اجمل تجربة مرت في حياتي

يوم من عمري
يوم غيرلي مجري تفكيري ،اد اية مبسوطة باليوم ده، احلي قرار اخدتة، بجد اني رحت الكورس ده..
اللي هو (القائد المحترف، والمعتمد دواليا من المركز الكندي).
جايز محدش هايحس بكلامي، وهيستغربة، لكن اللي كان جوة التجربة هيقدر قيمتها، كفاية ان ليها تاثير غير ملموس، لكن قوووووي جدااا، في حياتي..
من اول لحظة دخلت فيها الكورس لحد اللحظة اللي خرجت منها وانا بجد مبسوطة قوي، النتيجة حسيتها وانا داخلة القاعة..
ربنا يبارك في دكتور ابراهيم الفيقي، ويديلة علي قد عملة ونيتة، وبجد ده شخصية هدية من الله للبشرية..
بحترمة قوي، واحترمتة اكتر لما شوفتة، وشوفت قد اية كان حريص كل الحرص، علي اداء الصلاة في وقتها، اثناء المحاضرات..
ناخد بريك صلاة ونرجع، دي كان لية معني جميل قوي منة، وتاثير اقوي علينا..
قد اية اتكلم علي الله بشكل تاني غير اللي المعتاد نسمعة، شكل يخليك مقبل علي كل العبادات بحب واخلاص، اكتر من اي وقت..
قد اية بينشر فينا احساس بالامل والتفأول من غير ما ينقصة اي امل ولا تفاؤل..
قبل ما اروح الكورس، كنت بقرا لية كتير، واتفرج علية اكتر، وبسمعلة كتير، لكن انك تقابلة، الاحساس بيختلف جداااااااا، وكفاية تشوف البسمة اللي مرسومة علي وجهة، واحساس الدفء في المحاضرة ، وروح الدعابة اللي فية، ودبلوماسيتة، وذوقة في التعامل مع المشاكل اللي حصلت في اثناء المحاضرات، بينهي المشاكل بمنتهي البساطة، والهدوء..
انسان متواضع بشكل غير عادي، مفيش اي نوع من انواع التعالي، ولا الكبر بعد ما وصل لكل المراكز دي..
هفضل ادينلة بأنة كان من اول الناس اللي قدرت تحرك تفكيري، وتغيرة، من بعيد لبعيد..
يمكن لو فضلت اتكلم اكتر من كدة، يبقا مش هبطل كلام وهيبقا زيادة كمان عن حدة.. لكن فعلا الراجل ده يستاهل اكتر كمان...
لحد هنا انتهي الكلام عن الكورس اللي كان يومين فقط يوم 12-13/3/2009

*************************************************************

دلوقتي هتكلم عن اليوم اللي كان فاضل( الورك شوب) كان في محمية وادي جلة يوم 3/4/2009
قضيت أجمل لحظات في حياتي، بجد كانت تجربة جديده وممتعة فوق الوصف، برغم انها كانت متعبة جدااااا، بس فعلا استفدت من التجربة.
يمكن مكسبت في رحلة البحث عن الكنز برغم كل التعب ده والمجهود اللي بذلنا، لكن الكنز الحقيقي فعلا كان في حلاوة ومتعة التجربة.

ودي صورة لليوم مع التيم ورك كلة..

كل ما أغمض عيني.

أنا عارفة اني بحلم والحلم جميل وبيحالي..

قال اية قاعد جمبي والناس شيفاك وحسداني

مهو طبعا، مأنت قمري ونوري وضلي وأمالي..

ونفسي اقولك كده من زماااااااااااان.

مخلاص العين هتنام بعد ليلي كتير سهرانة..

أسم الله عليهم عيني عليهم، ربنا يحميهم، وتملا دست عيال بيتهم وتتطلع عنيهم.

وتيجي الناس تتطل عليهم ويقولو عقبالنا.

مين يطول يعيش في حقيقة في زيها في الجنة..

ربنا يسعدهم يارب، ويهدي سرهم..

وعقبال الناس كلها تفرح زيهم..

مجرد حالة جميلة

مكالمة من الماضي..!!

لو شخص متعود يكتب مذكراتة، من سنين ، فالنفترض من ايام الثانوي، ولحد ما وصل لمرحلة ما بعد الجامعة، وبيدون فيها اغلب الاحداث اللي بتمر في حياتة، سواء بشكل رمزي، او بوضوح.
ومرت سنين، والصفحات البيضة اصفرت، من اثر التقادم، وافعال الزمن بيها..
ودنيا تاخده ودنيا تجيبة، وبلاد تشيلة وبلاد تحطة...
وبعد كل ده، بالصدفة، وهو قاعد لابية ولا علية ومركز في الحاضر بكل حواسة..
تقع علية ورقة من صفحات الماضي، بعد ما اخدت لون الصفار، واتيغرت ملاحها..
الغريب ان اللون الاصفر ده بيخدع ويخليك تتخيل ان الورقة دي مش تبعك، ولا تمت لك بأي صلة..
طب جت منين الورقة دي..
تبصلها وتقول ولا اعرفها..
الورقة تحاول تفكرك بيها، لكن بلا جدوي..
صوت الورقة يطلع منها ويقولك طب اقراني يمكن تكون تعرفني..
تفكر وتركز، وتقول مفيش مشكلة هجرب، وواضح انها مرت علية قبل كده عناوين الصفحة دي..
وتاخد الورقة بعد محاولات مستميتة منها علشان تفكرك بيها..
وفجأة تقرا، تحس ان الورقة الصفرة دي رجعتك لسنين فاتت، شريط فديو وبيتعاد، سنياريوهات كتير افتكرتها ما بين السطور وانت بتقرا..
لكن لأنك كنت طول الوقت زمان بتحاول تهرب من الماضي بكل ما فية، لانك كنت رافضة، ومش عايز تعيشة، فبالتالي بعد مرور كل السنين دي، تناسيت الماضي، لدرجة انك اعتبرتة مرحلة لم تمر في حياتك، وكأنك جبت مقص، وقصيت الجزء ده من حياتك، كأن لم يكن من الاساس..
بس بترجع وتقول، ياااااااااااه كانت ايام الله يرحمها بقا..

وبترجع تاني تشكر الورقة، وكلامها ليك، ومحاولتها لتذكيرك بماضي عدي..

يبقا السؤال..
اية الحكمة من ظهرو الماضي في الوقت ده بالتحديد، وبالطريقة دي، من الورقة دي بالأخص..؟؟؟

يمكن يكون في حكمة خفية، ويمكن ميكنش اكتر من مكالمة من الماضي، بتسلم عليك، وتفكرك بيها، علشان مش تنسا ان الماضي ده عدي في حياتك فعلا، وانت استفدت بية ، استفادة غير واضحة..

الله أعلم..

جدتي في العناية المركزة..

اللهم رب الناس ، أذهب البأس ، إشف أنت الشافي لا شفاء إلا شفاؤك شفاء لا يغادر سقماً

ربنا يشفيكي يارب لو كانت الحياة خير لكي ، ويرحمك لو كان الموت راحة ليكي..

متعرفيش انتي عندي اية، زي ما انا كنت اول حفيدة ليكي وبتحبيني بزيادة، انتي بتمثلي لية عمري، من اول الطفولة اللي كنت متربية وقتها معاكي، لحد شبابي، والدعوات اللي كانت بتريحني منك..

الحمد لله ان الظروف الشهر اللي فات اجبرتني اني اقعد معاكي اسبوع، مكنتش اعرف ان ربنا عايزني اتمتع بحبك وبحنيتك علية، وحبك لية ولأخواتي، ودعواتك اللي بتشرحلي صدري، وتيسرلي امري، وانا رايحة الامتحان..

وكفاية قوي علية الكام دعوة اللي دعيتهالي قبل ما تتدخلي العناية المركزة، اختي وصلتلي الدعوات، وكل كلامك..

وسامحيني كان نفسي اخليكي تشوفيني قبل ما تتدخلي العناية المركزة، بس فعلا غصب عني ظروفي مخلتنيش اللحقك قبل ما تتدخلي المستشفي..

يمكن اللي كان اصعب علية اني اشوفك في العناية المركزة بالشكل ده، ربنا يرحمك برحمتة ويشفيكي ويخفف عنك يارب..

ربنا يسترها.

سامحيني كان نفسي اسعدك زي ما كان نفسك، لكن ربنا مش اراد، لكن عمري ما هنسا وصيتك لية..

بأذن الله بعد ما اللي دعتيلي بية يتحقق واحقق اهدافي اللي قولتيلي عليها انها هاتتحق بأذن الله..

هجيلك واعرفك كل حاجة وافرحك بية ، زي ما طلبتي..

اللهم أشفها وعافها يارب

اللهم آمين

اللهم إشفها شفاء لا يغادر سقماً

اللهم رب الناس ، أذهب البأس ، إشف أنت الشافي لا شفاء إلا شفاؤك شفاء لا يغادر سقماً

اللهم رب الناس ، أذهب البأس ، إشف أنت الشافي لا شفاء إلا شفاؤك شفاء لا يغادر سقماً

اللهم رب الناس ، أذهب البأس ، إشف أنت الشافي لا شفاء إلا شفاؤك شفاء لا يغادر سقماً

اللهم رب الناس ، أذهب البأس ، إشف أنت الشافي لا شفاء إلا شفاؤك شفاء لا يغادر سقماً

اللهم رب الناس ، أذهب البأس ، إشف أنت الشافي لا شفاء إلا شفاؤك شفاء لا يغادر سقماً

اللهم اشف وعافِ أخانا محسن وكفّر عنه سيئاته وعجل شفاءه يارب العالمين

بحبك قوي يا جدتي.