الثلاثاء، 30 يونيو 2009

الحمد لله، من أهم انجازاتي حتي الأن

اذا وجت عالم فلا تتركة من غير ما تستفيد علي قدر ما تسطيع.
العالم عالم بجهلة.
الحاجة اللي كنت قولتلكم عليها من كام يوم اني منتظرة تحقيقها الحمد لله حصلت، لكن مبقتش حاجة واحدة بقت كذا حاجة، خليني اشاركم فرحتي، واعرفكم اية اللي حصل.

اولأ: الحمد لله والشكرة لة اني بقيت من ضمن فريق عمل دكتور ابراهيم الفقي ( رائد التنمية البشرية في الوطن العربي) ده طبعا شرف لية اصلا، والحكاية بداءت من خلال جروبي في الفيس بوك( لكل من يعتقد انة فاشل) كلمني فريق عمل الدكتور وطلب مني احضر المقابلة مع الدكتور، علشان يبقا في تعاون مشترك بينهم وبيني من خلال الجروب..ده مختصر اللي حصل، والحمد لله وافقت وقابلت الدكتور، وبداء الشغل من شهر، الحمد لله، وبجد كان اجمل انترفيو حصل في تاريخ حياتي لجد دلوقتي زي ما قولت في تدوينة الفرصة :)


ثانيا: ودي بقا الاهم وكلة يركز لأنها اقوي من الاولي بمراحل كبيرة، واقوي من اي حاجة ممكن اقولها، الحمد لله بفضل ربنا وبسبب الشغل مع الدكتور، دخلت دبلومة من اقوي الدبلومات في التنمية البشرية اللي هي ( دبلومة الممارس المعتمد للبرمجة اللغوية العصبية) المعتمدة من المركز الكندي للدكتور ابراهيم الفقي..
دي طبعا لايمكن حد يتخيل يعني اية انا اطحت في التجربة دي، دي تحول في حياتي فتح مجالات واسعة في عالم النجاح.
عارفين يعني اية يعني انا اخدة شهادة من المركز الكندي بكندا

بتقول ان

يوم 30/6/2009

شيماء راضي ابراهيم

بقت ممارسة معتمدة للبرمجة اللغوية العصبية ( يعني ابقا مدربة زي دكتور ابراهيم ومعتمدة كمان)

الحمد لله
جايز لسة باقيلي شوية خطوات تأكيد علي الشهادة لكن دي اهم خطوة واقوي خطوة، ودي مش سهلة.

مش عارفة اقول اية، يمكن في كلام كتير مش عارفة اعبر بية عن فرحتي، دي حاجة كبيرة قوووووووي، دبلومة اخدة مني اسبوع، شغل ليل نهار، اجهاد، وتعب، انقطاع عن شغلي، جي في وقت صعب قوي، وقت امتحاناتي، يعني كمية ضغوط لا يمكن حد يتخيلها، لكن برغم كل الظروف دي الحمد لله اخدة الدبلومة،والحمد لله وصلت لحاجة لايمكن كنت اتخيل اني اوصلها، وكلة بفضل لله ثم بفضل تشجيع الدكتور لية، وربنا يباركلة يارب، ويديلة الصحبة بجد ادعولة ده راجل عالم بجد، وفعلا هو هدية من الله للبشرية، فعلا زلزال متحرك من العلم، كنز مفيد للجميع، تأخذ منة ولا ينتهي مهما اخدت زي البحر بالظبط، يمكن كل ماتاخد منة يزيد اكتر واكتر مشاء الله علية.




كفاية انة من كتر تواضعة قال
ان العالم عالم بجهلة
شوفتو قمة التواضع

انا بحترمة جدااا، انة برغم تعبة ده، وبرغم اننا اجهدنا بكتر اسألتنا الا انة لا يبخل علي اي حد فينا، مهما كان سنة او مهما كان تعبة، ربنا يشفية يارب.
عارفين يعني اية اخر يوم في الدبلومة واحنا نازلين يسلم عالبواب ويحضنة ويبوسة، قبل ما يمشي، الله علية بجد الله علية وعلي تواضعة وذوقة..
الراجل ده من اقوي الناس اللي اثرت علي تفكيري وحياتي، حتي من قبل ما اقبلة..ربنا يباركلة يارب..
بحترمة قوي، واحترمتة اكتر لما شوفتة، وشوفت قد اية كان حريص كل الحرص، علي اداء الصلاة في وقتها، اثناء المحاضرات..ناخد بريك صلاة ونرجع، دي كان لية معني جميل قوي منة، وتاثير اقوي علينا
قد اية اتكلم علي الله بشكل تاني غير اللي المعتاد نسمعة، شكل يخليك مقبل علي كل العبادات بحب واخلاص، اكتر من اي وقت..قد اية بينشر فينا احساس بالامل والتفأول من غير ما ينقصة اي امل ولا تفاؤل..

قبل ما اروح الكورس، كنت بقرا لية كتير، واتفرج علية اكتر، وبسمعلة كتير، لكن انك تقابلة، الاحساس بيختلف جداااااااا، وكفاية تشوف البسمة اللي مرسومة علي وجهة، واحساس الدفء في المحاضرة ، وروح الدعابة اللي فية، ودبلوماسيتة، وذوقة في التعامل مع المشاكل اللي حصلت في اثناء المحاضرات، بينهي المشاكل بمنتهي البساطة، والهدوء..
انسان متواضع بشكل غير عادي، مفيش اي نوع من انواع التعالي، ولا الكبر بعد ما وصل لكل المراكز دي..هفضل ادينلة بأنة كان من اول الناس اللي قدرت تحرك تفكيري، وتغيرة، من بعيد لبعيد..
يمكن لو فضلت اتكلم اكتر من كدة، يبقا مش هبطل كلام وهيبقا زيادة كمان عن حدة..لكن فعلا الراجل ده يستاهل اكتر كمان.
عارفين اخر الدبلومة، عملنا زي تتدريب عالاسترخاء علشان خاطر الضغوط اللي الواحد بيمر بيها طول اليوم، عملنا التدريب، وبعديها بجد كلنا فقنا الحمد لله، لكن حسينا قد اية الراجل ده روحاني، ملوش حل، دخلنا في حالة من الاسترخاء والراحة النفسية، وحصل زي اللفة بينك وبينة، كنت عايز تخلص وتقوم تحضنة وكأنة والدك، وبجد كتير مننا بكا علشان خاطر انة جية علي نفسة وبرغم تعبة ومأثرش معانا في التعلم والعلم من كتر ما انت حاسس انة ادالك علم سنين في دبلومة، ومن كتر ما كان عايزنا نتعلم كل حاجة ونستفيد.

وفي اخر الكورس طلب مننا ان لما نخرج من هنا نعمل 3 حاجات
*****************************
1- نفتح مكتب استشاري ونفيد الناس بالعلم اللي اتعلمنا، ونساعد علي الاقل 5000 شخص لوجهة الله.
2- نكتب كتاب نعلم الناس فية ازاي ينجحو ويتعلمو النجاح.
3- نعمل دراسات عالية في المجال ونزود معلوماتنا وخبراتنا...

الحمد لله علي كل حال، والحمد لله علي النعمة دي احمدك واشكر فضلك يارب، وحبة تشاركوني فرحتي ونجاحي الحمد لله..
بحبكم قووووووي ومبسوطة قوي..
ونفسي تتدعولي ربنا يستر علية في امتحاناتي، لأني فعلا تعبانة، وتعبت فوق ما حد يتخيل، كمية ضغوط قوية في فترة مش ينفع فيها كل الكربسة دي، بس الحمد لله النتيجة مرضية بالنسبة لية، من اهم انجازاتي الحمد لله.

هناك تعليقان (2):

  1. الله الله الله الله الله عليكي يا شيمو
    بسم الله ما شاء الله عليكي يا قمر بجد انتي رهيبة موت ربنا يحفظك ياااارب ويديلك كمان وكمان علي قد نيتك يااااارب تصدقي يا شيمو انتي بجد حبيبتيني في الراجل ده جداااااا وخلتيني متشوقة اسمعله واتفرج عليه عشان اعرفه بجد لوما اني عمري ما سمعتله بس بجدكلامك عنه شوقني اني اني اتفرج عليه جدااا يا قمراية
    بجد يارب يوفقك في الامتحانات ياااااارب
    وينجحك يااااااارب بأذن الله يااااارب ان شاء الله يا قمري
    بجد انا عمري ما شوفت حد بالانجازات الجميلة دي ياقمر
    وان شاء الله توصلي لمراكز اعلي واعلي واعلي يااااارب
    في رعاية الله يا قمر
    mOlita

    ردحذف
  2. بسم الله ما شاءالله ....
    شيماء بجد وبدون مبالغه انت حد فوق الوصف ....ويارب تحققي الي بتتمنيه...
    ""انا بدعيليك اهو زي ما طلبتي يا مشمشه ""
    بجد والله من قلبي وبدعي لكل الشباب الطموح اللي زيك...
    عارفه يا شيماء انااول ما قرأة كلامك ..حسيت بحاجه بتتحرك تحت جلدي ...عارفه لما جسميك يأشعر كده ...دا كان احساسي بجد ...انا بحب دكتور ابراهيم بالفعل بالرغم من اني محصليش لشرف والتقيت بيه (ودا لعدة اسباب)لكن بعد كلامك بقي عندي رغبه غيرطبيعيه في اني اقبله ......واكيد اقبليك انت كمان ... بالتوفيق يا مشمشه
    ..معتز..

    ردحذف