اسئلة ملهاش اجوبة

البوست ده ملوش اسم ولا معني ولا اي حاجة غير اني عايزة اقول فقولت...
شوية اسئلة في حياتي ملهاش اجوبة..

كنت مضايقة انها مكملتش...بس اتبسط انها مكملتش...لأنها لما مكملتش زادت غلاوة وقيمتها بقت اكبر...
انا عايزة اقول كلام كتير مش لاقية منة ولا كلمة جوايا عايزة تتطلع...بس عايزة اتكلم اقول...بس اقول اية.؟؟ولية...ولمين..؟؟
طب انا قولت اني عايزة اقول بس ازاي اقول وانا مش عارفة اصلا اقول اية.؟؟
طب خلاص هقول اللي يجي علي بالي..وربنا يستر من بالي

أنت...أنت دخلت حياتي لية...وكنت عايزة تتدخلها اصلا لية...طب لما انت مش مهتم بتكلمني طيب لية...!!!
أنت....بستغربك لما انت خلاص بقيت لغيري بتدور علية لية...وعايز مني اية..؟؟؟
أنت...لما أنت قدرت تكون اقوي...وبقيت تقدر...مكنتش أنا لية...؟؟
أنت...وحشتني...وأنا موحشتكش..؟؟
أنت...مش أنت بس دأنت وكلكم ليييييييية..؟؟

أنا...أنا كنت بقول حاجة...وبعمل حاجة...وبفكر في حاجة تالتة خالص...بس لية..؟
أنا...لما كل ده جوايا وكل ده حوالية...لية جوايا بعيد عن برايا..؟؟
أنا...وحشتيني قوي لدرجة اني زهقت من بعدك عني...طب ماتقربي خايفة لية مني..؟؟
أنا...ازاي بتحمل ينساني واجيلة..يسقي بنات الدنيا الا أنا...؟؟
أنا...بيجولك وانتي بتروحي لمين...؟؟
أنا متعرفيش غير تتدي...ولية مش بتاخدي ولا حتي بتحاولي...؟؟
أنا...ازاي بتتحملي كل اللي بيحصل وانتي ساكتة...؟؟
أنا...اخرة سكاتك اية...اه ياخوفي من شر الحليم اذا غضب..ها يا أنا...؟

أنتي..رايحة فين...وهتوصلي لأية...؟؟
أنتي...حققتي اية لحد دلوقتي...؟
أنتي...خايفة ولا مش خايفة...؟؟
أنتي...طب لو خايفة..أخرت خوفك اية...؟
أنتي...لو مش خايفة...هتقتدري تتحملي الثمن..؟
أنتي...جواكي كتييييييييييييير..وخايفة من كل اللي جواكي..ويوم ما فكرتي تبطلي تخافي..بهرتي كل اللي حواليكي...طب لية هتفضلي خايفة..؟؟
أنتي...هتفضلي تتدوري لأمتي...هتفضلي تحاولي لأمتي...هتفضلي تقاومي لأمتي...هتفضلي تستني لأمتي....؟؟
أمتي هاتيجي يا أمتي ...؟؟

أني خيرتك فختاري....؟؟

أنتي...وأنت...وأنا ...كلنا ...هاااااااا واخرتها...؟

شيماء راضي

خلطة مش منطقية....

خلطة مش منطقية....

تعرف اية عن المنطق يا مرسي......؟؟
" أنك تقع متحطش منطق "

بالظبط فعلا هي دي المنطقية...طب ولو اخدنا المعني ده وجبنا عكسها تبقا اية....؟؟؟
انك تقع وتحط منطق...طب هو أنت لما تقع هيبقا لسة فيك نفس تحط منطق...؟؟؟
طب بفرض طلعت فيك نفس وحطيت منطق....هتنطق تقول اية...؟؟
بس اية ده أنا نسيت...هو أنت لما تقع وتحط منطق...هتحطة فين..؟؟
طب انت اصلا اية اللي يخليك من البداية تقع وتحط منطق...او متحطوش...؟؟
وقعت بمزاجك..؟؟؟
وقعت غصب عنك...؟؟
هي دي القضية بمزاجك ولا غصب عنك....؟؟
طب بفرض وقعت بمزاجك...هل محتاج حد يطبط عليك ويحسسك انك ياعيني عليك وقعت محتطت منطق.؟؟
طب لو وقعت غصب عنك..ومحطتش منطق برضة وغصب عنك.....اومال أنت دورك اية...؟؟

ياااااااااااااااه ده المنطق ده طلع موضوع كبيرة...وانا مكنتش واخدة بالي منة....بس لازم اخد بالي من دلوقتي...علشان اعرف لما اقع هحط منطق ولا بدون منطق..؟؟
أنطق ولا افضل بدون ما انطق:((
ولا أطق
لأ طب ولية...هي الدنيا دي متعرفش الحلول الوسطية...ولا هو يا ابيض يا اسود......؟؟
طب انا جربت اقع قبل كده بمزاجي...بس لأنة بمزاجي قدرت احط منطق...وبمنتهي الصعوبة والسهولة اللي في الدنيا....
طب المرة دي اية بقا..؟؟
أنا وقعت علي حين غفلة مني :((
ومحطتش منطق برضة علي حين غفلة مني....
بس قادرة اقاوم وأكمل....كل ما سقط سهوا :((

بس في حاجة بتتسرب من بين ايديا...مش منطقية خالص..مشكلتها انها مش منطقية..حلاوتها في عدم منطقيتها....

لــــكــــــــــن...

مش كل اللي بدون منطق حلو للأخر..وكل شئ ولية أخر....

وزي اي شئ أخر :((

و

مش كل اللي بدون منطق وحش للأخر...وكل اخر ولية شئ...

زي اخر اي شئ :))

في حاجات في حياتنا مش محتاجة تتمنطق علشان نحس بيها....ممكن نحس بيها قبل ما نمنطقها....المهم نلحقها قبل ما تفوت...لأن اللي بيفوت مبيرجعش تاني...وهي اصلا لوحدها هتفوت بس لية ومين اللي هيفوتها....معرفش بس الأكيد أن الواحد محتاج يلحقها قبل ما تفوووووووووووت :((

خلطة مش منطقية.....بس وجودها احيانا بيبقا مهم....برغم انة وجود مش منطقي...:)

زي احتياجك للخلطة المش منطقية بتاعت دولسيكا عسلية (الايس كريم) في عز الحر :))

شيماء راضي

عيشها ملك ماتكونش كتابة...

تخيل معايا كده....
يوم حار مشمس مولع نار، درجة حرارتة 45 فيما فوق...يوم مرهق متعب ممل ملزق، كل القرف اللي في الدنيا اتجمع في اليوم ده....مفيش تكيف، راضين وساكتين في مروحة ، ومستحملين، اهي حاجة تهون الجو الفوق الفظيع ده...وفجأة وبدون مقدمات النور يقطع..طاطاطاطا....كارثة معضلة في ظل الظروف الصعبة المستحيلة المميتة دي...درجة حرارة 45 فيما فوق، نور قاطع ....يعني انتحاااااااااار......

طب نقول الحمد لله ونعديها وشوية والنور هيرجع تاني متقلقش...(وأنت نازل تصبير في نفسك،لحد ما نفسك قرفت منك ومن صبرك) وشوية وتكتشف ان الوقت فات كتير قوي، اكتر من ساعة وشوية ، والأمور بتصعب اكتر وأكتر...

ومع ذالك انت مستحمل، حتي وانت شايف ان الوقت عمال يعدي وانت بتصبر في نفسك وتقولها ان شاء الله النور جي، اصبري اصبري....وتصبر وتصبر وتلاقي النور رجع تاني ...تقول ياااااااااااه الحمد لله تاني....بس اول ما تبص في الساعة تلاقي فات ساعتين، ويادوبك باقي نص ساعة من اليوم وينتهي، ولازم طبعا تلحق تنام علشان عندك شغل الصبح...بس لسة في حاجات كنت عايز تعملها قبل ما اليوم يفوت....

وتلاقي نفسك بتقول طب اسهرلي ساعة كمان، وتتنازل عن ساعات نومك مقابل انك تخلص اللي عندك....وطبعا هتقوم متأخر، وطبعا الجو لسة حر، وطبعا المواصلات مرهقة ومتعبة، وطبعا عندك مشاوير بعد الشغل، وطبعا نفسك تنام، وتعوض اللي ضيعتة بليل، وطبعا وطبعا.........وهكذا

يوم مقرف مش كده....بس مع ذالك متقدرش تقول غير الحمد لله، وتعديها ، لأن لا بأيدك الجو يبقا بالبشاعة دي، ولا بأيدك ان النور يقطع، ولا بأيدك برضة انة يرجع متأخر.....!!!!

بس بأيدك تقول الحمد لله...بأيدك تتعايش مع اللي بيحصل، بأيدك تقول يااااااااااااارب، وهو قادر علي كل شئ....
م حقك تبكي، من حقك تصرخ، من حقك تشتكي، لكن مش من حقك تيأس..ولا تسيب كل حاجة وتجري وتبيع القضية....

ممكن تهرب من المشاكل دي في حاجة مفيدة، لكن من وقت للتاني حاول تحل المشاكل دي حتي لو مكنش لك يد فيها، اه هو متعب، بس تعب التعب راحة، وراحة الراحة عذاااااااااااااااااااااااااب..وعذاب قاسي قوي...

في عز اليوم المتعب ده فكرت في حاجة، لأمتي هفضل اقع واقوم انفض هدومي واسند نفسي بنفسي، واكمل طريقي اللي كلة مكسر ومش مسفلت ولا مفروشلك ورد....طبعي ميعرفش اليأس، ولا يعرف كسل، كل اللي يعرفة ا ن اي مشكلة لها حل، حتي لو حل مؤقت، حتي لو الحل اني اتعايش مع المشكلة...

بس بيجي وقت واحس ان الأمل والصبر بيسألوني هترحمينا امتي، استهلكتينا لدرجة اننا بنستوردة من كل البلاد اللي حوالينا، عمالة الدنيا تكسر فيكي وتهدك، وانتي مصممة تتمسكي بيها، وفيها وتكملي بكل العيوب والبلاوي اللي بتحدفها عليكي....؟

ارد بكل هدوء واقولها،،،كلة علي الله...وربك لما يريد الصعب بيتهون، والحزن بيتلون، ولا شئ يبقا بعيييييييد....

كتير بسأل نفسي اللي بينتحر ده بيفكر في اية يخلي يقرر قرار زي ده...الأنتحار.؟
ارجع واقول اكيد هو مش عندة ولا حبة صبر ولا حبة أمل، ولاحبة ايمان بالله وبقدرة....
بس ارجع واعذرة قوي، واقول مش كل الناس عندها القدرة علي تحمل مشاكل الحياة، ولا البلاوي اللي بتحدفها الدنيا علينا...
لأن ممكن كل واحد فينا يفكر في الفكرة دي (فكرة الأنتحار للتخلص من مشاكل الحياة) بس مش كلنا بوصل لأننا ننفذ القرار الخطير ده...

وحقيقي الجملة دي حسيتها طالعة من جوايا قوي...
رحلة يا رحلة يا صعبة يا سهلة، دا لولا فينا صبر لاهان علينا العمر...


وأخيرا

الدنيا بتعاندنا، واحنا كمان لازم نعاندها، لأن لو محصلش هي اللي هتكسبنا،،،،
وافتكر دلوقتي كلمة رنت في وداني وانا في الحالة دي....

لما الدنيا تضلم هاتنورلك تاني لما الدنيا تكشر راح تتضحكلك تاني لما الدنيا تقفل هاتفتحلك تاني لما الدنيا تجرح راح تداويك من تاااااااااااااااااني...دنيا ملك وكتابة صادقة لكن كدابة...

عيشها ملك ماتكونش كتابة

الحمد لله.....

اسمع بقا دي علشان توصلك فكرتي بالظبط :)

ملحوظة: لو هتسيب تعليق قول اسمك علشان أعرف مين نور مدونتي :)

شيماء راضي

مدونة حياتي...الحمد لله

أخيرا حياتي رجعت من جديد :)
المدونة بقالها كتير قوي مقفولة بسبب ان القالب كان في مشكلة..وانا الحقيقة كنت بكسل اصلحة...بس بالصدفة بفتح قولت اظبطة سبحان الله اتظبطت من اول قالب.....ياسلام لو كل مشكلة في حياة الواحد تتحل كده، يسبها ولما يجي وقت حلها تتحل لوحدها بأذن الله طبعا :)

الحمد لله
وحمدلة علي سلامة مدونتي...ومكاني اللي بتنفس في عن كل اللي جوايا بدون قيود ولا خوف...

ياريت كل اللي كنت متابعة مدونتة يجي يعلق كده ويسبلي رابط المدونة بتاعتة، لأن كل شئ راح مع تظبيط القالب...خير ان شاء الله كلة يبقا احسن....وحتي اللي مكنتش متابعة مدونتة، وحابب يعرفني عليها يحطلي الرابط هنا علشان نبقا جيران ونتعرف علي بعضينا زي زمان

:D

وربنا يجعلها اخر مرة تتقفل كل الوقت ده... لأن بقالي كتير قوي قافلاها...