الأربعاء، 13 أكتوبر، 2010

حــوش اللي وقع منك..حد يقولي أعمل اية..؟؟

 حــوش اللي وقــع منك..قبل ما يتسرق منك..وخلي بالك ماللي معاك، لا كل حاجة تتضيع منك..واللي بتضيع منة حاجة مبترجعلوش تاني..وحاول تفوق بمزاجك بدل ما تفوق غصب عنك 
البوست ده دلوقتي ممكن ميكونش لة معني واضح...لكن مهم قوي بالنسبالي... خطوة مهمة في حياتي هتفرق كتير.
ومش عارفة ابتدي ازاي..لكن هكتبها زي ما اتعودت اكتب هنا في مدونتي (بمنتهي الحرية) والعشوائية برضة، لأن الموضوع ملخبط قوي جوايا....ونفسي الاقيلة حل فعلي...مش كلام وخلاص..لأن المشكلة أني عارفة عايزة اية وامتي ولية... وفي خطة مسبقة كمان بمنتهي الدقة علشان ابداء....لكن مبداءتش...!!!!
ودي المشكلة :((
أنا مضايقة قوي أني مش بنفذ..بخططلها لكن في حاجة بتشدني لتحت بعيد عن التنفيذ..انا عايزة اطلع مالغرقة دي..كده هموت...لو فضلت متعطلة بسبب عدم التنفيذ..كل ده برضة أنا عارفة وواثقة منة..لكن برضة معملتش حاجة....!!!


والعجيب..أن ربنا كل مدة يبعتلي رسايل كتير وكأنة بيقولي خلي بالك..لازم تنفذي..الوقت بيجيري ...ولو فضلتي مأجلة كلة هيروح..ومش هيرجع تاني :(
وسبحان الله انهاردة الكون كلة تأمر علية ... وبيوصلي رسايل من ربنا كتير قوي..وكلها لنفس الموضوع وبنفس المعني...!!!
بابا  الصبح..مديري بعد الضهر...صديقة مقربة .. صديقتي الانتيم...حتي الموبيل بتاع الشغل ربنا بعتلي رسالة علية,...بس دي كانت اقواهم كأنها قلم علي وشي..فووووووووووووووووقي بقي :((
كل ده في يوم واحد..وكلة لنفس السبب والمعني..حتي الفيلم الأحنبي اللي اتفرجت علية امبارح بليل..لما صحيت الصبح لفت نظري لنفس الحاجة وانا بفكر في الفيلم:((

ده سبحان الله كمان بعد ما كتبت البوست ده بفتح الهوم عندي عالفيس بوك ..... شوفت الكومنت ده مكتوب علي صفحة عمرو خالد


"Amr Khaled كن طموحا و لا تبالي بالصعاب:


و من يتهيب صعود الجبال ... يعيش أبد الدهر بين الحفر"

كل ده وبرضة مش بنفذ...لييييييييييييييية..؟؟
كسل....ولا قلة ثقة انها هتنجح...ولا قلة امكانيات.....ولا اية بالظبط..؟؟؟
أنا مكنتش كده...طول عمري بفكر وبنفذ..لية في الموضوع ده تحديدا فكرت فقط...!!!!
مستغرباني بشكل مخيف...الموضوع ده لو مبتدأتش في دلوقتي هبداء فية امتي..بقالي سنين مأجلة...لية مش عارفة..مشيت في طرق كتير...لكن هو الطريق الوحيد اللي لسة مقربتش منة..في حين انة احب الطرق لـ قلبي واسهلها علي الأطلاق..ونسبة نجاحي فية عالية جدااا كمان...وبرغم كل ده مش بداءت ....طب لية..!!!!


يااااااااااااااااااااااربي...اصعب مشكلة .... هي مشكلة الصراع مع النفس...أنا مبقتش فهماها عايزة مني اية دلوقتي....حاجة وسهلة وبسيطة اه هي محتاجة مجهود وشغل مضاعف....لكن نتايجها افضل من كل اللي بعملة بمجهود اكبر دلوقتي...طب مالي بقي ..!!!!


يارب ...... اللي انا بعملة دلوقتي ده اسمة تضيع وقت...حتي البوست ده برضة تضيع وقت..وأنا اساسا ضيعت وقت كبير في الموضوع ده....سنين فاتت وبتفوت وكل سنة بتزيدها صعوبة...أعمل اية في نفسي....خايفة لية..؟؟


المرة دي المواضيع كلها اتكركبت فوق دماغي.....ولازم لازم لازم اعمل حاجة مفيدة..لازم لازم لازم اخد خطوة بجد...مش هينفع كل مرة كلام..المرة دي الموضوع اصبح لا يحتمل التأجيل او المماطلة...او حتي الخوف...والأصعب ان كل يوم بيزيد صعوبة مع تأجيلي له...!!!!


القطر بيجيري وبيفوت علي جميع المحطات..وعربية فرصتك قدامك ياتركب ييفوتك قطار الفرص..لأنة لا يجبر أحد علي الركوب........يارررررررب دبرني..واهديلي نفسي....حد يقولي اعمل اية فيها اللي مغلباني معاها دي :( .!!!!!!!!!


مش مهم تعرفوا اية الموضوع .... لكن المهم أني اعرف اية الحل مع نفسي لية بتعمل كده دلوقتي....كل حاجة سهلة وجاهزة...مش ناقص غير كلمة رد فعل قوي مني وابداء...!!!!!!
ماذا تفعل لو كنت مكاني :(

هناك 8 تعليقات:

  1. لازم تتوكلي على الله ..

    وما تفكريش كتير..

    لأن التفكير بيخليكي تدققي .. ويعطلك اكتر عن التنفيذ..

    شدي حيلك وتوكلي على الله.. وما تستنيش!

    .. ملك ..

    ردحذف
  2. إستخيرى الله ..كتير

    هو هيهديكى للخير .. وخدى قرارك ونفذيه ومتتراجعيش ..

    وبس :)

    ردحذف
  3. شيماء

    عارفة احساس ان الامتحانات فاضلها أسبوع مثلاً ولا أسبوعين وانتي لسة مبدأتيش في ولا مادة؟
    عارفة الإحساس ده؟

    متهيألي انتي دلوقتي في المرحلة دي
    حاسة ان الوقت سرقك ولازم تعملي حاجة "دلوقتــــــي"
    ودي حاجة كويسة على فكرة


    ساعات كتير لازم نحس بالخطر علشان نتحرك
    علشان نعمل حاجة مأجلينها
    أو حاجة خايفين نعملها


    مش عارفة هو ده كسل بس ولا خوف كمان من عدم حدوث النتيجة المرجوة

    لو كسل بس .. استغلي إحساسك بالخطر وابدأي حالاً بأي حاجة حتى ولو انك تجهزي بس الحاجة اللي انتي عايزة تعمليها أو تكتبي ليها خطة بالورقة والقلم "بالتواريخ" وتحديد اللي انتي عايزة تخلصيه منها في كل يوم ولو تقدري تخلي تاريخ البدء دلوقتي اعملي كدة

    ممكن متخلصيش الكم اللي انتي محدداه في الوقت اللي انتي محدداه
    عادي
    بس هتكوني استفدتي انك اخدتي خطوة البداية وأعتقد دايما دي بتبقى أصعب حاجة
    لأن طول ما انتي مبدأتيش بتكوني باصة للحاجة من برة على إنها حاجة كبيرة وتقيلة
    بس لما تبدأي هتبقي إلى حد ما دخلتي جواها وهتشوفي الدنيا أبسط شوية

    ولو خوف من ضياع وقت ومجهود من غير تحقيق النتيجة اللي انتي عايزاها
    أعتقد حتى لو لا قدر الله ده حصل هتكوني استفدتي برده


    حاسة اني رغيت كتييييييييييييييييييييير
    بس يارب اكون قلت حاجة تفيدك


    *

    Crazy Lovely ;)

    ردحذف
  4. شوفوا برغم اني عارفة كل كلمة قولتوها من ناحية الأستخارة او اني ابداء ومخافش..او زي كلامك الجميل كلة يا رودي
    الا اني مبسوطة قوي ان حد شاركني اللخبطة اللي انا فيها..أنا معتبره كلامكم ما هو الا رد من ربنا علي حيرتي ولخبطة..بعتلي الرد علي لسانكم

    اشكركم وطبعا اولا بشكر ربنا علي نعمة انة بيرشدني الحمد لله
    وربنا يقدم اللي فية الخييييييييير
    ادعولي ابداء لأن دي اهم خطوة يارب

    ردحذف
  5. كل مرة ياشيماء بحس انك بتتكلمى بدالى
    بس انتى قولتى اللى وقع منك فمتبكيش على اللبن المسكوب
    وكملى اللى فى ايدك يا تشترى واحد جديد
    ومتنسيش
    هدف بعيد +عزم شديد
    جهد جهيد + استقامة لاتحيد
    = نجاح أكيد
    شوفتى أنا مذاكرة ازاى ؛)

    ردحذف
  6. اهم شياء التوكل على الله ومن يتوكل على الله فهو حسبه وطبعا صلاة الاستخارة عليكى بيها وخدى رأى المقربين ليكى فلا خاب من استخار ولا ندم من استشار وبعد ما ربنا يهديكى للخير ما تخفيش من حاجة ومتتردديش

    ردحذف
  7. بهديكم بوكيه من الورورد على أنغام أحلى عود ودايما العيد عليكم يعود كل سنة وانتم دايما بخير

    عيد سعيد على كل الناس الطيبين

    ردحذف
  8. للاسف كلنا كدة
    يمكن فى حاجة غلط
    يمكن اهلنا ماعلموناش الحياة صح
    يمكن احنا مش عاجبنا اى حاجة
    ومابنرضاش باى حاجة
    وماعندناش خبرة فى اى حاجة
    وبنمشى بدماغنا لانها مريحانة
    ومابنسالش اللى اكبر مننا
    مع اننا عارفين ان اللى اكبر منك بيوم
    بس احنا بنتكبر على مافيش
    وماشيين فيها زى ماتيجى تيجى
    دلوقتى احنا عايزيين الايام تجرى عشان نخلص
    نخلص من المشاكل اللى مابتخلصش
    نخلص من حياتنا اللى مالهاش لازمة
    نخلص من الصاحب اللى عاوز يطلع من صاحبة باى مصلحة
    نخلص من الناس اللى مابتحبش الخير لحد
    اااااااااااااه يانى
    hamdi_elabd@yahoo.com

    ردحذف