الثلاثاء، 20 أكتوبر، 2009

شاحن الذكريات ( وانهاردة بقول كانت ذكري وعشتلي يومين )


كنت زمان بقول بعد الحب ما ينتهي ( قالي الوداع وانا اقولة اية) لكن لما كبرت والدنيا دوبتني في حكايتها أكتشفت أن ( بكرة نقول كانت ذكري وعشنلنا يومين) فعلا دي الحقيقة واللي بيروح سهل يتعوض لو فكرنا انة سهل، واول ما نقول هننسا بننسا وعن تجربة ياما نسيت وما اتنسيت :)

انهاردة كتبت في البروفيل بتاعي عالفيس بوك الجملة دي وانا مقتنعة بيها قوي .....

بس بغض النظر عن كونها صح مية في المية او غلط مية في المية ، بس عالاقل انا حسيتها كده وجربتها في حياتي خلال التجارب اللي مريت بيها وبالأخص تجاربي العاطفية...
طول طريقي انهاردة من الشغل للكورس ومن الكورس للبيت، كنت بفكر في الكومنت اللي كتبتة ده..
بس بعد طول تفكير فعلا لاقيتها صح مية في المية لأني عشتها كده...

زمان فعلا كنت بقول ( قالي الوداع وانا اقولة اية هو الوداع يتقال في اية) كنت بعيش ايام سودة وبتعب قوووووووووووي وكنت بستغر من كل حاجة وبتخنق من اي حاجة بعد كل علاقة متكملش.

بس بعد فترة برجع اخد قرار اني انسي والحمد لله ربنا بيقدرني فعلا وبتناسا مش بسني قوي يعني كل ده علشان اقدر اكمل حياتي بشكل صح، بدون تعقيد، بعيد بقا عن الحب والتجارب العاطفية الغير مكتملة، كانت كلها محاولت فعلا بحاول وبقدر الحمد لله اني اكمل طريقي..

وبخرج من التجربة دي بكمية دورس، مهما كنت غلطانة مهما كنت مظلومة بصارح نفسي جداااااا، علشان اعرف فين الغلط وميتكررش تاني...
والحمد لله بتعلم علي قد ما بقدر، بس بيبقا جوايا جرح وحزن ان ازاي مكملتش، ازاي احط رهاني علي حصان خسران من البداية وانا معرفش، وحتي لو كنت عارفة برضة لية.
بس بعدين اكتشفت ان مش مهم لية وفين ومين...

المهم ان اعيش احلي ما في اللحظة...

يعني زي ما قال بالظبط ( واهو بكرة نقول كانت ذكري وعشنلنا يومين).....

( وانهاردة بقول كانت ذكري وعشتلي يومين )

فعلا انا انهاردة حسيتها قوي وانا بسمع الاغنية ويمكن ده السبب في اني اكتب الكومنت ده في الفيس بوك... لأني كنت بقول انهاردة انها مجرد ذكري وعشتلي يومين من اجمل ايام حياتي اللي فاتت ( لأني لسة معرفش اللي جي احلي ولا اية ظروفة كلة ف يعلم الغيب )

لية اضايقك نفسي مهما مريت بعلاقات غير مكتملة لية ازعل نفسي...عادي

كفاية اني عشت يومين بحب صادق من جوايا وده انا واثقة في جدااا حتي لو كان الطرف التاني محبش بصدق كفاية علية لحظات عشتها ولسة بعيش عليها....
من كل التجارب اللي مريت بيها علي مدار حياتي لحد انهاردة مطلعتش غير بلحظات وذكريات تشحن طاقتي طول الوقت
يمكن لأني مش بحب اعيش من غير حب، فطول الوقت بشحن قلبي بكل حب حتي لو علي ذكريات حب فات :)

ومين عالم يمكن نوع الشحن يتغير ويبقا شاحن بالمستقبل بدل شاحن ذكريات ده :)

هناك 4 تعليقات:

  1. ربنا يجعل ايامك الل جاية كلها سعادة يارب

    ردحذف
  2. الله ينور

    ردحذف
  3. علي فكره أحلي في الانسان ..
    انه بينسي ..
    وكتييييير ناس كانت بتقوووول انها مش ممكن تنسي ... ونسيت .. وعاشت بعد كدا حياتها عادي
    وانتي قولتيها ..
    " وانهاردة بقول كانت ذكري وعشتلي يومين "
    كفاية انك استمتعتي بيومين

    ردحذف
  4. المتئدر والمكتوب هو الكلمه الي لازم تتئال الي فيه الخير ديما ربنا هو الي بيختاره لينا ليه ما تئوليش انوا الوداع دى كان بمصلحتك انتي ممكن كان فيه عيوب كتيره مش تئدري تستحمليها مع المستقبل وكانت حياتك بئت سودى بزياده عن مهو بعدي عنك هلا تعرفي يا البي النصيب واحد والمكتوب واحد والادر واحد لو فكرتي كويس يمكن تلئيها رحمه من عند ربنا مش اكتر عيشي اللحظه وفكري بلي جاي مع كل تمنياتي لكي بئنوا الانسان الصح والي يفهمك صح ياخدك يا شيموا لانوا انتي تستهلي كل خير يا كميله انتي النسيان صعب بس التناسي اسهل سدئيني

    ردحذف