الجمعة، 10 يناير، 2014

جواهرجي


 جسم الست عموماً مافيهوش حتة أحلي من الدايرة اللي بتدوب فيها الرقبة مع الكتف
 حتة تعرف قيمتها الست الشيك
أنا جواهرجي أبن جواهرجي
جدي الأكبر كان بيتاجر في الياقوت الأحمر أيام احتلال الإنجليز، وأختلف مع جنرال علي صفقة، فنفاه الجنرال علي الصعيد، وهناك بدأ يكون عيلة من الجواهرجية.

أنا من الجيل الأخير متفرغ للمهنة تماماً وعندي 3 محلات واحد في وسط البلد، واحد في المعادي، والتالت في الدقي واتحرق من 3سنين، كانت حريقة جامدة كَلت البنت اللي واقفة في المحل بعدها جددته، وأشتراه مني واحد عملة محل فسيخ كبير.!

كنت بلبس سلسلة دهب لحد الحادثة دي ما حصلت، رُحت مغيرها بواحدة فضة، بعدين أكتشفت إني مابحبش السلاسل أصلاً.!
زبايني معظمهم ستات
الجميلة بعرفها من صوابعها والذكية من ذوقها في الأساور
 البنات اللي بتحب الحلقان غالباً بيكونوا طيبين
والمغرمة بالبروش دايماً نفسها تكون أحسن من كده 
الحقيقة جسم الست عموماً مافيهوش حتة أحلي من الدايرة، اللي بتدوب فيها الرقبة مع الكتف، حتة تعرف قيمتها الست الشيك، وبتبقي حريصة تغطيها بـ كوليه ألماظ.
يقدر يداري آثار السيوف المجنونة اللي عدت من نفس الدايرة
مش محتاج حد يحبني قد ما أنا محتاج حد يصدقني، وأكره الوضوح في التعاملات تهمني الدقة.
خجول قدام الزبونة اللي عندها وجهة نظر، وخجول برضة قدام الزبونة التافهة
ومابكونش علي طبيعتي غير قدام الزبونة اللي مش عارفة هي عايزة اية.؟
هي دي زبونتي المفضلة
 بعرفها من علي الباب وهي داخلة، ونظرتها بتلمع ولمعانها مجروح زي الدهب الابيض
شغلانتي خلتني قادر أميز بين اللمعة الأصلي واللمعة المزيفة، وخلتني أعرف أوزن اللي قدامي كويس، الموديلات الزاعقة بتقفلني، وتجنني التصميمات البسيطة، وأسقف للفكرة في أي حته دهب حتي لو مش حاببها
أشتغلت فترة بسياسة الفتارين، الناس بتحب في الأول تتفرج من بعيد لأنها بتخاف من الحاجة اللي ماتعرفهاش، وبتفكر كتير لأنها ياما أشترت غلط
بس الفتارين وقعتني في وجع دماغ ناس بتخبط علي الإزاز وتجري، وناس بتدخل في الفاترينة بوشها وإيديها، وتسيبهم لي للذكري علي الإزاز.
وناس عايزة تتفرج عليك مش علي شغلك، وده غير إنه بصراحة الفتارين دي اتسرقت كتير...!
 ودلوقتي بشتغل عالضيق زبايني بقوا قليلين بس أصلين
زبايني تقيلة بيظهروا علي فترات بعيدة

بس في كل مرة بيثبتوا لي إن الدهب لسة غالي

عمر طاهر

هناك تعليق واحد:

  1. تحليل للشخصيات رائع وتديونة رائعه ومافى اجمل من الدهب

    ردحذف