المهم ان في الاخر كل ما تفتكر تقول الحمد لله، اللهم استخدمني ولا تستبدلني،،، لأن مردود العطاء غير المشروط كل يوم بيزيد ويزيد في رصيدك عند الله....
ووقت ما تضيق الدنيا بيك تلاقي السحب عالمكشوف لدرجة انك بتسحب وانت مش متخيل ان حسابك ممكن يغطي كل ده
الحمد لله..
طب بلاش دي...
حد كان نفسك يبقا في بنكم صداقة، وطول الوقت الحد ده متجاهل احساسك ده وانك نفسك تفتح معا كلام، ومن كتر ما انت نفسك وهو مش مهتم، انت زهقت ونسيت وبعدت، وسبحان الله في نفس اليوم اللي كنت تاية في وربنا ساعدك برصيدك ، تلاقي الشخص ده هو نفسة اللي بيدور عليك علشان يتكلم معاك ويفتح بينكم صداقة ...
طبعا مليونين تلاتة علامة استفهام اكبر واكتر من اللي فوق :)
بس ملهاش تحليل غير ان احساسك وصلة، من كتر ما كان نفسك توصلة، وهو وصلة كل الاشارات اللي بتدل علي رغبتك في انك تكلمة، وكلمك بمجرد ما انت بداءت ترخي حبل الرغبة علشان تسيبة، اللي كان رابطك بي :)
سبحان الله برضة كلة في يوم واحد...
طب بلاش دي كمان
حد كنت كل يوم تنتظرة يكلمك وكنت محتاج تتكلم معا قووووووووووووي لدرجة انك كان ناقص تقول يا اخي ارحمني وتعالي بقا انا زهقت ومنتظرك بفارغ الصبر.....بس برضة لأن مفيش امل في انة يستجيب من طلباتك الداخلية للشخص ده بتبعد عن الموضوع، وتتجاهل الشخص ده...
لكن بقا العجيب انة يظهر في الوقت اللي انت خلاص مبقتش محتاج تتكلم معا ورغبتك شبة اختفت في انك تكلمة لأن الشخص اللي فوق سبقة وكلم الشخص اللي كان فقد الامل فيكم انتم الاتنين هاهاها
يعني اللي سبق اكل لنباء.....
وبرضة وقتها تقول الحمد لله، لأن علي الاقل لما كلمتة حسيت ان مكنش في داعي تتكلم معا في الاول، وبقا الكلام بشكل عادي....
طب بلاش دي كمان خالص...
حلم حلمتة طول عمرك وفضلت تكبرة جواك، ويكبر مع كل يوم في عمرك، ويعلي ويعلي، لكن بدون اي نتايج ولا اي دليل انة هايتحقق خالص، وانت رضيت بالامر الواقع وقولت برضة هكمل في طريقي يمكن يجي اليوم اللي اقدر احققة في، وتيجي فرصة تساعدني احققة....
بس مع ذالك كل الفرص بتشدة لتحت بعيد عن حلمة، لكن في نفس الاتجاة اه بعيييييييييييد لكن في نفس الاتجاة، وفجاة وبدون مقدمات في عز اليأس اللي وصلتلة والخنقة والسواد اللي غطا عيونك، تلاقي نور جي من بعيد يقولك كمل طريقك متستبعدش الطريق
كلة بأونة هتوصل كمل كمل،،،، والدليل انك هتكمل هو انك دخلت مكان كان ه حلمك، وبقيت شايفة قدام عيونك بس لة ملمستوش لأنك مش متأكد انة بتاعك انت ملكك، وان هو ده اللي بتعمل كل ده في حياتك علشان توصلة....بس هو جالك لحد عندك بس لسة مأكدش عليك ان انت صاحب الحلم ده.....
وبرضة كلة في نفس اليوم سبحان الله.
طب بلاش دي كمان
لما تلاقي الدنيا اسودة في عينك بسبب موقف ما، ويجي صاحب نفس الموقف ويحاول يوصلك ان الدنيا رمادي مضايقش نفسك، وانت تستغرب بشدة وتبقا مزبهل برضة هو في اية...؟؟؟
بس سبحان الله برضة تحس ان ربنا جنبك خطوة بخطوة انهاردة....
برغم ان امبارح انت كنت خلاص وصلت لمرحلة انك اتخنقت من كل شئ، وحسيت ان كل حاجة جاية عليك..
بس علي رأي لومي( ربنا حب يطبط عليكي بطريقتة)
الحمد لله
بس برضة بقول ان دي حلاوة دعوتك يا امي بجد
ودعوة حد لية بظهر الغيب
وفي كل الحالات الحمد لله علي كل حال :)

الأربعاء، 28 أكتوبر 2009

علاقة خاصة مع السرير


السرير


كل حالة من حالات الانسان لها ادب ولها فن ولها علم...

فالطعام فن والسير في الطريق فن...واستقبال الناس فن يتعلمونة في سويسرة....

فهل النوم فن.؟؟
من كتاب اللوان من الحب لانيس منصور..

مين فينا يعرف علاقتة بسريرة، هل حد فكر قبل كده بمتعة ان له سرير خاص..؟؟

معتقدش حد وصل لنفس الفكرة دي...

يمكن انا شخصيا كنت من سنين معرفش يعني اية سريري ولا ماذا يعني بالنسبة لي..
واعتقد ان السبب هو اني مكنتش مدركة قيمة السرير بالنسبة لي..
طب واية اللي اتغير وخلاني اعرف قيمة السرير بتاعي :)

حاجة بسيطة لما بعدت عنة، لما بقيت بقابلة بالصدفة، او علي حسب الوقت الباقي من اليوم ده لو لحقت...
بس قبل كده كان مش فارق معايا علشان مكنتس بفارقة لا ليل ولا نهار..

طبعا ده كان ايام الدراسة والدلع والانتخة في البيت، كان ليلي نهاري ونهاري ليلي، كنت انام وقت ما احب، واقوم وقت ما احب، ولا يفرق معايا سريري في شئ ،غير انة مجرد وسيلة للحصول علي الانتخة والراحة والكسل المبالغ في..

بس بعد فترة لما حياتي اتغيرت وبقا عندي مشغوليات، شغل ودراسات وطموحات، كان قرار اني اهجر الراحة قرار مصيري، وكان واضح أكتر في اني قررت ابعد عن سريري اللي مكنش فارق معايا اساسا من البداية لأن كان سهل انام في اي مكان واي وقت زي ما احب، حتي لو مش علي سريري :)

مع الوقت والتعب والمجهود طول اليوم، بقيت فعلا بقدر قيمة ساعات النوم اللي نفسي احصل عليها، واللي كان عندي منها رصيد كبير قوي ايام الانتخة، لكن النوم ميعرفش يعني اية لية رصيد في بنك الراحة قبل كده،،،بنك الراحة رصيد السحب منة بدون حساب، ولا ينفع اقترض منة، ولا اقرض حد منة، لأن كلة اول بأول :)

اكلمكم بقا عن علاقتي بسريري

اه والله اصلي بقيت علي علاقة عاتيفية بسريري هاهاها

حاجة كده ولا في الاحلام ، ولا تقولي حب حبيب ولا حب قريب

دا حب من نوع خاص، انام علية وقت ما احب، يستحمل الارق بتاعي وقت ما اكون مرهقة، يستحمل تعبي وقت ما انام ومحسش بأي شئ حوالية، سريري بيحتويني اكتر من اي حد، اه والله
دا حتي لما يبقا متنكد علية مفيش غيرة يتغرق بدموعي، ووقت فرحي بقا ايييييييية مقلكمش علية بيبقا بيزقتت هو كمان من الفرحة من كتر ما بفرك علية من كتر ما النوم راح من عيني من فرحتي :)

طب بذمتكم مش بتنامو كده برحتكم رجل مرمية في الشرق والتانية في الغرب

وراس في الشمال، وايد في اليمين

حاجة كده متبعترة اخر بعترة، ولا يجي السرير يقولك خدلك جنب خنقتني، ولا يقولك انت تقيل لية كده يا اخي ولا خفيف كده لية :)

طب بلاش دي

مجرد ما بتحط جسمك علي السرير كده وانت جاي من يوم كلة لف في الشوارع وشغل وارهاق لمدة 12 ساعة واكتر كمان ياااااااااااااه علي الروعة لما تحط جسمك وتفردة علي سريرك وكأنك بتسيب نفسك وتسرح في خيال وعالم تاني من الخيااااااااااااال عالم كلة راحة وانتخة، حالة عشق من نوع خاص، لما تتقابل انت وسريرك واحلي ما في الموضوع ان السرير بيحتويك بكل هدوء، ويضمك لية بكل عشق وحب، وكأنة كان بينادي عليك طول اليوم علشان ترتاح بس انت مكنتش فاضيلة...
بحبك يا سريري :)

سريري ده قصة عشق من نوع خاص...
الغريب بقا في الموضوع اللي عمالة احكلكم علية ده، ان السرير اللي بقالي كام سنة محتلة مش سريري هاهاها
فعلا انا احتليت السرير ده من سنيتين تلاتة، من اخواتي الشباب، وبقيت محتلة زي اسرائيل كده ما محتلة فلسطين، لا حد يقدر يهوب ناحيتة ولا ينام علية غيري، حتي لو نام علية يقوم يتلقح في مكان تاني علشان انا انام :)
اصل سريري ميتكشفش علي اغراب
:)





الثلاثاء، 20 أكتوبر 2009

شاحن الذكريات ( وانهاردة بقول كانت ذكري وعشتلي يومين )


كنت زمان بقول بعد الحب ما ينتهي ( قالي الوداع وانا اقولة اية) لكن لما كبرت والدنيا دوبتني في حكايتها أكتشفت أن ( بكرة نقول كانت ذكري وعشنلنا يومين) فعلا دي الحقيقة واللي بيروح سهل يتعوض لو فكرنا انة سهل، واول ما نقول هننسا بننسا وعن تجربة ياما نسيت وما اتنسيت :)

انهاردة كتبت في البروفيل بتاعي عالفيس بوك الجملة دي وانا مقتنعة بيها قوي .....

بس بغض النظر عن كونها صح مية في المية او غلط مية في المية ، بس عالاقل انا حسيتها كده وجربتها في حياتي خلال التجارب اللي مريت بيها وبالأخص تجاربي العاطفية...
طول طريقي انهاردة من الشغل للكورس ومن الكورس للبيت، كنت بفكر في الكومنت اللي كتبتة ده..
بس بعد طول تفكير فعلا لاقيتها صح مية في المية لأني عشتها كده...

زمان فعلا كنت بقول ( قالي الوداع وانا اقولة اية هو الوداع يتقال في اية) كنت بعيش ايام سودة وبتعب قوووووووووووي وكنت بستغر من كل حاجة وبتخنق من اي حاجة بعد كل علاقة متكملش.

بس بعد فترة برجع اخد قرار اني انسي والحمد لله ربنا بيقدرني فعلا وبتناسا مش بسني قوي يعني كل ده علشان اقدر اكمل حياتي بشكل صح، بدون تعقيد، بعيد بقا عن الحب والتجارب العاطفية الغير مكتملة، كانت كلها محاولت فعلا بحاول وبقدر الحمد لله اني اكمل طريقي..

وبخرج من التجربة دي بكمية دورس، مهما كنت غلطانة مهما كنت مظلومة بصارح نفسي جداااااا، علشان اعرف فين الغلط وميتكررش تاني...
والحمد لله بتعلم علي قد ما بقدر، بس بيبقا جوايا جرح وحزن ان ازاي مكملتش، ازاي احط رهاني علي حصان خسران من البداية وانا معرفش، وحتي لو كنت عارفة برضة لية.
بس بعدين اكتشفت ان مش مهم لية وفين ومين...

المهم ان اعيش احلي ما في اللحظة...

يعني زي ما قال بالظبط ( واهو بكرة نقول كانت ذكري وعشنلنا يومين).....

( وانهاردة بقول كانت ذكري وعشتلي يومين )

فعلا انا انهاردة حسيتها قوي وانا بسمع الاغنية ويمكن ده السبب في اني اكتب الكومنت ده في الفيس بوك... لأني كنت بقول انهاردة انها مجرد ذكري وعشتلي يومين من اجمل ايام حياتي اللي فاتت ( لأني لسة معرفش اللي جي احلي ولا اية ظروفة كلة ف يعلم الغيب )

لية اضايقك نفسي مهما مريت بعلاقات غير مكتملة لية ازعل نفسي...عادي

كفاية اني عشت يومين بحب صادق من جوايا وده انا واثقة في جدااا حتي لو كان الطرف التاني محبش بصدق كفاية علية لحظات عشتها ولسة بعيش عليها....
من كل التجارب اللي مريت بيها علي مدار حياتي لحد انهاردة مطلعتش غير بلحظات وذكريات تشحن طاقتي طول الوقت
يمكن لأني مش بحب اعيش من غير حب، فطول الوقت بشحن قلبي بكل حب حتي لو علي ذكريات حب فات :)

ومين عالم يمكن نوع الشحن يتغير ويبقا شاحن بالمستقبل بدل شاحن ذكريات ده :)

السبت، 17 أكتوبر 2009

صدفة ومن بين كل الناس علقني :)


صدفه ومن بين كل الناس علقني من يوم شفته وعيني جات في عينه
حسيت شي في عيونه حلو يجذبني لما ابتسم بانت بوجهي تلاوينه




سلم عليي وجلس جمبي وكلمني كل الحواجز تلاشت بيني وبينه
اخذ ايديني بايديه وقام يوصفني
ولا تمنيت ايدي تترك ايدينه
قالي كلام بصراحه حلو دوخني
ماقد سمعت بحلاته اه يازينه
الله علي دي صدفة بجد
بس كان حلم من ضمن الاحلام
ومن اجمل الصدف اللي مريت بيها بجد ( حالة لذيذة حبيت اسجلها )

الأربعاء، 14 أكتوبر 2009

اللهم أستخدمني ولا تستبدلني

يمكن المرة دي غير كل مرة، مش لاقية كلام فعلا اقولة غير الحمد لله علي كل اللي قدرني ربنا اني اوصلة :)
بالنسبة لانجاز المرة دي هو اني سجلت حلقة في برنامج هزار بجد علي راديو كريزي اف ام
يوم 13/10/2009
وطبعا السبب في انهم يختاروني تجربتي اللي مريت بيها الحمد لله ( في مستقبلي وحياتي بشكل عام) .
اتكلمت في الحلقة عن ازاي تسوق لنفسك علشان تشغل نفسك بنفسك
عموما دي الحلقة للي يحب يسمعها، واتمنا تفيد أنشالة شخص واحد ياااااااااااارب
اللهم أستخدمني ولا تستبدلني
ياااااااااااارب

الجمعة، 9 أكتوبر 2009

Final Destination

Final Destination




كل الناس ماشين رايحين، وجاين كلة ماشي في اتجاة، وعايز يوصل لإتجاة ما،بس كام واحد طريقة بيتوافق مع طريق اللي ماشي معا....!!!

ممكن نمشي في محطة واحدة، بس كل واحد فينا قاصد نهاية مختلفة.

طول الوقت ماشيين في طريق وبنقابل ناس،في طريقنا، بس كام واحد فيهم عايز يوصل لنفس هدفنا..

ممكن يحصل العكس، وممكن لأ....!!!

يا عالم

و نتقابل في المعاد ونتوة عن بعض لكن بتجمعنا الصدف يا عيني..

يا عيني عالصدف :)

لكن للأسف الصدف زي السكر اللي اول ما ينزل مية يدوب ويروح ويختفي مع التقليب .

الأحد، 4 أكتوبر 2009

مش عارفة...!!!

مش عارفة .....

مش عارفة لية صحيت انهاردة بدررررررررررررري قوي علي غير العادة....!!!
مش عارفة لية من وقت ما صحيت لحد ما روحت شغلي بدري نص ساعة فايقة ورايقة والدنيا فل، برغم كمية الزحمة والدوشة اللي حوالية، بس رايقة وكأني في الجنة....!!!
مش عارفة لية طول الطريق من والي الشغل رايقة وشايفة كل حاجة جميلة حتي الزبالة اللي في الشارع :) ...!!!
مش عارفة لية ( سبحان الله) ربنا كان مباركلي في سعات اليوم بتاعت انهاردة وكأنة اسبوع مش كام ساعة...!!
مش عارفة لية بمجرد ما بداءت اصلي انهاردة حسة بأحساس روحاني عالي قووووووووي ومودي زي الفل ( مشاء الله يعني )...!!!
مش عارفة لية اول ما رحت شغلي، وبرغم اني رايحة بدري عن معادي نص ساعة، بداءت شغل، ومسكت مكتبي رتبتة واتخلصت من كل الورق اللي ملوش لازمة، خليت الدنيا زي الفل :) ( حملة نضافة من نوع خاص) .....!!!
مش عارفة لية برغم اني كنت صايمة انهاردة وجعانة قووووووووي، كنت حسة بأستمتاع غريب بالصيام يمكن اكتر من رمضان....!!
مش عارفة لية حسة ان الجروب بتاعي عالفيس بوك اللي بقالة سنتين ( لكل من يعتقد انه فاشل) كل الاعضاء اللي فية حسيتهم زي اطفالي اللي بعشقهم، وبخاف عليهم، وبفرح لفرحهم وبزعل لزعلهم، ومستمتعة بجروبي، اللي بحسة بذرة الخير اللي ربنا اللهمني ازرعها من سنتين ولحد دلوقتي بجني ثماراها ، الحمد لله....!!!
مش عارفة لية دلوقتي حسة ان كل اصحابي اللي بحبهم بيئنسو وحدتي اختفو مرة واحدة في وقت واحد، لدرجة اني حسيت نفسي فعلا لوحدي، برغم اني مش بحس بده معاهم، برغم اني فعلا لوحدي، بس كانو بيهونو عليه وجودهم جنبي....!!!
مش عارفة لية أنهاردة قررت امسك ورقة وقلم واكتب لتاني مرة كل انجازاتي خلال السنة واحصر كل انجازاتي خلال السنة دي برغم اني فعلا كتبتها قبل كده لكن راحت مع سرقة شنطتي في رمضان.....!!!!
مش عارفة لية وبمنتهي الصراحة حسة دلوقتي اني بحب حياتي قوي وشخصيتي برغم ان ناس كتير بتقولي مينفعش حياتك تفضل كده ولا شخصيتك تستمر علي كده، لأنك هتفقدي حاجات كتير بسبب كده أهم في نظرهم ....برغم اني عارفة انهم مش صح قوي، واني مش هقبل بحاجة اقل من اللي في تفكيري،وبرغم اني جربت كتير بس لللأسف مش بيعوضو الفراغ ده...بس مبسوطة بنفسي...!!!
مش عارفة لية حسة اني قربت امسك احلامي بأيدي واعيش معاها وتعيش معايا، برغم اني حتي محصلتش نص الطريق....!!!
مش عارفة لية حسة ان بكرة اللوانة جميييييييييييييييييلة قوي، برغم ان كل الالوان دلوقتي يا ابيض يا اسود درك بلاك قوووووووووووي :(...!!!!
مش عارفة لي حساني مختلف في كل حاجة، ومع ذالك حسة اني غريبة بكل حاجة وفي اي حاجة، بس برضة مرتاحة ...!!!!
مش عارفة لية بقا بقالي كام يوم من وقت اجازة اخر السنة، وانا هاتك يا تدوينات، لما انا صدعت من نفسي وتتدفق الافكار الفظيع ده، اللي مخليني كل يومين تدوينة ده ان مكنش كل يوم.....!!!
مش عارفة هل هارجع انشغل تاني لما الجامعة تبداء والكوراسات تبداء والشغل شغال، هارجع اكتب تاني تدوينات، مع اني اشك اني ابعد عن بيتي حبيبتي مدونتي.....!!!
مش عارفة ناس كتير بتابع مدونتي من غير ما تكتب تعليق، يعني متابعين في صمت والدليل انهم بيقابلوني في اي مكان عالنت او برة النت بالصدفة يقولولي "علي فكرة متابعين مدونتك" ويشكرو فيها، لكن في صمت، مع اني بفرح بتعليقاتهم قوي لأنهم بيقولة حل لأي حيرة من غير ما يعرفو المشكلة اية...!!!!!
مش عارفة لية ناس كتير بتنتقد وضوحي الصريح في كلامي عن حياتي الشخصية، برغم اني مش شايفة في عيب اني اتكلم عنها زي ما احب طلامة مش بعمل لا حاجة حرام ولا عيب، ولا حاجة اخجل منها....!!!
مش عارفة لية ناس كتير شايفني تنكة وتقيلة وخصوصا اللي ساكنين قريب مني، برغم اني شايفة ان افضل ( امشي عدل يحتار عدوك فيك) هما شايفين ده تناكة وتقل مش مشكلة احسن من اي حاجة تانية هاهاه....!!!
مش عارفة لية ناس كتير بتقول علية أجتماعية، وحبوبة، ولية علاقات كتير، واللي بيعرفني وبيشوفني من اول مرة، كأنة يعرفني من سنين...!!!
مش عارفة لية الناس كلها متخيلة انهم فاهميني صح قوي، من خلال تدويناتي او غيرة، برغم اني متأكد ان مش كلهم فاهمين كل حاجة مهما قالو فاهم...!!
مش عارفة لية بقيت مش طايقة النت، وزهقانة منة، ومش عايزة اطول تاني علية واستقطع من وقتة، واعيش حياتي بقا بعيد عنة شوية...!!
مش عارفة لية اكتشفت من قريب ان حياتي كلها بقت مرتبطة بالنت ارتباط كلي، بحيث ان حياتي العامة واصحابي من النت وبرة النت بيربطني بيهم النت....!!!!
مش عارفة لية بقيت حاسة ان المرحلة دي انتقالية في حياتي، وخارجة من عالم، وداخلة عالم تاني، ومن اول السنة دي حسيت اني بتسحب من العالم بتاعي القديم، وبدخل عالم تاني، احلي واحسن، بس بيفتقد لبعض الراحة والتأمل شوية كتير، كلة تعب وشقا، واحساس بنجاحات، واحلام بتتحقق، بس برغم كل ده مش عارفة اية اللي تاعبني...!!!
مش عارفة لية حسة اني غريبة في بيتنا دلوقتي، برغم اني بحب اهلي واهلي مبسوطين بية وبنشاطي واجتهادي، مع اني حباهم مستغرباهم، وبعد دخولي العالم الجديد هما كمان استغربوني....!!!
مش عارفة لية دلوقتي حسة اني بقيت اشوف الناس بعين تانية، عين فيها رحمة حكمة هدوء طيبة، شر كتيييييير...كمية تناقض غريب...بس برضة جنة من غير ناس ما تنداس..!!!!
مش عارفة لية بقيت عصبية بزيادة قووووووووووي ومع ذالك بقيت اعرف اتحكم في عصبيتي اكتر...!!!
مش عارفة لية حسة اني ماشية في طريق مجهول المعالم بس برضة حسة ان اخرة نور، بس ياترة ضي بصحيح ولا سراااااااااب.....!!!!
مش عارفة هل هايجي يوم واقفل مدونتي وابطل اعبر عن حياتي عالنت، لأني بالفعل بعبر عنها بالورقة والقلم من زمااااااااااان...!!!
مش عارفة هل ممكن تجبرني الظروف في يوم اخلي مدونتي شخصية بس بحيث محدش يشوفها غيري او لأ..!!!
مش عارفة هل أنا ممكن في يوم ابقا ام لبيبي وأستحمل عياطة وبهدلتي في تربيتة، ولحد ما يوصل لمرحلة المراهقة، وهقدر اتحمل كل ده.....!!!
مش عارفة لية بموت في بنت صحبتي الانتيم( لوجي )، وهاتجنن بصورها عالنت وكأنها بنوتي انا....!!!
مش عارفة اخرة اللي بخططتة لحياتي ده واللي ماشية في، هايوصلني لأحلامي وراحتي، ولا هايعمل فيا اية....!!!
مش عارفة لية حسة ان ربنا معايا قووووووووي، برغم اني حسة اني قصرت السنة دي قوي في حق ربنا، وبحاول فعلا ارجع تاني....!!!
مش عارفة بعد 5 سنين من دلوقتي حياتي هايكون شكلها اية وهبقا وصلت لفيييييييييييين.... الله اعلم...!!!
مش عارفة لو موت انتم هتعرفو ازاي اني موت برغم ان محدش يعرف باسورداتي كلها عالنت غير مذكراتي الشخصية ( الاجندة بتاعتي) ومعتقدش حد هايفتحها بعد موتي :(.....!!!!!
مش عارفة مخبي اية بكرة لية، وبرغم كده ماشية.....!!!!
مش عارفة لية حسة اني طولت وبرغم كده حسة ان لسة في كلام كتيييييييييير مش عارفة اية هو لا لية...!!!
مش عارفة لية بعد ما خلصت البوست اكتشفت اني قولت كلام ممكن في يوم يبقا ضدي قبل ما يتحسبلي، وبرغم كده كتبتة، ومش حذفت منة حاجة.......!!!!




الأربعاء، 30 سبتمبر 2009

بحبك أنت بحبك بس.

أجمل وأحلي أغنية سمعتها، أهداء لية من حبيبي اللي كاااااااااااااااااان



بحبك أنت بحبك بس، وحبك أكتر شئ يتحس.
بحب كلامك في شفايفك، وبحب القلب يكون شايفك.
بحب اخرج مني واجيلك، أنا حسة ان انت بتشتقلي، زي ما بشتقلك :)

هتفضل دي أجمل ذكري، وأجمل حب وأجمل مغامرة قابلتها من سنين، حبتها بكل ما فيها، بحلوها ومرها، بكل تفاصيلها بحبها.
بس برضة مش هتزيد عن كونها ذكري جميلة، لأنها فاتت، والزمن مبيرجعش لورا، ولا أنا..
لكن

هل هتفضل هي الاحلي علي طول.؟؟
الله اعلم هل في أحلي منها...؟
سؤال منتظرة أجابة الزمن علية.
بس بأقل مش هقدر اقبل

لأني اللي داق حلاوة العسل، صعب يقبل بطعم السكر......!!

أنــــا ده، أنـــا كده.. وانت المفروض تاخد علي كده.


أنــــا حـــــــــــــــــــرة
أنـــا حــــــــــــــرة
أنــــي أطيــــــر

و أرفـــــرف

كلي تحدي وشوق وحيـــــاة


يا عيون غلطانة في عنواني.

ياقلوب ملهاش في الأحساس.

الجمعة، 25 سبتمبر 2009

تجسس من باب الفضول



تخيل لو حد بيتجسس عليك، ويتابع كل تحركاتك، وكل نشطاتك عالنت مثلا، او في الحياة بشكل عام، وأنت مش بتعمل حاجة تخجل منها،وأنت متعرفش طبعا، هتعمل اية، او احساسك هيبقا اية...؟؟؟

طب تعالي نتخيل لو انت اللي بتتجسس علي حد ، والحد ده ميعرفش برضة،ومن باب الفضول بتتجسس علية، حتي لو علاقتك بالحد ده اتقطعت، تفتكر تعمل اية..؟؟

الغريب بقا ان الفضول ملوش نتايج مفيدة، حتي لو حصل واتجسست علي شخص، وحاولت تبقا عارف عنة كل شئ، تفتكر هتستفاد ايييييييييييييية..؟؟
سؤال يفرض نفسة خصوصا اذا كانت علاقتكم مستحيل ترجع :(
يبقا ليييييييييية برضة.؟؟؟

أنا عرفت الاجابة
لو أنت عرفتها اترك اجابة ولا تترد :) هاهاها

الخميس، 24 سبتمبر 2009

محدش عارف فين قدرة، ولا جي و واخدنا لفين.؟؟

حكايات بنعشها ونتعلم، وخصوصا اللي اتألم، ومحدش عارف فين قدرة ولا جي وواخدنا لفييييييييييييين..؟؟
بجد مسلسل وكلمات وحكايات ملهاش حل، واكتر حكاية لمستني في مسلسل حكايات بنعيشها، هي مجنون ليلي، لأنها بكل بساطة فكرتني بحكاية انا عشتها قريبة كتير في ملامح الحكاية دي، يمكن مش بنفس التفاصيل بس خدتني لحكاية فات عليها سنين، وبجد كانت من اجمل الحكايات اللي عيشتها وقتها ولحد اللحظة، لكن علي رأي جنات محدش عارف فين قدرة، يمكن بكرة اعيش قصة وحكاية احسن منها كتير align="center">دي كانت تتر المقدمة.

لكن دي تتر النهاية.




الأربعاء، 16 سبتمبر 2009

امــايـــا يـا مـــــــــــا..

امايــا يامــا شدى الضفاير ..شدى رباطها عصبينى

لو قادره يامــا تقيديها قيديها وقيدينى

شعورى موجه عماله تلعب عماله ترقص فوق جبينى...شعورى شوق وبشوقى حايره

لانـا عـارفه ماشيه ولا عارفه طايره

وكلام ف سرك وبقولها مُـره عذاب بحسه عذاب وثوره


امـايـا يا مـا جوايا ليل .. امـايـا يا مـا جوايا إيه ؟؟؟
جوايا حيييييييييييييرة جوايا ضلمة..

جوايا طير قلقان فعشه لا انا قادره اشيله ولا قادره اهشه

وكلام في سرك وبقولها مُـره عذاب بحسه عذاب وثوره
امايــا يامــا شدى الضفاير ..شدى رباطها عصبينى لو قادره يامــا تقيديها قيديها وقيدينى...


ااااااااااااااااااااااااااااااااااه يا مـــــــــا

الأربعاء، 26 أغسطس 2009

أنا وهي و...........


هي: انا مبقتش فهماكي.دلوقتي انتي واثقة ومتأكده ان الموضوع ميستهلش اصلا حتي التفكير، مش بس الاهتمام ..
أنا: يابنتي افهمي اصلا...
هي: افهمي اية ونيلة اية، هو اية اللي عايزاني افهمة، افهمي انتي بقا انتي اللي كسبتي، اللحقي قبل ما تبقي خسرانة، مش ده الموضوع اللي يستاهل اكتر من كده.اصلا انتي من الاول كنتي رافضة الفكرة نفسها، لأسباب كتير، كفاية ان الموضوع مفيهوش اي مقومات نجاح، والاهم مفيهوش متتطلباتك، لية بقا تبصي لردود الافعلا اللي بتحصل دي.اقفلي بقا الصفحة بنفسك وبأيدك.لأن لسة في مراحل كتير هتعدي عليكي في الموضوع ده، ولو من دلوقتي محسمتيش موقفك هتتدي الفرصة لغيرك يحسمة زي ما حصل قبل سابق
هي: انا عايزة اعرف دلوقتي انتي هتعملي اية.؟
القرار سهل خصوصا لما ادركتي انك مش هستفادي حاجة من الموضوع ده،لأكتر من مليون سبب، اهمهم انه موضوع منتهي، بخلاف انة مش مكسب ليكي، ولو كان هيضيف جديد، يبقا مش هيضيف اكتر من مجرد حالة وهتعدي.....
أنا: تصدقي فعلا مش راكبين علي بعض، ومينفعش اصلا..
يبقا الحل ان كل مرة اتحط في موقف المواجة اكون مجهز رد فعلي ولازم يبقا الاقوي، لأن المواجه هتبقا كتير الفترة اللي جاية، ولازم اكون مستعدلها، واكبر دليل علي انها هتبقا كتير الفترة اللي جاية، امبارح حصلت يبقا قابلة للحدوث مرة تانية
ربنا يستر
هي: انا حذرتك المرة دي ، بس مش هتكلم تاني، ولازم تحسمي الموقف ويبقا لصالحك، مش هينفع المرة دي تخسري الجولة اللي جاية، الجولة للي فاتت كانت مش في ايدك فطبيعي حسيتي انك خسرتي، بس للأسف انتي فعلا كسبااااااااااااااااااااانة كفاية بقا انتي نسيتي متجريش ورا الكورة خليها هي اللي تجيلك،، وهي جاية جاية، انا قلبي حاسس، وهتاخدي اي حق كان ليكي في الجولة اللي فاتت، وساعتها هتبطلي تتدي الموضوع اكبر من حجمةيلا كفاية كده حرقتيلي دمي يا شيخة.
هي: ناس مبتجيش غير باللعين الحمرة

هي: شوفتي مش قولتلك ادي ملحقش الكلام بينا يستوي والمواجهات بداءت سبحان اللهاصبري بقا لما نشوف اخرتها :)ولو مش دلوقتي الجايات اكتر مالريحات

خلصت الجولة و مخرجتش بنتيجة بس ده برضة حساة لصالحي، احسن برضة...هي: تصدقي فعلا انك مدية للموضوع اكتر من حقة :(مفيش فايدة اوف

هي: هو انا لية حسة انك اتغيرتي قويلية يعني بسبب الموضوع دههي: لأ بس بعيد عن الموضوع دهحسة انك بقيتي حادة قووووووووويونفس الموقف بيتكرر
أنا: تعرفي هي عندها حق برضة، بس تفتكري انتي كنتي متوقعة منها الرد ده.؟
تصدقي مجاش في بالي اطلاقا، بس يمكن اللي عاملة ده كلة بسبب اني نفسي انة يحصل، بس بقاوم رغبتي في حدوثة.
هي: طب اية هتعملي اية من اللي خيرتك فية.؟
أنا: مش عارفة هي حطتلي خيارات اصعب من بعض، بس عاجبني الخيار التاني، فيها راحة سواء بالسلب او بالايجاب، و مش هيأثر كتير علي موقفي،بس.
هي: بس اية تاني، انا حسة بتوهان عالفاضي.
أنا: والله انا كل ده علشان اخلص من المرحلة دي، مهو مينفعش افضل ساكتة وعاملة مش واخده بالي عن الموضوع، لحد ما يجي وقت يطلع لوحده وينفجر برد فعل غير متوقع من جوايا :(
مهو برضة وقتها هيبقا لازم علية اتحمل عواقب رد الفعل الداخلي الغير متوقع، ومش عارفة وقتها هايحصل اية..
هي: عموما احنا مش هنروح بعيد، كلها انهاردة ولا بالكتير عالسبت وانتي تعرفي هتعملي اية، بس ياريت تخلي بالك، انتي فرصتك في ان مراحل المواجة كتير، وعلي فترات قريبة قوي يعني سهل تحددي انتي عايزة اية وتلحقي تاخدي قرار.وربنا يستر
هي: بعيد عن الموضوع ده.هو انتي اية اللي خلاكي وصلتي للحيرة دي.؟
تفتكري المشكلة اللي عندك هي السبب ولا حاجة تانية.؟
ولا يمكن انتي اللي خلقتي المشكلة اللي عندك وبقت تسببلك قلق من غير داعي او بداعي، لدرجة انها بقت محور مشاكلك :(
مش عارفة
راجعة تاني لسة الموضوع مخلصش
بس كان لازم اثبت تفاصيل الموضوع