الثلاثاء، 30 ديسمبر، 2008

أعتذارعن قتل، بمنتهي البساطة...

"ياريت ما تكونيش زعلتى منى"
بمنتهي البساطة...
تقتل، وتيجي تقول سوري..
لكن كلامك مش هايغير كتير لا في نظرتي ليك، ولا نظرتي لفكرتي...
وسواء عرفت اقنعك زي ما بتقول او لا، مايهمنيش مش هاتتغير افكاري، ولا هتنازل عن متطلباتي...
عموما
 رأيك فيا، لا يدل عليا....
I HAET YOU

بس برضة، حسبي الله ونعم الوكيل..

وعلي رأيك ياللي في بالي ، قلبزي قلبزي، هههههههه

شكر واجب ، مني ليكم..

أنا جييييت

يا ولكم ياولكم ، فينك يا شيخة من زمان، من ايام الذكريات اللي اتحذفت...؟؟!!

لا بس كنت براجع شوية حاجات، وبغير وبعدل شوية محتاجات..

اممممممممممم ، طب  خير واية الجديد بقا، طمنيني..؟

مش عارفة اقولك في جديد ولا اقولك في تغير ، ولا نقول مجرد تعديل، او كنا بناخد جولة  من الداخل، علشان نعرف نظبط الخارج...
طب تمام ( ولو اني مش فاهمة اية الجديد يعني)
ها اية رأيك بقا بعد الجولة اللي اخدتيها من الداخل، وصلتي لحاجة، ولا لسة في جولات تاني..

مبدئيا لازم نتفق ان طول ما في نفس داخل ونفس خارج، يبقا اكيد في جولات تاني وتالت ومليون، لان في حاجات صعب تبقا كاملة..
بس بالنسبة لسؤالك، اقدر اقول اني طلعت بشوية حاجات ومحتاجات، كتير، منها اللي غير نظرتي وتقديري لشوية امور، ومنها اللي خلاني اتمسك بالثوابت اللي في طريقي، برغم اني لاقيتها شبهة مستحيلة..

طب ده اعتراف يتحسب عليكي ، مش ليكي، بانك عارفة انها شبة مستحيلة...

لا مش يهمني بقا يتحسب علية او لية، المهم اني شايفة اية اللي مناسب لحيايتي ومستقبلي وعارفة اية اللي مش مناسب، مهو مش كل اللي الناس هتتفق علية يبقا مناسب لحياتي وشخصيتي..
بس ده بيقول انك لسة متمسكة، بمبداء الاصرار علي رأيك برغم كل المعارضة اللي حواليكي، لبعض افكارك...؟؟
اعتقد هو كده، بس خليني برضة اعترف ان في بعض الشخصيات اللي قابلتها، بجد بجد خلتني اغير من اعتقتادتي السلبية، وابدل مكانها اعتقاد ايجابي، وده بجد لية اهمية في حياتي، واالاحلا انو اكد جوايا باقي اعتقداتي اللي كانت اصلا من البداية الحمد لله ايجابية..
اممممممممم طب خلينا كده ناخد احنا كمان جولة بسيطة عن الناس اللي اثرت فيكي خلال الجولة دي...

اوك انا موافقة ومنها بقا اني اقدملهم زي رسالة شكرا علي كل حاجة اكتسبتها منهم..

بس خليني اوضح الاول، اني اتعرفت عليهم خلال السنة دي، اللي هي فاضل فيها ساعات وتنتهي، يعني نقول حصر لمكاسبي وخسايري في معرفة الناس خلال الفترة 2008

وانا سمعاكي اتفضلي قولي،واحصري كل اللي تحبي تتكلمي عليهم..

تعرفي في اللحظة اللي قولتي فيها اني اقولك اسماء الناس دي واستفدت باية منهم، تهت قوي..
لية ..؟؟
مش عارفة مشاء الله السنة دي حسة ان الناس اللي عرفتها ، كانت مكسب ليا، بغض النظر عن الناس اللي بجد مش حسة ان كان ليهم لازمة قوي في حياتي بس اكيد ليهم لازمة حتي لو كانت سلبية..
بس عموما انا هقولك اللي بجد علي بالي حاليا، واتمنا مش انسا حد ولا ادي حد حق اقل من حقة..

نبتدي بالتسلسل، يعني من بداية اللي عرفتهم حتي الان..
الفيس بوك
نقول من خلال دخولي عالم الفيس بوك، ده في حد ذاتة مكسب ليا، لاسبب بسيطة قوي، من خلال الفيس بوك اتعلمت كتير جداااااا، في حياتي العملية والعليمة،( بغض النظر عن اللي فعليا اتعلمتة من النت نفسة) وده بيقول ان كل شئ بنستخدمة سلاح ذو حدين، يعني من خلالة عملت جروب ليا اسمو لكل من يعتقد انة فاشل، ومن هنا بداءت معرفتي بالناس اللي هذكر اسمائهم..
سهي
نبتدي ببنوتة اسمها، سهي هي من الاردن، وكانت مشتركة في الجروب، من خلال الجروب بداءت بنا النقاشات واتعرفت عليها، ومن خلالها عرفتني علي منتدي اسمو يوم جديد، وكان كل معرفتي بالمنتدي ده هو توبيك باسمها..
سجلت في، وقريت التوبيك وخرجت ولم اعدها تاني...
عدت الايام، ولاقيت سوسو الامورة اللي هي اخت سهي بعتالي مسج مع اختها وعايزة تتعرف عليا، طبعا قبلت بدوان تردد...
من سهاد بقا عرفت كل الناس اللي بعد كده...
في البداية سهاد كانت حلقة الوصل بيني وبين سهي بعد ما علاقتنا بداءت تنقطع مع الوقت ومع بعد سهي عن النت شوية..
وعلاقتي بالبنوتة سهاد بجد كانت علاقة كلها مرح قووووي

يعني اية كلها مرح وضحي بقا تقصدي اية بكل اسم هتذكري، او الاصح استفادتي اية من الشخصية دي..
اوك 
سهاد، اتعلمت منها المرح، خفة الدم، اني مهما اكون مضايقة بمجرد ما اكلمها، احس ان في حاجة كده زي بيبي صغير قعد في مكان بياخد المكان من روح البيبي ده، من هزار وضحك وتهريج، حتي لو كنت مهموم..
بعد تعرفي علي سوسو، عرفتني علي شخصية كان ليها دورمهم في حياتي، بالرغم من انو كان تقيل علي قلبي اساسا، ( هههههههه
بس يعني اتعرفت علية وخلاص علشان سوسو قالتلي انها تعرف الشخصية دي، اشترك في الجروب، وبعد الجروب، قالي علي قسم يتعمل في منتدي يوم جديد زي الجروب، فوافقت وخلاص، عملتة وخلاص برضة، لدرجة ان اساسا المنتدي كان تقيل علي قلبي زي الشخص ده تماما...
الشخص ده عامل بالظبط زي ، القرش المدفون في التراب، ( اقصد وقت ما اتعرفت علية) زي اللي لمعتة رايحة بسبب التراب المتراكم علية، اللي هو تقلة علي قلبي...
ما علينا نسيت ، وبقا كل العلاقة بية كل فترة كبيرة، وهي اني اسئلة علي شئ في المنتدي، او اخد رأية في مشكلة في المنتدي، المهم ان العلاقة كانت مقتصرة علي المنتدي لا غير..
بعد فترة مش كبيرة قوي،ومش صغيرة قوي( وبجد بندم علي الوقت الضايع ده كلة) بداء يبقا في كلام ، وشوية شوية، لاقيت ان اية ده ، الشخصية دي بجد طلعت حد يستاهل انك تسمعلة، ده بيقول كلام لية وزنة وقيمتة، ده حد طلع بيفهم ، وبيعرف هو عايز يقول اية، مش مجرد  حد بيرغي وخلاص، المهم بعد فترة بقيت فعلا بحس ان ده حد ينفع مثلا لو في مشكلة استشيرة فيها واعرف رأية، واعرف منة اية الصح واية الخطاء...
ولحد اللحظة دي اكتر شئ محتاجة اني اعملة بعد الجولة الداخلية، اللي عملتها، هو اني اقتبس من الصفات المميزة اللي في الشخصية دي، واتعلمها كويس، واطبقها، برغم ان الحمد لله في بعض الحاجات، لاقيتها عندي ، بس معليش الطمع وحش، يعني طمعت في اللي ناقصني وعندة..
 وبشكرة جدااا علي ذوقة وسماحة ليا اني اقتبس من صفاتة المميزة واضيفها لشخصيتي..
الغريب ان هو في نفس سني، ويمكن اكبر مني بشهور بسيطة، لكن العجيب في الموضوع ، اني بحسة اخويا الكبير، حد تقدر تعتمد علي رأية، وتسألة ، وتاخد برأية من غير ما تفكر، ده بقا اللي بعتبرة، الحكيم، اللي لما تحتاج لحد يفيدك بخبرتة ، هتلاقية، بس اللي مش طبيعي ان هو في نفس سني، طبعا ده مش بيقول ان اللي في نفس سني، يبقا مش بالضرورة يبقا حكيم،لكن نقول انو عقلة اكبر من سنة، علي الاقل في نظري..
 او نقول حكيم بذكاء، وده اعتقد افضل وصف له..
وطبعا بعد كل الرغي ده، مش ينفع مقولش هو مين
اكيد الرومانسي الاخير، اللي هو محمد رشدي..
شكرا يا محمد

ونرجع لباقي الناس، من خلال المنتدي برضة عرفت بنوتة نقول علية، طفلة في ثوب شابة في مقتبل العمر، اعتقد ان ده افضل تعليق يتقال عليها، بنوتة بتلف حوالين نفسها زي البيبي التايه، ( هههههههههـ مش بتريق بكلم جد) توهانها بين الممنوع والمرغوب، حلاوتها في برأتها، طيبتها، طبيعتها، اكتر شئ اخدتة منها هو ، تلقائيتها، برغم اني مش اخدتها كلها منها، الا اني اخدتها في بعض الامور، ممكن متصدقيش لو قولتلك اني بحسها بنوتي الصغيرة، هي والبنوتة سهاد...
برغم اني اوقات بحسهم اعقل مني بكتير، برغم فارق السن اللي بينا، بس بجد دخلو حياتي حسسوني بنوع جديد من الصداقات مكنتش اعرف عنو حاجة..
او الاصح ، دخلو بنشاطهم وسنهم، وبقيت استمد منه حلاوة الحياة..
من خلال نوسة بقا اللي هي دورنا طبعا، عرفتني علي باقي الناس ، وخلوني احتك اكتر بالمنتدي اللي اصلا مكنتش حبا قوي، بس مع الوقت الوضع اتغير، بقا زي حب عشرة، بقا ليا اصحاب،وناس حبيتهم، وحبيت كتاباتهم في مدوناتهم، هي دي بقا نقطة الانطلاق...

ايوة من المدونات  اللي في المنتدي، بداءت انطلق كده، واجري زي االبنوتة الصغنونة، في حديقة مليانة اللعاب، وبعدين تلف تلف وترجع تبص تلاقي بنوتة عسولة برضة وقعت في وشي، اسمها رضوي، مرة لاقيت محمد حاطت وصف علي مدونتها، عند في مدنته، بجد انا شايفة ان ده اكتر توصيف منطبق عليها، اللي هو (جنون قلب "بين أحلام السنابل و قيود العقل تحتار صاحبه هذه المدونه") هي دي رضوي
اخدت منها حاجة جميلة قوي، يمكن هي مش مركزة فيها، هي الغموض اللي هي اصلا بتقول علية انا اللي في بداية تعرفها عليا في المنتدي، كنت بنت غامضة، لكن فعلا مكنتش كده، بس انا حسيتها، هي اكتر اللي فيها نسبة من الغموض، وسعات بحسة غموض مطلق..( طبعا بغض النظر عن هل الغموض ده حاجة حلوة او لا)
بس استفدت منها برضة، شكرا يا رودي

عرفت حد تاني بس ده بقا عرفتة برة المنتدي، وجبتة معايا للمنتدي، لاني حسيت ان ده حد طييب ويصلح لدخول المنتدي، اللي مليان بالناس اللي عرفتهم، وهو أحمد راضي
في البداية اسمة مقترن باسمي، لية بقا لان اسمي شيماء راضي، ودي صدفة بحبها قوي، لان لما يبقا ليك اخ اصغير منك في العالم الافتراضي اللي هو النت اعتقد بتبقا لذيذة، يعني ليا اخوات كتير ، وبجد بحبهم قوي..
بالنسبة لأحمد، 
حد جواه كوكتيل، غريب بين الطيبة ،النشاط، الانفعالية، حاجات كتير تحسها غريبة، بس اهم شئ في ومهم جدااا، انو ذوق، ومتربي، ودي بتبقا حاجة صعبة شوية تلاقية اولا في حد في نفس سنة،وكمان في شاب في عالم النت..

اللي اخدتة منة، بجد اولا، عن طريقة عرفت يعني اية سياسة مكنتش بركز قوي في الامور دي، بس اكيد مش زيو، بس نقول بشكل افضل، من الاول، منة عرفت الطيبة، والحنية، بجد حنين قووووي، ربنا يحمية يارب...

شكرا يا أحمد...

حسة اني نسيت حد ، بس لو افتكرت حد تاني ، اكيد هرجع بجد واشكرهم، بس اية رأيك..؟؟

تعرفي بجد انا بحسدك عليهم،..؟؟
لية.؟؟
لانك عرفتي ناس نقاء وصفاء، ودفء عائلة جو النت، وده مش سهل تلاقية..
الحمد لله

والف شكر، لكل حد ذكرت اسمة، او حتي نسيتة، بجد استفدت كتير منكم، وربنا يوفقكم ويكرمكم، وبتمنا بجد ان مهما الدنيا اخدتنا بأنشغالها، مش نبعد وننسا بعض، وحتي لو حصل، صدقوني، عمري ما بنسا اللي اثرو في حياتي بالشكل ده....

الف شكر

الأحد، 28 ديسمبر، 2008

صرخة مكتومة..


ماتت قلوب الناس ماتت بنا النخوة يمكن نسينا فى يوم ان العرب اخوة..

غـــــزه بغـــداد بيــــروت الحزن بـكل مكــــان عزيمتنا لا ما تموت راح تقوى بالايمــــــــــــــان..
انا عربـــــى ورافض صمتى كاتم احساس جواياوالشعب العربى فى صـــفى هقول ويردوا ورايــــا..
انا عــــــــايزة العــــــالم كله يمد كفوفه ســـــــلام والســــلم العربى يكون ســــلام مش استســــــلام..
يا صــــــاحبى يا انســــان هنــا او فى اى مكـــان ببعـت رسالتــــى ليك نطـــــــوي بيها الاحزان..
اصل البشر انســــــــان كل الرســـل اخــــــــوان وســـى وعيســـى ومحمد بيرفضــــوا العــــدوان..

ماتت قلوب الناس ماتت بنا النخوة يمكن نسينا فى يوم ان العرب اخوة..

مات الاحساس جوانـــا ولا احنا اللى امــــــــوات و لا ضـــمير العالم خلاص احســـــاسه مــــــــات..
اطفــال شيـــوخ نسـاء تصرخ وما حدش سامـــع اشـلاء دمـاء شـهداء و ضمــــــير العالم ضايـــع..
لعبــتهم هى الفتــنه ولازم نكــــون صــــــــاحيين للفتــنه ونــار الفتــنه ولا بد نكون واعـــــــيين..
صـــــــحى قلوب الناس صـــحى بها النخـــــــوة أصــــرخ بكل احســــاس ان العرب اخـــــــوة..


ويلا بينا نصحي الضمير ينطق والا يبقى ضميرك الابكم زيه زي الشيطان الاخرس كلنا شوفنا الصوره سوده واحنا السبب ..

بادينا تبقى الصوره بيضه بس العتب على احمد وحسين وحنا ومينا لو يحسوا مره ببعض يصحى الضمير فينا يلا بينا نصحي قلوب الناس..

نصرخ بكل احساس احنا العرب اخوه

أخر كلام عندنا القدس دي ارضنا، والحق ده حقنا..
والحق حق ربنا..
واحد اتنين الجيش العربي فييييييييييييييييييين..؟؟
حــســبــي الله ونعم الوكيل، في كل اللي لية يد في اللي بيحصل...

الثلاثاء، 23 ديسمبر، 2008

فرصة، اختيار، قرار...

أنا مش هضعف تاني قصادك، أنا مش هرجع ابص ورايا، قربك عندي زي بعادك ، يعني خلااااااااص مش فارقه معايا..
تفتكريني او تنسيني ، مبقاش فيكي شئ يغريني..

الايام اللي انا عاشتها وياكي نسيتها، ايام عدت لا كرهتها ولا حبيتها..
انسى انا هتمنى رجوعك بعد ما قلبى طفى شموعك
تفتكريني او تنسيني ، مبقاش فيكي شئ يغريني..

بس خلاص..

الجمعة، 12 ديسمبر، 2008

محتجالك فوق ما يخطر في بالك..


بين سكون الليل وصورتك، في دموع حنت في بعدك، من فراغ، من وحدة قاسية، صرخة بالشوق مشتقالك..
محتجالك ابوح واشكي ، ارمي همي عليك وابكي، مش هعيش طول الليالي احضن الصورة وخيالي
محتجالك، فوق ما يخطر في بالك.

اوقات بخاف فيها وانا لوحدي، وحاجات كتير في خيالي تجيب وتودي .
وده لما ببقا لوحدي مش وياك، مع كل ثانية انا فيها بستنااااااك..
مستنياك ياروحي بشوق كل العشاق، مستنياك تعبت من الاشواق، مستنياك وانا دايبة يا عيني من الفراق..


بستناك وبتمنا اعيش العمر كلة حبيبي معاك ، ومش عارفة ده امتي الشوق يخلي هواك يتمنا، وفي بعادك ليالي احلم باني بعيش وياك..
يااااااه فاتت ليالي صبرت فيها وخدت اية، غير الفراق اللي انكتبلي وعيشت فيه.

العذاب مش بالكلام احكي، لو علي السؤال في اليوم بقول ميت الف لية..؟؟

الثلاثاء، 9 ديسمبر، 2008

ذكريات محذوفة. نقطة و من اول السطر..

عندما يغيب الماضي بما يحمل من ذكريات عذبــة سطرتها يد الأيام بأنامل تعطي كل كلمة رائحة زكية لتكون ذكرى عطرة
نعم ...
عطرة بكل تلك الوجوه التي حاولت ملامحها أن تتلاشى لا لشيء ،إلا أنها أصبحت ذكرى في عداد الذكريات. وكل شيء يوشك على الفناء قد تطمس ولو بعض ملامحه ، وعندما تبدأ صروح اللقاء بالتداعي ، لاداعي لأن تتكلم ..
فقط مارس هواية الصمت ثم تنحى جانباً وانظر إلى ذلك الصرح العالي كيف ينهار.حدق واعط عينيك مجالاً أوسع،حتى ترى بوضوح كيف أن الأيــام لاتبقى على حال واحدة..
الحياة احداث ، والاحداث تصبح اليوم حاضر ، والحاضر يصبح في الغد ذكريات..وعندما تدون ذكرياتك فهي مجرد وسيلة ، وليست غاية للمحافظة علي احداث الماضي من الزوال..
لكن الاحداث خليط بين التجارب والمحاولات، وما بين التجارب والمحاولات نستنتج الخبرات..وماضي امس ما هو الا خبرات اليوم..
تخيل عمرك اللي راح كلة مجرد ذكريات وتجارب، وكل يوم بيمر في عمرك بيتدون فية اعمالك، (سواء حلوة او وحشة) كلة بيتدون..
تخيل لما كل ده يروح ويتمحي كل اللي فية من خير ومن شر..هتفرح للشر انو راح واتمحا، لكن الخير بتزعل لان راح..
لكن بنرجع ونقول قدر الله وما شاء فعل..
المهم في اللي جي..
صفحة بيضة لحاضر، ذكريات امس، كلها جاهزة للي جي وزي بالظبط.
نقطة و من اول السطر..................
وزي ما اليوم بيقول "اني يوم جديد علي عملك شهيد فاغتمني فاني لا اعود".
سبحان الله..
لما تفكر تاخد قرار شبة مصيري في حياتك، وتلاقي كل ذكرياتك اللي في اكتر من مكان واكتر من مجال ، محاها الزمن بالصدفة..
بجد تبقا اعظم فرصة لفتح صفحة جديدة، تعوض فيها عن كل نقطة سودة في الصفحات اللي كانت بيضة زمان، واصحبت ماضي بصفحات صفرا اليوم...
جايزة هي حصلت بالصدفة، لكن اكيد صدفة مقصودة من ربنا..
او الاصح فرصة جديدة وعظيمة..
أعتقد تضيع الفرصة دي دلوقتي وبالشكل ده ، يبقا اكبر دليل علي عدم استيعاب الدرس القديم..
بس الاكيد ، ان العمر مفيهوش كتير لاقتناص فرصة اخري..
قطار الفرص يمر علي جميع المحطات ، ولكن لا يجبر احد علي الركوب...
ملحوظة: مقصدش بس المدونة بتاعتي اللي راحت ، ولا بس القسم اللي تعبت فية في المنتدي، وراح هو كمان، لا بجد اكتر من حاجة حصلت في شهر واحد ومحت كل ذكرياتي، وفتحتلي اكتر من صفحة في اكتر من مجال في حياتي..

بقلم: شيماء راضي
يوم 9/12/2008

الاثنين، 8 ديسمبر، 2008

لوجي كي جي تو..(من مدونتي السابقة)


لوجي كي جي تو
Posted 01-04-2008 at 04:35 PM by
shemoo Updated 02-04-2008 at 04:07 PM by shemoo

انا عارفه ان كل اللي هيقرا هيقول اية العناوين الغريبة اللي بتحطية دي بس ده فعلا مش عنوان غريب ولا حاجه ده هو بالظبط اللي بقصدو في كلاميخليني احكيلكم بوصو لوجي دي هي بنت صحبتي الانتيم اسمة الحقيقي لوجين وكي جي تو ده لان هي شبة البنت اللي بتمثل في فيلم حرمية في كي جي توو ونفس الشقاوة عارفينو طبعا بتاع كريم عبد العزيز وحنان ترك انا بقا حبيت اتكلم عنه لاني بجد بعشقة موووووت زي ما كنت ومازلت بحب امه قووووووووووي اللي هي ام لوجي صحبتي الانتيم يا ولاد ودي بقا ابقا ارغي معاكم علية بعدين يعني اصل الكلام عنه يطول اصحاب بقا من حوالي تلاتشر يعني 13 سنة متدقوش علي اللغة بقا اصلي ساقته نحو من زماااااااااان المهم بقا خلينا نرجع للوجي حبيبتي هي بنونة عندها حوالي سنتين بس اية مشاء الله شقية شقاوه تخليك تتشد تلعب معاه حتي لو انت مش بتحب تلعب مع الاطفال قوي بتنكشك علشان تيجي تلاعبة بس انا لعبي معاه غبي شوية يعني بلعب معاه بغباء حبيتين ههههههههه امه بتقولي انتي ومدحت جوزها يعني الباش مهندز مدحت يعني انتم الاتنين بتحبو تهرجو معاها تهريج غبي قوي يعني مش اموته من الضرب طبعا لا بس مثلا اشدها من خدودها اخوضها جامدالمهم اني مش بعرف اللعب معاها زي باقي الاطفال هشيك بسيك دي واللي بيحسسوني فية انهم بيلعبو قطة سيامي اللي عمري ما شوفتها غير في الصور المهم احلا حاجه بقا خلتني احبه قوي انا وامه بنحب نلف ونخرج كتير من زمان من ايام الثانوي فبعد الجواز كان صعب علشان اول لما اتجوزت صحبتي بقت حامل في الهانم لوجي بس اية مقولكوش دي كانت مجاننها من وهي في بطنه يعني كانت علي طول عن الدكتور ولادتهاكانت ولاده متعسره اصلا تقريبا لوجي كانت عاملة مطش اعتزال لبطن امة فكانت عاملة هيصة بقا وكده المهم يعني قعدت 9 شهور وكام شهر تاني مبعرفش اخرج معامة بصراحه كنت بغير منها قوي لانه اخدت صحبتي مني قوي يعني بقت بتهتم بية اكتر حتي من الباشمهندز مدحت بس اية بقا لما كبرت وربنا هداها بعد معانه امها في ولادتها لا وكمان اية تعب امة بعد الولاده كان اصعب لدرجه انه بعد الشر كان ممكن يجرلها حاجه يظهر لوجي اصحابه جو بطن امة عملو احتجاج علي خروج لوجي للدنيا بس الحمد لله ربنا سترها وجت سليمة وقدرنا نسكتهم بكلمتين كده وكده زي اللي الحكومة بتعملهم معانا لما نحتج علي اي شئ بيحصل زي رغيف العيش مثلا المهم جت سليمة وامه بقت كويسة الحمد لله ولوجي بقت عندها سنة وكام شهر هوده بقا الجمال احنا اغلب خروجاتنا بسببها في المولات علشان الابلة لوجي بتحب تلف زينا وتتفرج علي اللبس لا واية بقا تخرج من المحل تمشئ وتمشينا في الطريق اللي عجبة برغم انة بتقع لما بتمشئ بس بتصمم بعد عياط ومظاهرات انه تمشي المهم بقا اخر مرة كنا في ستي ستارزوللي ميعرفش يعني اية ستي ستارز احب اقولة ان هو عاصمة القاهرة كما يزعمون ههههههه اصلا هو انا هقولكم الحقيقة انا بروحو بس علشان اعرف اية الجديد في الدنيا وفي البس وكمان بحب اروحو علشان بس اقعد في كافية ادخل اتغدا في مؤمن ادخل محل اسبنس ده للي ميعرفوش زي كارفور وهايبر وانا في حجات حلوة كتير لكل شئ في البيت وكمان بييكون في عروض بصراحه بتغريني اني اشتري منو بس بيخرب بيتي بصراحه كده يعني اخري بس اشتري منو حاجه مهما حاشة وكلا اصلا اسعارو نااااار ياحبيبي نار واللي يضحك عليك ويقولك اشتريت من ستي ستارز اوعا تصدو اصو فشار ههههه اصلا انا بجيب الحجاب بتاعي مثلا ب 50 او 60 بالكتير يعني اصلي عايقة ومضايقة حبيتين بحب اهتم بلبسي وشكلي المهم ما علينا مش دي القضية القضية اني الاقي الحجاب بره نفس الشكل والخامة ارخض من ستي ستارز يعني مثلا في ستي اللاقية 100 ب 150 كده يعني اومال هجيب الطقم بكام بقا دي لا الشنطة لوحدها بحواي 75 جنية بره يبقا عندو بكام 200 جنية ما علينا سيبكم استغلال للسياح بقا وكده انتم فاهمين ودخلنا المول وعينك متشوف الا النور لا وكمان كان معانا بنت رشا اخت ندي صحبتي يعني هما سنةهم قريب من بعض شوية هبقا اوريكو صور الخروجه دي بس لما اعرف الاول بتنزل ازاي الصور هنا اصلي مش بعرف انزلة المهم بقا اية بنت رشا اعقل شوية من لوجي هي بنت رشا اسمة جانا يعني الطينة من العجينة ومحدش يسالني يعني اية معنا الاسمين بس اجي انادي علي واحده فيهم اقول لوجي او جوجو يعني مفيش فرق بعيد المهم بقا اية فضحونا في المول مسكين ايدان بعض وهاتك ياجري ولف في المول ويسبونا ويكلمو الناس وخصوصا لوجي لانه اشقا من بنت رشا مشاء الله يعني احسن يتحسدو اصلي مقولتلكمش مش اتصاحبو علي اب ولد اسمو فهد وقال اية عايز يصور فهد مع لوجي اصله كانت بتضحكلو هههههههههه المهم اية وهي راسة والف سيف لا يعني لا ولا ريضيت تعبرهم قال يعني تقل وكده اصلها طالعه لابوها الباشمندز مدحت اصلو تقيل قوي يعني وده اللي عجب ندي فيه ما علينا اصلهم زي بعض شوية هي تقيله وهو تقيل فكان من الطبيعي انهم يجيب كرومبا لوجي يعني وزن تقيل ههههبس ولا رضيت يصورهم مع بعض ولا الهوا يهديكي يرضيكي يا لوجي ابدا بس وجينا نتفرج علي شوية لبس في المحلات ودي تتدخل تفرج المحل علينا تمد ايديها وتشد البس وتتفرج وترمي وتعمل زينا البظط والي ميعجبنهاش تسيو وتمشي واللي يعجبها تاخدو وتتضحك لنا واحنا هاتك يا ضحك انا وامة ومش قادرين من تعليقات الناس عليان ويسلام لما بيشوفونا انا وامها في مكان ويعدوة ويسالو فين ماما ويتفاجئو لما بيعرفو ان ندي امه مش بيصدقو لاني انا وهي شكلنا بيبي خالص يعني يادوبك اخت لوجي الصغيرة دي اول مشكلة بعد السؤال عن ام لوجي يجي السؤال المعتاد اللي بعدو ازاي بنتيك دي مش شبهيك برغم ان البنت حلوة الا ان كل الي يعرف انه امه يقولها ظلمتي بنتيك تقول لية يقولولها اصليك احلا منها قوي مشاء الله يعني بس هي حلوة بس مش زيك انتي احلا ظلمتية بحلاوتيك وبدل ما يقولو مشاء الله يقعدو يعقدوها يعني عارفين بقا الشعب المصري بيسيب الراس ويمسك في الديل شعب .....................

مش مكملة عفا الله عن ما سف واحنا مرواحين بقا كان الضحك للروكب اصل لوجي وجوجو اللي هي بنت رشا اللي هي اخت ندي اللي هي صحبتي ما علينا لافه طويلة توهتو معليش المهم لوجي وجوجو قعدو يجرو ورا بعض بره ستي ستارز ويلفو ويضحكو وكمان اية حتته لاقطه بس للاسف ملحقتش اصورها بيبوسو بعض وسيبكم بقا حب وبوس اخر انسجام ودي تقولها يا حبيبي ودي تقولها يا حبيبي وانا وامها والناس فتصانين من الضحك حتي كان في مذيعه كده بتاعت القناه الاولي مش فاكرة اسمة اية ياخواتي اصل مشاغلي كتير ومش بهتم بالكلام الفاضي ده المهم وقفت وبصت عليهم وقعدت تضحك بس بجد كان يوم لذيذ قووووووووووي طبعا بخلاف ان المول كان زحمة وكل لما بتروح في حتة وتسبنا نفضل نجري وراها وتهد حيلنا عارفين زي اية بالظبط زي البط والفراخ لما تقعد تهشهم علشان يدخلو العشة بالظبط كانت كل واحده بيجي علية الدور تهش العيال والمصيبة ان احنا التلاتة البنات شيماء انا ندي صحبتي رشا اخت صحبتي شكلنا صغير واستيالنا يدي بنات روشة كده لسة مدخلتش دنيا بخلاف اني انا طبعا لسة مدخلتش دنيا ويمكن كمان شكلي اصغر منهم اه انا عندي 25 سنة بس اللي يشوفني يديني 18سنة بالمن والاذه وشكلنا كمان ميدولش علي ان واحده فينا تنفع تكون ام واحده منهم لوجي ولا جوجو والناس بتضحك علينا بس كان يوم دمو خفيف بيعجبني بقا في لوجي انه بتدي جو لما نخرج انا وامة بنحس ان يوم فني برغم اننا ممكن نكون مخنوقين اصلا بس بجد مشاء الله عليه وربنا يبارك لامة وابوة فيه وربنا يرزقنا اجمعين ببنوتة زيه يااااااااااااااااااااارب

الجمعة، 5 ديسمبر، 2008

سندس ،أحلا هدية ( من ربنا ) لعيد ميلادي، الحمد لله..

( صورة لسندس بعد 3 ايام من الولادة، اخدتها بالعافية وهي نايمة)
****************************

أنا : الوووو ايوا يا ندي، خير في حاجة( اصلي لسة مكلماها اول امبارح بليل ومكنش في جديد)
ندي :ايو يا شيماء بوصي انا خلاص داخلة اولد دلوقتي، انا اتصلت اهو ومش نسيت زي ما حلفتيني( اصلي المفروض المرة الاولي اللي ولدت فيها لوجي ، عرفت بالصدفة انة بتولد حالا،مكنوش عايزين يقلقوني معاهم ، بس انا نزلت روحتلها المستشفي علي طول)
أنا : لا بتهرجي بجد...!!!
ندي : اه والله بكلم جد( مع ضحكة هسترية جامده جدااا من ندي ومدحت ومامت ندي).
أنا : طب ازاي بس فهميني ، انتي هاتجننيني يا بنتي مش قولتي انك هتولدي بعد العيد، اية اللي غير المعاد، اكيد بتهرجي..
ندي : يا بنتي مالك بس الله ،قولتلك هولد دلوقتي ، مالك مصدومة كده لية.
أنا : لا خلاص مش في حاجة، بس بالله عليكي طمنيني بجد خلي مدحت يكلمني ، وانا هتصل تاني بعد ما اخلص المحاضرة اللي بحضرها، هخلص واجيلك علي طول...
ندي: حاضر، يلا بقا سلام..
أنا : طيب سلام يا ستي..
وإالي هنا انتها المشهد الاول...
أنا : الوووووو، ايوة ندي ها يابنتي انا خلصت المحاضرة الاولي، دخلتي تولدي ولا لسة..؟
ندي : لا يا شيماء لسة شوية انا كده كده هولد قيصري، فالدكتورة لما تيجي بعد العصر هولد باذن الله..
أنا : باذن الله ربنا يستر يا ندي، قوليلي بقا فين المستشفي بالظبط علشان لما اخلص المحاضرة التانية اجيلك علي طول هي الساعة دلوقتي 2هخلص علي 4.30، وهاجيلك باذن الله ، هي نفس المستشفي القديمة ولا جديدة..
ندي: لا يا شيماء جديدة ، بوصي العنوان فين (طبعا وصفتلي وصف دقيق للعنوان)
أنا : ماشي خلاص عرفتو هخلص واجيلك علي طول بس عرفيني احسن تقولك بكرة ولا حاجة ، لاني صايمة وهفطر واجيلك لو كده..
ندي: حاضر باذن الله مش تقلقي، يلا سلام يا شيماء.
أنا : اوك سلام.
وانا دخلت المدرج مسكت المصحف وقعدت اقرا في، وادعي يارب قومها بالسلامة ، وكنت خلاص هعيط من الخوف عليها( لانه هي حساسة قوي وبتتعب بسرعة ومن اقل حاجة ، المناعة عندها ضعيفة قوي، بخلاف ان ولادتها الاولي كانت صعبة قوي)
وإلي هنا انتها المشهد الثاني..
أنا: الوووووووووو، ايوة يا مدحت ، ها طمني ندي عملت اية انا خرجت بدري شوية من المحاضرة ، قولت اتصل ها ولدت..
مدحت : ايوة ولدت الحمد لله..
أنا : نعم ، انت بتهرج ولا اية، طب احلف.( المفروض انو متعود يعمل فيا مقالب، وانا فكرتة بيهرج)
مدحت : والله يا بنتي وربنا ولدت ، وبعدين هضحك عليكي لية( مع ضحكة غريبة)
أنا: طب بوص يا مدحت عارف لو طلعت بتتضحك علية ، انت حر انا صايمة وهاجي المستشفي يعني حرام عليك تجبني من الجامعة كده من غير ما كون ولدت، بجد هزعل، انا مش مصدقة انة لحقت تولد وانا في المحاضرة بالسرعة دي، مشاء الله..
مدحت: والله يا بنتي ولدت بجد مش بهرج، صدقيني بقا ههههههههه
أنا : طيب يا سيدي طمني جابت اية
مدحت : بنوتة
أنا : طب الحمد لله وهي عاملة اية بقا دلوقتي.
مدحت: هي تمام بخير هي والبيبي
أنا : طيب انا جايلكم في السكة هفطر واجي علي طول..
وإلي هنا انتها المشهد الثالث من الفصل الاول...
******************************
أنا : الوووووووووو ، ايوة يا مدحت انا في الو الشارع قولي امشي فين علشان اجي المستشفي واسمها اية..؟
مدحت : بوصي ( وصف تفصيلي للمستشفي)
أنا : اوك حلاص عرفتها..
مدحت: طب خلاص سلام.
أنا: سلام.
وإالي هنا انتها المشد الاول في الفصل الثاني..
سلام عليكم
لو سمحتي ، فين قسم الولادة ..
اه تقصدي ندي في الدور الثاني حجرة 4.
انا بقا قمة الاستغراب ، هي عرفت منين اني جاية لندي الله هو مكتوب علي وشي هههههههههههههما علينا.
( بس اتضحلي ان مفيش حد انهاردة بيولد قيصري غير ندي)

أنا: تك تك ، سلام عليكم ازيك يا ندي حمدلة علي سلامتك..
ندي: وعليكم السلام، ها بسرعة فطرتي ولا لسة؟
أنا : بقمة الاستغراب رديت علية قولتلة اه فطرت في مطعم وجيت علي طول..
ندي: انتي بتهرجي صح.
قولتلة لا والله بكلم بجد فعلا فطرت حالا ولسة جيالك..
كل اللي في الحجرة من اول مدحت جوزها لحد مامتها والجميع كانو مشاء الله كتير جدااا..
يا بنتي دي ندي طالعة من العمليات تقول حضرو فطار لشيماء دي هاتجيلي صايمة حرام
هههههههههههههههههههههههههههههههههههههههههههههههههههههههههه
قعدت اضحك ضحك هستيري، قولتلها انتي في اية ولا في اية ، خلينا فيكي بس..
قالولي بجد دي شالتلك أكل وقالت لازم تفطروها ..
قولتلها سيبك بقا وريني النونة وانتي عاملة اية..
وبجد بجد مشاء الله بنوتة زي السكر ( اعذروني الفرحة نستني اصور البنوتة علي الفون ، بس وعد اجبلكم الصورة يومين بس وتبقا نزلة هنا باذن الله)
الله اكبر عسولة يا ندي
ها يا شيماء شبة مين ؟؟؟
اكيد شبة لوجي حبي طبعا وفيها منك كتير يا ندي..
صحيح فين لوجي
لا هي مسافرة انهاردة الصبح
بجد يا خسارة كان نفسي اشوفها وهي مع البيبي الجديدة كان نفسها تشوفها بقا بعد ما تخرج من بطن ماماتها
هههههههههههههههههههههه
( طبعا ندي قعدت تعيط ان ازاي تولد من غير ما تشوف لوجي بنتها لانها مسافرة مع جدها البلد، وبجد متعلقة بيها قوي )
وندي كل اللي علي بالها ان تقول الحمد لله الحمد لله الحمد لله( اصل المفروض ولادتها الاولي في لوجي كانت صعبة قوي، وتعبت قوووووووووي، بس الحمد لله خرجت بالسلامة الحمد لله)

انا بقا قولتلهم علي فكرة يا جماعة البنوتة دي تبعي هتبقا في نفس شهر مولدي ونفس برجي يايعني فريق يا مدحت، لوجي وندي في يوم ميلاد واحد، وانا وساجدة هنبقا في شهر واحد ماتسجلها في نفس يومي هههههههههههههههه لا بجد مبسوطة قوي ربنا يخليهلكم يارب..

رشا ومامات ندي في نفس واحد: صحيح يا شيماء ندي كانت بتحضر لك هدية عيد ميلادك قبل ما تولد وكانت مضايقة قوي انها مش عرفت تتصل بيكي يوم عيد ميلادك وجننتنا من شهر 11 وهي عمالة تقول لازم احضر هديتي لشيماء قبل ما اولد لاني هنشغل ..
ندي: بتتكلم بالعافية وبتقول والله يا شيماء كنت عاملة حسابي..
قولتلها وان اهطير من الفرح ، انتي جبتيلي احلا هدية بجد بنوتك العسل دي، اكيد اجمل هدية..

إلي هنا ، انتهي المشد بالكامل الساعة 8.15 تقريبا
***************************************
بجد بجد احلا مفاجاء ، واحلا هدية عيد ميلادي والله مش ببالغ ، يمكن كتبت اليوم بالتفصيل من كتر فرحتي بالخبر الجميل ده ، وكمان انا مش عارفة اكتب اية اصلا بجد مبسوطة قوي وفرحتي منسياني حتي التعبير عن اللي جوايا ..

بجد احساس جميل قوي انك تشوف بيبي لسة بيتولدوخصوصا لو من شخص انت بتحبة قوي زي اخوك واكتر وربنا اللي يعلم ، واللي فرحتي اكتر ان دي تاني مرة وكنت سعيدة اني مع صحبتي في كل ولادة وبفرح لفرحها قوي..
يمكن نفس الاحساس يوم جوازها برضة ويوم ولادتة لوجي..
ومكدبش عليكم كونها انها تفتكرني وهي لسة خارجة من البينج دي عندي بالدنيا كفاية..
ربنا يهدي سرها يا رب ويكرمها في جوزها وبناتها يارب، ويجعلهم ذرية صالحة..
ويرزق الجميع احلا احساس في الدنيا ، بجد احساس جميل قوي، كنت حسة وكأن انا اللي ولدت مش هي من فرحتي الحمد لله بجد الحمد لله
صحيح نسيت اقول، ان البنوتة اسمها سندس( وده بعد التاكد و استقرارهم علي الاسم بالحمد لله )

الثلاثاء، 2 ديسمبر، 2008

TODAY IS MY BRITHDAY

حفلة عيد ميلادي

زي النهارده من ستة وعشرين سنه انا جيت للدنيا، شوفت نورها وحبـيته من اول ثانيه، معرفتش ايه هى عيوبها، شوفت بس مميزاتها، ومش بإيدى اختار انا دنيا تانيه...
النهارده من ستة وعشرين سنه انا جيت للدنيا، جيت بحب وشوق مالينى، عشت بيه انا طول سنينى، دا غصب عنى ومش بإيدىأسعد بيه اللى حواليه..
النهارده من ستة وعشرين سنه انا جيت للدنيا، لفت بيه سنين وايام عشت الحب وشفت احلام ، شوفت الدنيا بلونها الوردى كنت بنام ودموعى على خدى، لكن فى الاخر كملت وقدرت أخلى الشوك حنيه ، النهارده من ستة وعشرين سنه انا جيت للدنيا...

انتوا اكيد عاوزين البوفيه يتفتح ، مش قبل ما نطفى الشمع...






شوفتو كل ده علشانكم ، علشان تعرفو مش حارماكم من حاجة اهو...


دى بقى اكبر حاجه ساقعه ، يارب تكفي الحبايب كلهم...
والكانز ده مخصوص، للمدمنين كانز زي حلاتي هههههههههههههه

وده النسكافية علشان محدش ينام هنا، سامعين انا قوت اهو وقد اعذر من انزريا حلوين...

بجد مبسوطة قوي اني اول مرة احتفل بعيد ميلادي يبقا معاكم ، وميرسي كتير لكل اللي افتكرني واتصل او بعتلي مسج علي الفون،وربنا ما يحرمني منكم ، ويديم المعروف والمحبة بينا، يارب..

قبل ما تمشو بقا، مش هوصيكم الهدايا بقا وكدة ، احسنلكم ، ده انا كلفت الحفلة وتعبت لحد ما لاقيت أحمد دسوقي علشان استاذنة اقتبس الكلمات دي، انتم حرين...


ملحوظة: (الكلمات دي حقوقها محفوظة لمدونة رومنسي/ أحمد دسوقي).
وشكرا لية جداا علي انو وافق اني اقتبسها، لانها بصراحة عجبتني..