الأحد، 21 مارس 2010

مش لاقية عنوان

بقالي فترة كبيرة مكتبتش حاجة هنا في مدونتي.
يمكن لأني وانا بغير القالب اتلغبط مني، ومضايقة من شكلها لأني مش عارفة اظبطها تاني زي ما كانت.
او يمكن لأني خايفة ادخل اكتب حاجة تاني هنا، لأني بحس هنا بحرية مطلقة، لا قيود منتديات، ولا فيس بوك ولا أي شئ تاني.
فخايفة اتكلم بحرية، لدرجة اني اقول كل اللي جوايا، اصلا اللي جوايا تاعبني قوي.
معرفش انا حسة اني مش طايقة اي حاجة ولا اي حد ولا اي شئ بعملة في حياتي، معرفش لية وصلت لكده، برغم اني بتقدم كتير...!!!
أنا حسة دلوقتي اني مش لاقية نفسي، تايهة قوي، تايهة لدرجة اني مش عارفاني، مش شايفاني، مبقتش حساني، بقيت كمان بهرب مني...!!
بهرب من حاجات كتير تعباني بس مش عايزة اقولها، حاجات خنقاني، بس مش عايزة اسمعها....!!
حتي دلوقتي وانا بتكب مش عايزة اكتب عايزة اسكت...!!
ايوة صمتي كلام كتير، وكلامي ولا شئ...!!

هناك 9 تعليقات:

  1. معلش يا شيماء ده نوع من عدم التوازن بيحصل لاى حد
    فتره و هتعدى و ترجعى احسن
    و بعدين انا موجوده لو محتاجه اى حاجه فى مدونتك

    و اتكلمى بحريه احسن مطقى و تتخنقى

    ردحذف
  2. اقولك على حاجة..........جربى تدخلى أوضة لوحدك افتكرى أكتر تلت حاجات كانوا بيفرحوكى ونتى صغيرة بعدها فكرى انتى لسه بتعملى الحاجات دى ولا لأ؟ طب الحاجات دى مبقتش بتفرحك ولا لسه قلبك فيهم؟؟
    ليه عشان تعرفى انتى توهتى من نفسك والدنيا نسيتك تفتكرى الحاجات اللى بتحبيها ولا انتى بس فى حالة عدم توازن؟؟؟؟؟
    يا رب متيقاش الأولانية عشان دى صعبة قوى

    ردحذف
  3. تعرفى...انا من كام يوم كتبت بوست لنفس المشكله..إحساس بجد وحش والغريب انك بتكونى مش عارفه توصفيه لحد ..بس ربنا يفك كربك يا حبيبتى وهى بس مرحله وهتفوت واللى جى بعدها هيبقى احسن ..

    ردحذف
  4. يا عمري ياشيماء........

    أعتقد الحاله الي فيك حاله طبيعية وتجين حتى انا من فتره لفترة لأن الأنسان دايم محتاج يقعد مع نفسه شوي .يسمع له وهي تسمعه له...لكن ضغوطات الحياه دايما تخلينا بعيدين عن انفسنا ولحظات تمر ونعيش كما يريد الأخرون وليس كما نريد نحن وأنتي ماشالله عليك ياشيمو ما اعتقد انك من هالنوع

    بس انتي محتاجه ترتاحي شوي وأحسن شي روحي واقعدي لحالك بمكان هاديء واذكري الله واقري قران وااكثري من الأستغفار وبعده راح ترتاحين اناشالله
    وتحسين براحه مو طبيعيه......والله يريح بالك والله معك اناشالله وكل مسلم ......

    أختك: ســـلاف x x

    ردحذف
  5. بكرة تحديدا هتبقى كويسه بكره مش الكلمه المطلقه لعموم المستقبل لا انا اقصد بكره الاثنين او بالكثير الثلاثاء

    هقولك حاجة يا شيماء لو فهمتيها هتبطلي تسألي لما تجيلك الحاله دي

    الفرح نسبي
    و الحزن نسبي

    مش عارف فهمتي عايز اقول ايه ولا لا ؟؟؟؟!!!!

    ردحذف
  6. بسم الله الرحمن الرحيم
    السلام عليكم ورحمة الله وبركاته

    مصدقتش نفسي وفرحت جدا لما لقيت مدونتك على الرييدر عندي أول واحدة ومعنى كدة انك كاتبة بوست جديد

    جيت جري وعلى أمل اني اكون أول تعليق

    زعلت قوي لسببين
    أولا ان في قبل 5 علقوا
    ثانيا من الحالة النفسية اللي بتمري بيها

    ربنا بفك كربك يا رب ويريح بالك ويهديلك العاصي ويسعدك ويسترك دنيا وآخرة

    قولي آمين

    بجد حقيقي وحشاني جدا ولسة سألة رضوى عليكي قالتلي انها مش بتخرج من البيت ومش بتشوف حد هي كمان

    ربنا يهدي سرنا يا رب ويفرجها علينا من عنده ويسعدنا دنيا وآخره يا رب

    وحشتيني بغباااااااااااااااااء

    وفي الآخر صحيح كنت هنسى
    القالب زي العسل يا آنسة

    ردحذف
  7. بصى كلمتين اجمد من جريدة كاملة

    المشكلة كلها فى اننا اتليهنا فى الدنيا بحلوها ومرها

    ونسينا وظيفتنا الاساسية وهيا اننا نعبد ربنا

    ونسيسنا كمان ان الى بيقرب من ربنا الدنيا كلها بتتسخر لة

    انا مش شيخ بس مريت باكتر من كدا ووصلت لاشد نوع فى الاكتئاب وجربت حجات كتيرررررررررر جدا والله ما نفع غير الرجوع لربنا وهو اكرم من اى حد هو الى خقلنا وقادر على كل شئ وربنا يرحمنا يارب برحمتة ونخرج من الدنيا دى بسلامة

    ردحذف
  8. ربنا يهدي سرك يا شيماء يا عمري وينولك الي في بالك ويديكي راحت البال يا عمري مبروك عالتجديد حلو اوي ووحشتيني اوي اوي

    ردحذف
  9. امممممممممممم

    انا بصراحة مش متاكد اذا كنتى هتشوفى التعليقات اللى هنا فى المدونة ولا لا ؟؟

    لان الناس اتكلمت وقالوا بجد كلام حلو اوى

    لكن يا شيماء .. فين ال نقطة ومن اول السطر

    راحت فين ؟؟؟

    مش عارف بس اكيد انتى عندك سبب لانك تعدى كل دا بتكتبى فىاحداث وكتابات ومشغولات الجملة بقيت طوووووووووووووووووووووووووويلة

    ودا هيفقدها طعمها .. فين المبتدا والخير .. فين الكناية والتورية والسجع

    كله هيروح .. كله هيفقده طعمه .. ومحدش هيقدر يعرب الجملة .. حطى نقطة لو سمحت وابتدى من اول السطر

    ردحذف