الثلاثاء، 30 ديسمبر، 2008

شكر واجب ، مني ليكم..

أنا جييييت

يا ولكم ياولكم ، فينك يا شيخة من زمان، من ايام الذكريات اللي اتحذفت...؟؟!!

لا بس كنت براجع شوية حاجات، وبغير وبعدل شوية محتاجات..

اممممممممممم ، طب  خير واية الجديد بقا، طمنيني..؟

مش عارفة اقولك في جديد ولا اقولك في تغير ، ولا نقول مجرد تعديل، او كنا بناخد جولة  من الداخل، علشان نعرف نظبط الخارج...
طب تمام ( ولو اني مش فاهمة اية الجديد يعني)
ها اية رأيك بقا بعد الجولة اللي اخدتيها من الداخل، وصلتي لحاجة، ولا لسة في جولات تاني..

مبدئيا لازم نتفق ان طول ما في نفس داخل ونفس خارج، يبقا اكيد في جولات تاني وتالت ومليون، لان في حاجات صعب تبقا كاملة..
بس بالنسبة لسؤالك، اقدر اقول اني طلعت بشوية حاجات ومحتاجات، كتير، منها اللي غير نظرتي وتقديري لشوية امور، ومنها اللي خلاني اتمسك بالثوابت اللي في طريقي، برغم اني لاقيتها شبهة مستحيلة..

طب ده اعتراف يتحسب عليكي ، مش ليكي، بانك عارفة انها شبة مستحيلة...

لا مش يهمني بقا يتحسب علية او لية، المهم اني شايفة اية اللي مناسب لحيايتي ومستقبلي وعارفة اية اللي مش مناسب، مهو مش كل اللي الناس هتتفق علية يبقا مناسب لحياتي وشخصيتي..
بس ده بيقول انك لسة متمسكة، بمبداء الاصرار علي رأيك برغم كل المعارضة اللي حواليكي، لبعض افكارك...؟؟
اعتقد هو كده، بس خليني برضة اعترف ان في بعض الشخصيات اللي قابلتها، بجد بجد خلتني اغير من اعتقتادتي السلبية، وابدل مكانها اعتقاد ايجابي، وده بجد لية اهمية في حياتي، واالاحلا انو اكد جوايا باقي اعتقداتي اللي كانت اصلا من البداية الحمد لله ايجابية..
اممممممممم طب خلينا كده ناخد احنا كمان جولة بسيطة عن الناس اللي اثرت فيكي خلال الجولة دي...

اوك انا موافقة ومنها بقا اني اقدملهم زي رسالة شكرا علي كل حاجة اكتسبتها منهم..

بس خليني اوضح الاول، اني اتعرفت عليهم خلال السنة دي، اللي هي فاضل فيها ساعات وتنتهي، يعني نقول حصر لمكاسبي وخسايري في معرفة الناس خلال الفترة 2008

وانا سمعاكي اتفضلي قولي،واحصري كل اللي تحبي تتكلمي عليهم..

تعرفي في اللحظة اللي قولتي فيها اني اقولك اسماء الناس دي واستفدت باية منهم، تهت قوي..
لية ..؟؟
مش عارفة مشاء الله السنة دي حسة ان الناس اللي عرفتها ، كانت مكسب ليا، بغض النظر عن الناس اللي بجد مش حسة ان كان ليهم لازمة قوي في حياتي بس اكيد ليهم لازمة حتي لو كانت سلبية..
بس عموما انا هقولك اللي بجد علي بالي حاليا، واتمنا مش انسا حد ولا ادي حد حق اقل من حقة..

نبتدي بالتسلسل، يعني من بداية اللي عرفتهم حتي الان..
الفيس بوك
نقول من خلال دخولي عالم الفيس بوك، ده في حد ذاتة مكسب ليا، لاسبب بسيطة قوي، من خلال الفيس بوك اتعلمت كتير جداااااا، في حياتي العملية والعليمة،( بغض النظر عن اللي فعليا اتعلمتة من النت نفسة) وده بيقول ان كل شئ بنستخدمة سلاح ذو حدين، يعني من خلالة عملت جروب ليا اسمو لكل من يعتقد انة فاشل، ومن هنا بداءت معرفتي بالناس اللي هذكر اسمائهم..
سهي
نبتدي ببنوتة اسمها، سهي هي من الاردن، وكانت مشتركة في الجروب، من خلال الجروب بداءت بنا النقاشات واتعرفت عليها، ومن خلالها عرفتني علي منتدي اسمو يوم جديد، وكان كل معرفتي بالمنتدي ده هو توبيك باسمها..
سجلت في، وقريت التوبيك وخرجت ولم اعدها تاني...
عدت الايام، ولاقيت سوسو الامورة اللي هي اخت سهي بعتالي مسج مع اختها وعايزة تتعرف عليا، طبعا قبلت بدوان تردد...
من سهاد بقا عرفت كل الناس اللي بعد كده...
في البداية سهاد كانت حلقة الوصل بيني وبين سهي بعد ما علاقتنا بداءت تنقطع مع الوقت ومع بعد سهي عن النت شوية..
وعلاقتي بالبنوتة سهاد بجد كانت علاقة كلها مرح قووووي

يعني اية كلها مرح وضحي بقا تقصدي اية بكل اسم هتذكري، او الاصح استفادتي اية من الشخصية دي..
اوك 
سهاد، اتعلمت منها المرح، خفة الدم، اني مهما اكون مضايقة بمجرد ما اكلمها، احس ان في حاجة كده زي بيبي صغير قعد في مكان بياخد المكان من روح البيبي ده، من هزار وضحك وتهريج، حتي لو كنت مهموم..
بعد تعرفي علي سوسو، عرفتني علي شخصية كان ليها دورمهم في حياتي، بالرغم من انو كان تقيل علي قلبي اساسا، ( هههههههه
بس يعني اتعرفت علية وخلاص علشان سوسو قالتلي انها تعرف الشخصية دي، اشترك في الجروب، وبعد الجروب، قالي علي قسم يتعمل في منتدي يوم جديد زي الجروب، فوافقت وخلاص، عملتة وخلاص برضة، لدرجة ان اساسا المنتدي كان تقيل علي قلبي زي الشخص ده تماما...
الشخص ده عامل بالظبط زي ، القرش المدفون في التراب، ( اقصد وقت ما اتعرفت علية) زي اللي لمعتة رايحة بسبب التراب المتراكم علية، اللي هو تقلة علي قلبي...
ما علينا نسيت ، وبقا كل العلاقة بية كل فترة كبيرة، وهي اني اسئلة علي شئ في المنتدي، او اخد رأية في مشكلة في المنتدي، المهم ان العلاقة كانت مقتصرة علي المنتدي لا غير..
بعد فترة مش كبيرة قوي،ومش صغيرة قوي( وبجد بندم علي الوقت الضايع ده كلة) بداء يبقا في كلام ، وشوية شوية، لاقيت ان اية ده ، الشخصية دي بجد طلعت حد يستاهل انك تسمعلة، ده بيقول كلام لية وزنة وقيمتة، ده حد طلع بيفهم ، وبيعرف هو عايز يقول اية، مش مجرد  حد بيرغي وخلاص، المهم بعد فترة بقيت فعلا بحس ان ده حد ينفع مثلا لو في مشكلة استشيرة فيها واعرف رأية، واعرف منة اية الصح واية الخطاء...
ولحد اللحظة دي اكتر شئ محتاجة اني اعملة بعد الجولة الداخلية، اللي عملتها، هو اني اقتبس من الصفات المميزة اللي في الشخصية دي، واتعلمها كويس، واطبقها، برغم ان الحمد لله في بعض الحاجات، لاقيتها عندي ، بس معليش الطمع وحش، يعني طمعت في اللي ناقصني وعندة..
 وبشكرة جدااا علي ذوقة وسماحة ليا اني اقتبس من صفاتة المميزة واضيفها لشخصيتي..
الغريب ان هو في نفس سني، ويمكن اكبر مني بشهور بسيطة، لكن العجيب في الموضوع ، اني بحسة اخويا الكبير، حد تقدر تعتمد علي رأية، وتسألة ، وتاخد برأية من غير ما تفكر، ده بقا اللي بعتبرة، الحكيم، اللي لما تحتاج لحد يفيدك بخبرتة ، هتلاقية، بس اللي مش طبيعي ان هو في نفس سني، طبعا ده مش بيقول ان اللي في نفس سني، يبقا مش بالضرورة يبقا حكيم،لكن نقول انو عقلة اكبر من سنة، علي الاقل في نظري..
 او نقول حكيم بذكاء، وده اعتقد افضل وصف له..
وطبعا بعد كل الرغي ده، مش ينفع مقولش هو مين
اكيد الرومانسي الاخير، اللي هو محمد رشدي..
شكرا يا محمد

ونرجع لباقي الناس، من خلال المنتدي برضة عرفت بنوتة نقول علية، طفلة في ثوب شابة في مقتبل العمر، اعتقد ان ده افضل تعليق يتقال عليها، بنوتة بتلف حوالين نفسها زي البيبي التايه، ( هههههههههـ مش بتريق بكلم جد) توهانها بين الممنوع والمرغوب، حلاوتها في برأتها، طيبتها، طبيعتها، اكتر شئ اخدتة منها هو ، تلقائيتها، برغم اني مش اخدتها كلها منها، الا اني اخدتها في بعض الامور، ممكن متصدقيش لو قولتلك اني بحسها بنوتي الصغيرة، هي والبنوتة سهاد...
برغم اني اوقات بحسهم اعقل مني بكتير، برغم فارق السن اللي بينا، بس بجد دخلو حياتي حسسوني بنوع جديد من الصداقات مكنتش اعرف عنو حاجة..
او الاصح ، دخلو بنشاطهم وسنهم، وبقيت استمد منه حلاوة الحياة..
من خلال نوسة بقا اللي هي دورنا طبعا، عرفتني علي باقي الناس ، وخلوني احتك اكتر بالمنتدي اللي اصلا مكنتش حبا قوي، بس مع الوقت الوضع اتغير، بقا زي حب عشرة، بقا ليا اصحاب،وناس حبيتهم، وحبيت كتاباتهم في مدوناتهم، هي دي بقا نقطة الانطلاق...

ايوة من المدونات  اللي في المنتدي، بداءت انطلق كده، واجري زي االبنوتة الصغنونة، في حديقة مليانة اللعاب، وبعدين تلف تلف وترجع تبص تلاقي بنوتة عسولة برضة وقعت في وشي، اسمها رضوي، مرة لاقيت محمد حاطت وصف علي مدونتها، عند في مدنته، بجد انا شايفة ان ده اكتر توصيف منطبق عليها، اللي هو (جنون قلب "بين أحلام السنابل و قيود العقل تحتار صاحبه هذه المدونه") هي دي رضوي
اخدت منها حاجة جميلة قوي، يمكن هي مش مركزة فيها، هي الغموض اللي هي اصلا بتقول علية انا اللي في بداية تعرفها عليا في المنتدي، كنت بنت غامضة، لكن فعلا مكنتش كده، بس انا حسيتها، هي اكتر اللي فيها نسبة من الغموض، وسعات بحسة غموض مطلق..( طبعا بغض النظر عن هل الغموض ده حاجة حلوة او لا)
بس استفدت منها برضة، شكرا يا رودي

عرفت حد تاني بس ده بقا عرفتة برة المنتدي، وجبتة معايا للمنتدي، لاني حسيت ان ده حد طييب ويصلح لدخول المنتدي، اللي مليان بالناس اللي عرفتهم، وهو أحمد راضي
في البداية اسمة مقترن باسمي، لية بقا لان اسمي شيماء راضي، ودي صدفة بحبها قوي، لان لما يبقا ليك اخ اصغير منك في العالم الافتراضي اللي هو النت اعتقد بتبقا لذيذة، يعني ليا اخوات كتير ، وبجد بحبهم قوي..
بالنسبة لأحمد، 
حد جواه كوكتيل، غريب بين الطيبة ،النشاط، الانفعالية، حاجات كتير تحسها غريبة، بس اهم شئ في ومهم جدااا، انو ذوق، ومتربي، ودي بتبقا حاجة صعبة شوية تلاقية اولا في حد في نفس سنة،وكمان في شاب في عالم النت..

اللي اخدتة منة، بجد اولا، عن طريقة عرفت يعني اية سياسة مكنتش بركز قوي في الامور دي، بس اكيد مش زيو، بس نقول بشكل افضل، من الاول، منة عرفت الطيبة، والحنية، بجد حنين قووووي، ربنا يحمية يارب...

شكرا يا أحمد...

حسة اني نسيت حد ، بس لو افتكرت حد تاني ، اكيد هرجع بجد واشكرهم، بس اية رأيك..؟؟

تعرفي بجد انا بحسدك عليهم،..؟؟
لية.؟؟
لانك عرفتي ناس نقاء وصفاء، ودفء عائلة جو النت، وده مش سهل تلاقية..
الحمد لله

والف شكر، لكل حد ذكرت اسمة، او حتي نسيتة، بجد استفدت كتير منكم، وربنا يوفقكم ويكرمكم، وبتمنا بجد ان مهما الدنيا اخدتنا بأنشغالها، مش نبعد وننسا بعض، وحتي لو حصل، صدقوني، عمري ما بنسا اللي اثرو في حياتي بالشكل ده....

الف شكر

هناك 5 تعليقات:

  1. بسم الله الرحمن الرحيم
    السلام عليكم ورحمة الله وبركاته

    بجد سعيدة جدا إني أول تعليق
    ربنا يخليكي لينا يا رب (ويخليني ليكي) قولي آمين
    بجد أكتر حاجة أنا كمان حبتها من النت هي العائلة الصغيرة اللي طلعت بيها
    و إن كنتي أخدتي الفكرة (شبه اللي كانت على بالي) مني لكن برضه فكرتي لسة في دماغي وعن قريب إن شاء الله أفصح عنها
    و بجد اللي عجبني إن إحساسك بيا هو كان نفس إحساسي بيكي (هتفهمي قصدي لما أوضح فكرتي بعد كدة إن شاء الله

    و اللي أحب أقوله بجد
    إن كنت أنا أفدتك في حاجة فإنتي بجد ومش بهزر أفدتيني في حاجات ياما بجد ربنا يكرمك ويحميكي ويباركلك في عمرك يا رب و صحتك

    وروحي ذاكري بقى وبطلي ضياع وقت

    ردحذف
  2. بسم الله

    الله اكبر

    شكلى هدبح على الصبح كدا ... ههههههههههه

    اولا ... ربنا يسمحك على الخضة اللى اتخضيتها من الاوف لاين بتاعك ...

    ثانيا ... انا شكلى كدا لازم اتصل بايطاليا تقطع النت عشان الناس اللى وراها مذكرة تذاكر بقى :D

    ثالثا .. والله يا بنتى انا مش عارف اقولك ايه .. انا كل دا .. ايه يا بنتى دا .. بس هقولك ايه مش جديد عليكى .. كلك ذوق ودا الطبيعى بتاعك

    وانا بقى بقولك ..

    ما استفديش منك بحاجة .. حتى الربع جنيه مش عايزة تدهونى ..اهئ اهئ اهئ

    اختى شيماء راضى .. مش عارف اقولك ايه اكتر من انك بجد اختى .. مش اى كلام يعنى .. مش عشان البوست دا .. اعتقد انتى عارفة كويس ..

    وفوقتنى من شوية حاجات كدا .. قلة الثقة اللى كانت عندى .. ولفتت انتباهى للتنمية البشرية ..وكفاية انها عرفتنى على منتدى يوم جديد .. وبرده اللى كنت مش طايقه فى الاول هههههههههههههههههههههههههه (( اخوات اخوات يعنى حتى فى دى )) هههههه

    ويا شيمو انا بجد والله مش عارف اقولك ايه بجد ..

    فاكرة اول مرة اتعرفنا فيها على بعض
    كانت بسبب توبيك ((اللمة)) وبعد كدا الاسرة اللى اشتركنا فيها سوى

    وهختم زى ايناس

    اجرى ذاكررررررررررى بقى (( بس دى ليكم انتوا الاتنيين )):D

    ردحذف
  3. هههههههه خجلتني يا بنت انا تاني اسم ياي اول حاجه لولا روحك الحلوه بحياتي ما كنت افكر اعرفيك ههههههههههههههههههههههه انت اختي الكميله الي بحبها والي مجنيناني ربنا ينوليك كل الي في باليك يا رب يا وزتي مش عارفه اتكلم يا بنت بجد اجمل عيله كل الي اتكلمتي عليهم يستحقوا الشكر لانهم عيله جميله اوي واحلا ما فيها انوا كلنا البنا على بعض بنفرح مع بعض بنحزن مع بعض انا الي بشكرك يا البي مش انتي لانك اجمل واطيب بنوته عرفتها بحياتي وحبيتها من البي موووووووووووووووووهو مش تدايئوا على الوليه هيا واخده راحه من المذكره نص ساعه تهيس يا ولاد

    ردحذف
  4. ماشي ماشي بقي انا كان دمي تقيل علي قلبك وااااااااااااااء

    عموما يعني انتي فاكره اكيد اللي قلتهولك في ساعة الذئب عن الفتره دي و مش هعيده ان الله حليم ستار P:

    ميرسي يا فندم علي الكلام الجميل ده و ربنا يديكي دايما علي قد نيتك

    ردحذف
  5. هههههههههههههههههههه عسول التوبيك على بعضه وكلامك صح في الوصف اللي وصفتيه لسوسو ومحمد ونونو واحمد برغم اني مقربتش منه قوي ومعرفتوش زي الباقيين

    بس انا مازلت مصممة إني مش غامضة أو بمعنى آخر مش شايفة نفسي كدة خاااالص
    بس عموماً طالما انتي شايفة كدة يبقى اللي تشوفيه والعفو يافندم وعدي الجمايل بقى هههههههههه انتي عارفة طبعاً احنا أهم حاجة عندنا راحة الزبون D:

    ردحذف