الاثنين، 31 مارس 2014

و إفتكرت !


 هما الناس اللي بيقرروا يفارقوا حد عزيز وميشوفوهوش تاني بيعملوا كدا إزاي؟ 

يعني مبيصحوش من عز النوم بؤهم مليان صدا و ميتين م العطش و مهما شربوا مفيش حاجة ترويهم ..؟

مبيبقوش قاعدين في الشغل و يفتكروا حاجة كان الشخص دا جايبهالهم ومش فاكرين حطوها فين،فيجروا بعد الشغل يروحوا يدوروا عليها ويشيلوها تحت المخدة، عشان ايديهم تلمسها قبل ما يناموا و اول ما يصحوا .... !

طب بينسوا ريحة البني آدم دا إزاي؟

شكل صوابع إيديه، نقشة شراباته، الحاجات اللي بتجيبله حساسية.

بيشرب الشاي بكام معلقة سكر،بيقلب الشاي مع أو عكس عقارب الساعة....!

بينسوا إزاي رعشة الإيدين ساعة التوتر، لجلجة الكلام، محاولات الهروب من الأسئلة... !

بينسوا إزاي تون الصوت و تنهيدة الزهق وصوت الضحكة، والإبتسامة وإذا كانت بتبين السنان و لا لاء ... !

طب بينسوا إزاي صوت نفسه القريب ....!

إنتوا بتنسوا وأنا إفتكرت .!  


خُلاصة المرحلة الحالية " اللي طولت ولازم تخلص " :(

فضلت أفكر في النسيان لما بقي النسيان همي .! 



الكلمات مقتبسة من
Dina Maher

هناك تعليقان (2):

  1. عارفه يا شيمو أنا كنت داخله اكتب حاجه زي كده دلوقتي ^^
    ونفس تفكيرك ده اخرني سنه ونص بس محدش بيعمل كده بالساهل وخصوصا لو كان صادق ..
    بس المره دي انا اللي بعدت عن صديقتي اللي بقالنا 3 سنين وشويه منهم سنه ونص دمار ليا ..
    بس انتي العكس صدقيني ده مكسب لما تخسري حد بدري بتوجع في الأول بس بعد كده بتفتكري وتضحكي ^^

    ردحذف
  2. إنتي معاكي حق مكسب بس للأسف القلب دايما حساباته مختلفة ودايماً بيشوفها خسارة .!

    محدش عارف الخير فين

    ردحذف