الجمعة، 30 أكتوبر 2009

ربنا حب يطبط عليكي بطريقتة،، الحمد لله

رايح مشوارك وفي نفس السكة ركبت غلط، طبيعي تهت، ومبقتش عارف تعمل اية، وتيجي تتدور علي اللي يدلك عالطريق الصح يتوهك اكتر واكتر ما انت تايه....
وبعد ما تفقد الامل في كل السكك وكل البشر، تلاقي حد طلعلك من حيث لا تحتسب، ويجي في عز الوقت اللي فقدت فية الامل في انك تعرف توصل للمكان اللي عايز تروحة،،،يشدك ويقولك يلا انت مستني اية تعالي انا كنت هموت وانا جيلك يلا اركب معايا( طبعا انت مزبهل ومتنح وبتقول هو في اية، والف علامة استفهام .؟؟؟ ) لأن الشخص ده ولا كان يخطر علي بالك يجي المكان ده، والاهم انة كان اخر حد ممكن تفكر في ويساعدك علشان توصل لطريقك :)
الغريب بقا اللي بيدور في ذهنك في اللحظة دي..
اية ده سبحان الله اكيد ماما دعتلي امبارح لما كنت بدردش معاها عن مشاكلي واضايقت علشاني فدعتلي من قلبها :(
طب ما ممكن يكون المساعدات اللي بتساعدي الناس فيها بدون مقابل، فربنا حب يجازيك عنها ولاقيت رصيد عند ربنا يساعدك ، وتتكل علية ( كما تدين تدان).
وكل ده وانت مش عارف الف استنتاج في دماغك....
بس المهم ان في الاخر كل ما تفتكر تقول الحمد لله، اللهم استخدمني ولا تستبدلني،،، لأن مردود العطاء غير المشروط كل يوم بيزيد ويزيد في رصيدك عند الله....
ووقت ما تضيق الدنيا بيك تلاقي السحب عالمكشوف لدرجة انك بتسحب وانت مش متخيل ان حسابك ممكن يغطي كل ده
الحمد لله..
طب بلاش دي...
حد كان نفسك يبقا في بنكم صداقة، وطول الوقت الحد ده متجاهل احساسك ده وانك نفسك تفتح معا كلام، ومن كتر ما انت نفسك وهو مش مهتم، انت زهقت ونسيت وبعدت، وسبحان الله في نفس اليوم اللي كنت تاية في وربنا ساعدك برصيدك ، تلاقي الشخص ده هو نفسة اللي بيدور عليك علشان يتكلم معاك ويفتح بينكم صداقة ...
طبعا مليونين تلاتة علامة استفهام اكبر واكتر من اللي فوق :)
بس ملهاش تحليل غير ان احساسك وصلة، من كتر ما كان نفسك توصلة، وهو وصلة كل الاشارات اللي بتدل علي رغبتك في انك تكلمة، وكلمك بمجرد ما انت بداءت ترخي حبل الرغبة علشان تسيبة، اللي كان رابطك بي :)
سبحان الله برضة كلة في يوم واحد...
طب بلاش دي كمان
حد كنت كل يوم تنتظرة يكلمك وكنت محتاج تتكلم معا قووووووووووووي لدرجة انك كان ناقص تقول يا اخي ارحمني وتعالي بقا انا زهقت ومنتظرك بفارغ الصبر.....بس برضة لأن مفيش امل في انة يستجيب من طلباتك الداخلية للشخص ده بتبعد عن الموضوع، وتتجاهل الشخص ده...
لكن بقا العجيب انة يظهر في الوقت اللي انت خلاص مبقتش محتاج تتكلم معا ورغبتك شبة اختفت في انك تكلمة لأن الشخص اللي فوق سبقة وكلم الشخص اللي كان فقد الامل فيكم انتم الاتنين هاهاها
يعني اللي سبق اكل لنباء.....
وبرضة وقتها تقول الحمد لله، لأن علي الاقل لما كلمتة حسيت ان مكنش في داعي تتكلم معا في الاول، وبقا الكلام بشكل عادي....
طب بلاش دي كمان خالص...
حلم حلمتة طول عمرك وفضلت تكبرة جواك، ويكبر مع كل يوم في عمرك، ويعلي ويعلي، لكن بدون اي نتايج ولا اي دليل انة هايتحقق خالص، وانت رضيت بالامر الواقع وقولت برضة هكمل في طريقي يمكن يجي اليوم اللي اقدر احققة في، وتيجي فرصة تساعدني احققة....
بس مع ذالك كل الفرص بتشدة لتحت بعيد عن حلمة، لكن في نفس الاتجاة اه بعيييييييييييد لكن في نفس الاتجاة، وفجاة وبدون مقدمات في عز اليأس اللي وصلتلة والخنقة والسواد اللي غطا عيونك، تلاقي نور جي من بعيد يقولك كمل طريقك متستبعدش الطريق
كلة بأونة هتوصل كمل كمل،،،، والدليل انك هتكمل هو انك دخلت مكان كان ه حلمك، وبقيت شايفة قدام عيونك بس لة ملمستوش لأنك مش متأكد انة بتاعك انت ملكك، وان هو ده اللي بتعمل كل ده في حياتك علشان توصلة....بس هو جالك لحد عندك بس لسة مأكدش عليك ان انت صاحب الحلم ده.....
وبرضة كلة في نفس اليوم سبحان الله.
طب بلاش دي كمان
لما تلاقي الدنيا اسودة في عينك بسبب موقف ما، ويجي صاحب نفس الموقف ويحاول يوصلك ان الدنيا رمادي مضايقش نفسك، وانت تستغرب بشدة وتبقا مزبهل برضة هو في اية...؟؟؟
بس سبحان الله برضة تحس ان ربنا جنبك خطوة بخطوة انهاردة....
برغم ان امبارح انت كنت خلاص وصلت لمرحلة انك اتخنقت من كل شئ، وحسيت ان كل حاجة جاية عليك..
بس علي رأي لومي( ربنا حب يطبط عليكي بطريقتة)
الحمد لله
بس برضة بقول ان دي حلاوة دعوتك يا امي بجد
ودعوة حد لية بظهر الغيب
وفي كل الحالات الحمد لله علي كل حال :)

هناك 7 تعليقات:

  1. لما تكونى مسافرة للعمل
    (برياً)وواخدة عزالك كله
    ومعاكيش حد تعرفيه وسبحان
    الله يطلعلك من تحت الارض من يسخر
    نفسه لحمل شنطتك و(عزالك كله)ويوصلك
    لحد بر السلامة بدون أجر الا الدعاء بالخير
    بظهر له ولكل من مثله: يبقى ايه؟
    يبقى عمل خير عملتيه بدون انتظار أجر
    يبقى دعوة والدتك لكى بالستر فى كل مكان
    يبقى حاجات كتير حلوة ملخصا ان ربنا (رحمن رحيم)

    ردحذف
  2. عندك حق جداااا
    الحمد لله ان ربنا فاكرنا مش ناسينا
    وبجد اليوم ده فرق في حياتي كلها :)

    ردحذف
  3. الحاجه الوحيده .. اللي ممكن تبعد عن حد أذي ممكن يحصله .. هو الخير .. وانتي يا شيموو قدمتي خير كتييييير لناس ماتعرفيهاش .. مابالك بناس تعرفيها ,, يعني قدنت خييييير كتير لكل اللي حوليكي ومن غير مقابل .. فأكيد عمر ما ربنا حيخزلك لما تحتاجي حد يساعدك .. دا ربنا بيقول للعاصي .. لما يعمل ذنب ويتوب عنه .. عبدي سترتها عليك في الدنيا وساسترها عليك في الاخره .. ربنا رحيم أوووي بالعاصي ..
    مع بالك بشخص .. سخر حياته كلها لخدمه الناس ..ومساعدة الناس .. يبأي ربنا حيعمل ايه معاه .. وعلي فكره ربنا لما بيدي للعباد حاجه بيدي للعبد حاجه أكتر من اللي طلبها .. وانتي قولتي كدا ..
    ربنا يحبب فيكي خلقه يا شيمووو .. ويساعدك في طريقك اللي جاي ..

    ردحذف
  4. السلام عليكم يا شيكو

    تعرفي بجد أنا بؤمن بـ "ضاقت ولما استحكمت حلقاتها فرجت وحسبتها لا تفرج" لما تضيق قوي قوي يبقى أكيد في مخرج واسع قوي قوي

    بس بجد انا مبسوطة من الاحاسيس اللي قلتيها دي

    مع اني يمكن مش فاهمة حاجة "وان كنت لسة مبطلتش العادة بتعتي في التخمين الفاشل"

    بس تعرفي حتة الحلم اللي يجيلك وانت مش متأكد انه ليك فكرتني بالمقال اللي كنت كتباه في مدونة المنتدى بتاع مبحبش أعمل زي الناس

    المقال ده بقى كان فيه رد للبركة عوزاكي ترجعي تقريه تاني يمكن يفيدك بحاجة

    مع السلامة يا قمري

    ربنا يقدرلك الخير ويهديكي ويهديلك العاص

    ردحذف
  5. شكرا جداااا يا وسام علي كلامك وبجد ربنا يكرمك :)

    ردحذف
  6. وانتي يا حاجة نوسة مش لاقية حاجة يابنتي
    ياريت تحطيلي اللينك هنا ينوبك ثواب احسن انااحوليت :)

    ردحذف
  7. ربنا بيدى كل واحد على قد ما بيعمل يا شيمو حتى لو بعد فترة لانه ربنا عادل وكريم ومهما اجرك اتاخر وحسيتى انك زهقتى ومفيش فايدة هييجى يوم ويترد لك كل خير عملتيه وربنا اكيد مينساش عبادة وبيفرحهم اوى.

    ربنا يحلى عمرك ...

    ردحذف