السبت، 23 يناير 2010

تعباااااااااانة قوي ..


اللي متابع مدونتي عارف ان في الوقت ده من كل سنة، ببقا في نفس الحالة دي...

اللي هي الامتحانات.

مش عارفة لية بس سبحان الله كل المشاكل مش بتحصل غير في الوقت ده، وزي ما يكون مفيش وقت لظهور المشاكل دي غير دلوقتي..!!

سبحانك يا ربي.

طب أعمل اية.؟

يعني اقول للمشاكل اصبري شوية لما اخلص امتحاناتي، ولا اعمل نفسي مش شايفاها...؟

حاجة تنرفز بجد، يعني انا دلوقتي ببقا في قمة عصبيتي، في قمة الضغط،وغصب عني، لأني مش بس بدرس، أنا كمان بدرس وبشتغل ، ومطلوب مني اني كل يوم اصحي بدري لشغلي، وبليل مذاكرة، وسهر ونوم متأخر، وصحيان بدري للشغل، طب اعمل اية....؟

بحاول اوفق بين كل ده لأني عندي أهداف عايزة احققها، لكن بجد مضغوطة، ومش عايزة ضغط زيادة علي ضغطي، كفاية علية الظروف اللي بمر بيها دلوقتي.
والمذاكرة بحسها دلوقتي تقيييييلة قوي، وضغط قوي :( وبحس الوقت بيجري قوي.
بحزن قوي لما بلاقي حد قريب مني، ميقدرش ده ويزود علية ضغطوة علية، في حين اني بحاول مضغطش علية في اي وقت في حياتة، بيصعب علية منه المعاملة دي..

اهو في الوقت ده تحديدا بحس بأني لوحدي ، مع العلم اني اكتر انسانة حوالية ناس كتييير، واغلبهم الحمد لله كويسين جدا، لكن مع ذالك تايهة لوحدي جوة نفسي، وجوة حياتي...

يمكن كمان تحديدا دلوقتي حسة بتوهان مضاعف، لأني بعيد ترتيب حياتي من اول وجديد، ومخنوقة من حاجات كتير، بحاول اخفف عن نفسي واطلع من كل ده، لكن غصب عني ببقا نفسي انفجر:(

مش عارفة لية دلوقتي حسيت اني جريت كتير قوي، في طرق كتير، لحد ما اكتشفت اني كنت بجري عالفاضي، او كنت بحط نفسي في مكان مش مكاني، او او او او ........ كتير قوي :(

مش عارفة دلوقتي رايحة فين وجاية منين .
غريبة قوي الظروف دي بجد اناحسة اني تايهة حتي في كلامي دلوقتي بتكلم من غير ترتيب ولا حتي تنسيق.
ساعات ايامنا تيجي علينا، بتخطفنا وتلعب بينا:(
ياااااااااارب