الأحد، 30 نوفمبر، 2008

مدرستي في عالم السبتية...


في البداية احب اقول ان بجد فكرت كتير قبل ما انزل التدوينة دي، يمكن بقالي شهور بفكر انزلها، بس فعلا كنت منتظرة اتاكد من صحة التجربة، ومدي فاعلية الدروس اللي اتخرجت بيها من مدرسة السبتية...
بصراحة اللي شجعني اكتر اني مش اتردد في نزلو التدوينة دي دلوقتي، هو صحة الدروس كانت مفعولة قوي، ودي نتيجة مكنتش متوقعاها....

خليني احكي بداية معرفتي بالمدرسة دي كانت اية وازاي واتخرجت منها بدرجة اية...

بعد تخرجي من الجامعة كنت زي اي حد عايزة اشتغل، بس طبعا الواقع يصدم اي حد ويحبط، لكن محبتش استسلم للاحباط ده وخصوصا ان دراستي مكنتش حباها قوي لدرجة تخليني اشتغل بالشهاده اللي اتخرجت بيها، بس قولت اجرب هاخسر اية لو جربت وسعيت، وبالفعل نزلت واشتغلت بشهادتي، والحمد لله من اول مرة نزلت قدمت فيها لاول مكان تم قبولي برغم عدم خبرتي، لكن شهادتي كانت مطلوبة بشدة في الاماكن المتخصصة في المجال، اللي هو رقابة الجودة، وبرغم اني اخدت وضعي في وقت قصير في الشركة، الا اني مكنتش مرتاحة نفسيا للعمل في الاماكن دي ولا حتي لظروف العمل نفسها، محستش نفسي،فقررت اني اخد كورسات في الكمبيوتر واللغة ، علشان اتمكن من العمل في اي ماكن اخر احبة، بس الغريب اني مقدرتش اتحمل تعبي النفسي في الشغل اللي كنت فيه اكتر من 3 شهور فتركتة حتي قبل ما ال3شهور يخلصو..
بعد ما سبت الشغل وخلاص قفلت مش عارفة اعمل اية ولا اروح فين، قولت اكمل كورساتي وبعدين ابقا ادور تاني علي شغل بقا..

في الوقت ده جاتلي فرصة للعمل في شركة استنلس في السبتية...
بدون تردد رفضت، وبشدة كمان قولت مستحيل اانا اشتغل في مكان زي ده، برغم ان فرص العمل كانت محدوده.
وسبب رفضي اني اعرف من زمان ان السبتية دي حي شعبي من الدرجة الاولي، ومحستش نفسي هتأقلم علي الوضع هناك، وخصوصا ان اختي الصغيرة كانت بتشتغلي قبلي هناك في نفس الشركة، الا اني وقت ما حسيت ان خلاص لا مفر من اني انزل اشتغل معاها في نفس الشركة قولت خلاص اجرب برضة لية لا يمكن وربنا يسهل، واللي شجعني اكتر اني مكنش ليا اي خبرة ولا في السكرتارية ولا في اي شئ ، غير الكمبيوتر كنت شاطرة في وقتها والشركة دي مكنش مطلوب في وقت ده خبرة..

ومن هنا بقا بداء مشواري مع مدرسة السبتية...
للي ميعرفش الاول اية هي السبتية دي انا جبتلكم نبذة مختصرة كده عن السبتية..
صدق أو لا تصدق تصل " تجارة سوق الخردة بالسبتية شهرياً الى 3.5 مليار جنيه وسنوياً 36 مليار جنيه ويتوافد عليها يومياً تجار من
مختلف محافظات مصر .وتسلط الضوء على هذه التجارة لمعرفة إمكانية استغلال ثروتها فى صالح الاقتصاد القومى واعادة تدويرها بما يخدم صناعات وانشطة أخرى تعود بالنفع على الجميع وأساس هذا السوق يرجع الى عام 1957 عندما شب وقتها حريق هائل بوكالة " الأرز والغلال " قررت بعدها وزارة الأوقاف بناء محلات ومساكن شعبية ثم تأجيرها الى ان تحولت تدريجياً إلى منطقة لتجارة " الحديد "بدلاً من الغلال . ويوضح ان تجارة السبتية تمتد من رمسيس الى كورنيش النيل وتنتشر بها محلات وصناعة الحديد والخردة من صاج وعواميد وغير ذلك ويشير إلى أن أهم ما يميز المنطقة هو قربها من وسط البلد .وقال ان السبتية بداية انشائها كانت عبارة عن " ربع " للارز ووكالة للمشنات دون ان يكون بها أى محل للحديد ثم بدأ تدريجياً التحول لتجارة الحديد وصناعتة حتى أصبحت السبتية من اشهر المناطق بالجمهورية لتجارة حديد الخردة .مشيراً إلى أن المحلات تحولت جميعها من تجارة الغلال والأعلاف إلى تجارة وصناعة المواسير وخامات الحديد وذلك من 50 عاماً
.


وده التعريف الصحفي للسبتية، اما تعريفي الشخصي للسبتية..
فهي مدرسة المدارس..
اذا كان في حد قال ان الدنيا مدرسة، فاانا بقولة ان الدنيا مدرسة فرعية من المدرسة الام السبتية، واللي ما مرش بتجربة جو عالم السبتية، يبقا ناقصة كتير قوي...
انا مش ببالغ فعلا دي الحقيقة، ومش معني كلامي بمدح فيها بالعكس، بس هي فعلا بتفرمت اللي يدخلها، وهي دي اللي بيقولو عليها ، الداخل فيها مفقود، والخراج منها مولود بس مولود جديد علي الدنيا، مولود بدماغ جديدة وخبرة شديدة علي الحياة بوجهة عام...
انا دخلت السبتية عندي مقاومات التعليم الفعال، زي دماغي حاضر نوعا ما، تركيزي مش بطال، ذكائي يجي منو، خبرتي في الشغل مكنتش قد كده ، كان كان عندي استعداد كبير للتعلم واكتساب خبرات في اي مجال وقتها..
السبتية موقعها يعتبر من اول الكورنيش من بعد( اركاديا مول) حتي شارع رمسيس،واذا ذكرت السبتية ذكر سوق العصر بولاق محطة مصر، احمد عز نجيب سويرس، وسبب من ضمن الاسباب ان شركة نجيب قبل شارع السبتية بشوارع بسيطة، قبل اركاديا مول، اما بالنسبة لاحمد عز، فاكيد يعني لانو ابو احتكار الحديد...

بجد بجد انا خرجت مش انا نهائي بعد قضاء مده سنتين في السبتية، اتفرمت حياتي، وحاجات كتير اتغيرت جوايا ومن برة كمان،لا بجد عالم وعالم كبير قوي كمان، ومدرسين المدرسة دي، هما كل اللي بيشتغلو هناك من اول المورد للتجار للعامل، حتي العملاء هناك كمان، بجد عالم تاني خالص...
من اول الموردين التجار..
البرعي استيل، محمد الرضوان، الفهد استيل، محمد مدني ، العشري، محمد عبد الحميد،رجائي رمزي عزيز العزيزة استيل، اليكس فاستنرز..
ومقدرش انسا غول السبتية مهني الاسيوطي، ده بجد محدش يقدر علية واكل السوق في جيبة.

العملاء.
من اول بتوع الخردة، لحد ادارة المشتريات في كل شركات مصر وخارج مصر كمان ، زي لبيا والكويت وكل ادارة المشتريات بمشروعات نجيب سويرس، شركات البترول..
بجد السبتية دي قلب البلد، واكبر مكان بيجمع المليونيرات، والفقير قبل الغني، والبخيل قبل السخي، والشاطر قبل الفاشل،دي بجد فرصة لكل حد في الدنيا..
لو حد كان اتفرج علي عبد الغفور البرعي ، هيقدر يفهم جزء ولو بسيط يعني اية سبتية.

وابتداء المشوار..

المهم يعني دخلت السبتية 18/11/2005
وكان عند م/ أحمد خلف( شركة الفهيد استيل) وده تاجر شاب شاطر طمووووح لابعد حدود، معندوش سقف لطموحة، بيعرف يوصل لتحيقيق طموحاتة بأي طريقة المهم يوصل..
هو ابن التاجر الاكبر الحاج/ خلف( صاحب شركة تيجر استيل) يعني اتعلمها بالوراثة، لكن بالطموح قدر يبقا اكبر من والدة بمراحل..
في الشركة دي بجد دخلت ابيض من الصفحة البيضة في خبرتي في الشغل، اتعلمت كل حاجة من بداية السكرتارية لحد المحاسبة، وبجد كنت مسمتمتعة بالعمل هناك، لان الحمد لله من خلال مقاوماتي الفعالة للتعلم اتبنتي محاسبة في الشركة اسمها( عفاف) هي يعتبر اكبر مني بسنتين، بس مكنتش بحس بده لانها اعتبرتني ايدها اليمين، علمتني كل حاجة في اي حاجة، وحست ان يجي مني زي ما هي قالتلي قبل كده وعندي استعداد للتعلم، كل ما كنت بتعلم اكتر كل ما كنت بحب شغلي اكتر لحد ما فضلت اترقة والحمد لله وصلت لاني بقيت اقعد مكان عفاف وقت غيابة واقوم بشغلها بكفاءة الحمد لله بشهادة الجميع، لدرجة انة مرة قالتلي كفاية عليكي تتعلمي لحد كده حسيت ان الموضوع بقا فية ندية ، برغم ان مكنش في دماغي لان هي مكنتش تعرف اني بخطط لاكبر من كده مش اني اخد مكانها في العمل زي ما هي متخيلة ، بالعكس انا كنت بحاول علي قد ما اقدر استغل وجودي هناك علشان اشتغل في المكان اللي احبو وبمزاجي وخارج السبتية( بس يظهر ان القدر كان مصمم اني اتعلم كل شئ ومخرجش من السبتية غير بعد ما امر بأمتحان يظهر مدي تعلمي ونتيجة الدروس اللي اتعلمتها)..
المهم انا كنت متمردة علي اسلوب المدير في التعامل لاني كنت مش بحب اسلوبة في التعامل وكنت بتلاشه علي قدر استطاعتي واللي ساعدني اكتر ان عفاف كانت زي ما قولت اتبنتني في العمل، فكانت بدافع عني وبتبعد عني اي مشاكل او تصادم بيني وبينة لانها عارفة اني مش هقعد لحظة لو ضايقني لاي سبب تافهة من اسبابة الغريبة، المهم ان فعلا كان لازم اصتدم معاه،
بدون اي تفكير سبت الشغل بعد سنة من محافظتي علي اني اتحاشة التعامل معاه..
بس لما سبت الشغل قال كلمة معجبتنيش فقررت اني اتحداها واعمل عكسها، لان انا قراري كان نهائي مش هرجع لاني عارفة اني لو رجعت هتهان وانا عمري ما اقبل علي نفسي كده علشان اي شغل مهما كان،فلما عملت كده ورفضت هو قال اني مش هلاقي شغل مهما عملت بعد ما اخرج من عندة.

حبيت اثبت ان مش انا اللي اتهزم من اول جولة وخصوص اني خارجة معايا حصيلة كبيرة جدااا من الخبرة في الشغل، واهم حاجة خبرة كمان في الحياة اللي غيرت نظرتي وتقديري للامور...
سبحان الله خرجت من هناك، وقعدت حوالي شهر ونص ومنهم نزل مصيف ومكنتش فاضية وبعد ما رجعت وخلصت امتحاناتي في الجامعة، لاني كنت قبل ما اسيب الشغل دخلت الجامعة المفتوحة كلية تجارة، علشان يبقا بجانب الخبرة اللي اتعلمتها في المحاسبة معايا شهادة ، لاني حبيت المحاسبة واستمتعت بالعمل بيها، وكمان الشهادة دي وقفت ترقيتي مرة ، المحاسب القانوني اتحداني وفض يخليني اترقة وقال اني معايا خبرة كويس جداا، لكن ينقصني شهادة، برغم اني كنت بقرا كتير في المحاسبة، الا اني حسيت بعجز قدام الدراسة دي ، وحسيت اني مهما عملت مش هوصل للمستوي اللي عايزة في المحاسبة، قررت ادخل الجامعة من باب التحدي برضة، المهم قولت ادور بقا علي شغل، سبحان الله دخلت علي مجلة الوسيط في النت، يوم الخميس الصبح ، لاقيت اعلان اغرب من الغريب.
كان مكتوب كلمتين، مطلوب محاسبين وسكرتارية خبرة للعمل في شركة بشارع السبتية.
قولت يا سلام يا سبحان الله حلو قوي المكان ده انسب مكان علشان اثبت كلمة المدير اللي كانت بترن في ودني من يوم ما قال اني مش هلاقي حد يشغلني،المهم اتصلت رد علية المدير
وقولتلة اني لاقيت اعلان في الوسيط وكده ، استغرب قوي وقالي ازاي، قولتلة عادي يعني دخلت النت وشوفت الاعلان، قالي انتي عارفة انا مستغرب لية، قولتلة لية، قالي المفروض االاعلان ده ينزل بكرة، يعين نازل من ساعتين بس، قولتلة مهو في النت الاعلان بينزل بدري من وقت نزولة، قالي برافو عليكي انك شغلتي دماغك وجبتي الاعلان من النت،المهم يعني
لما عرف اني ليا خبرة في العمل في السبتية، بدون تفكير قالي انزلي دلوقتي علشان تعملي الانتر فيو، استغربت بصراحة ، بس مكنش ينفع فنزلت تاني يوم الجمعة ، المهم قابلني وبدون تفكير بعد الانتر فيو قالي خلاص انتي اساسي معانا من بكرة تقدري تنزلي الشغل، بصراحة كانت مفاجاة ليا، والغريب ان محدش كان متخيل اني ارجع السبتية تاني، المهم اني رجعت وبقوة وبقيت اظهر وكل اللي كانو عارفني من الشغل القديم بتاع احمد خلف، كانو مستغربين قوي وبدون تفكير ، قالو ان اختي هي اللي جابتلي وسطة لاني اشتغل تاني في السبتية، لان اختي ماكنتش لسة سابت الشغل عند احمد خلف، والغريب ان فعلا كان مقدر ومكتوب الحمد لله ربنا عوضني في الشغل ده عن كل حاجة، من بداية المرتب للمعاملة المحترمة للمنصب الاداري اللي مكنتش اتخيل اني اتحط فية والظروف اللي ساعدتني علي النجاح اكتر من الاول في المكان ده برغم ان كان في عوامل كتير تخليني افشل، واهمها اني كنت البنت الوحيدة المسلمة في المكان ده، الا اني قدرت الحمد لله اني اثبت نجاحي وكفأتي..
بس لظروف شخصية سبت الشغل ، وكمان كان الغرض الاساسي للشغل ده خلص، اللي هو اني اثبت اني مش هقف عن الشغل، مش علشان سبت شغل يبقا الدنيا وقفت، خرجت من السبتية 1/8/2007....

خرجت وكل الظروف كانت بتقولي انتي خلاص خلصتي الكورس اللي كان مقرر عليكي انتها الدرس لحد كدة ، مترجعيش تاني نهائي...
فعلا ده كان قرار من جوايا ان السبتية كده قامت بدورها وزيادة في حياتي...
كل شخص عرفتة هناك كنت بتعلم منو..
من اول نعمة بتاعت البقالة اللي كنت بشتري منها كل يوم بيبسي، وشيبسي وكل انواع المسليات لان الشغل كان وقتة طويل جدااا..
وحتي العمال من اول محمد علي ، مسعد، سمير ، اكرامي ، بقلظ ، عم محمد، محمد السوري،
وحتي الموظفين، من اول عفاف، عادل عبد الرؤف، فهد خلف، أحمد خلف، يوسف مسعد، ريمون رمزي عزيز، ريمون ده كان راجل لوحدة مدرسة، كان جبار وذكائو خرافي ، هناء، سامية،جانيت، سهام اللي كانت في فرع اسكندرية، لاني اشتغلت مع اسكندرانية حوالي سنة.



بجد كل دي ناس انا اتعلمت منها علي قد ما اقدر ومن كل واحد اتعلمت دروس كتير قوي، منها اللي كان قاسي ، ومنها اللي كان بحنية، ومنها اللي كان ما بين البنين، وبجد الحمد لله علي كل درس خرجت بيه من هناك، والحمد لله اني خرجت بخير، وبدون مشاكل،برغم من اني اتغيرت الا اني مبسوطة قوي بالجزء الاكبر من الخبرة اللي اتعلمتها في الحياة والشغل....

واعتقد خرجت من مدرسة السبتية بدرجة ، جيد مرتفع، برغم اني كنت بحاول اخرج مش اقل من جيد جدااا، بس فعلا المنافسة هناك عالية جدااا، وكوني اخرج بجيد مرتفع، ده يعني اني حاولت محاولات قاتلة ومستميتةعلشان اوصل للدرجة دي، اللعب هناك مش سهل، دي مدرسة قواعدة ودرسها قاسية قوي وجبارة قوي، والشاطر اللي يقدر يخرج منها مش بس يخرج بدرجة اية، الخروج من العالم ده مش سهل...
بس قدر الله وما شاء فعل، مش عارفة لو مكنتش دخلت العالم ده كنت هعمل اية..

الحمد لله...



السبت، 29 نوفمبر، 2008

إعلان حالة..........


لقد أعلنت الاتي...............

أعلنت حالة الفرح على الفرح‮ ..‬وأعلنت حالة الحب على الحب‮ .


ياليالي العمر ما كنتش دارى باللى جرالى ماكنتش دارى باللى جراللى ليالى.

من بين كل الدنيا خدتنى عنيك ودتنى لحلم بعيد بعدما جيت وكتبت لفلبك حبك خدنى فى عمر جديد.

خلتنى احب الدنيا واعيش من تانى حلم جديد .

انا دلوقتى بعيش فى حياتك اجمل قصة حب جديد فرحة قلبى بحبك فرحة طفل بيحلم ليلة العيد.

خلتنى احب الدنيا واعيش من تانى حلم جديد.

ياليالي العمر ما كنتش دارى باللى جرالى ماكنتش دارى باللى جراللى ليالى ليالييييييييييييييييييييييييييييييى...

وسمعوني احلا زغروطة... زغرطي يا منحرفة.

هههههههههههههههههههه

لولولولوللييييييييييييييييييييييي


لا لا لا لا مش معقول....

اية ده ازاي ولية وفين ومين وامتي...؟؟؟

استنو استنو بس علية...

امممممممم

ماتتكلمي بقا الله عليكي انجزي...

حاضر حاضر، انتو متسربعين لية بس كده، واحده واحده...

طب واحده واحده ما بلاش كل ده، يجي مرة واحده لا اتجنن كده..

ههههههههههههههههههههه

انتي بتضحكي اية الروقان ده بس.....!!!!!!!!!!!!

اية كمية علامات التعجب اللي في دماغكم دي..؟؟

طب قولي..

اقول اية بس..

مين وفين ولية وازاي وامتي اصلا..؟؟؟

لا دي اسئلة كتير قوي متهيئلي هتاخد كتير قوي علشان اجاوب عليها، طب خليها وقت تاني بقا لاني جاية تعبانة ومبسوطة وفرحانة ومش حسة بالدنيا حسة اني في دنيا تانية....

اممممممممممممممم

خلاص، طب هقولكم كلمتين تصبيرة كدة...

كل شيء عفوياً‮ ..‬البهجة عفوية

لم‮ ‬يكن هناك شيء سابق الترتيب‮ ..‬

ولم تكن هناك مسافات محسوبة‮ .‬

فالقلوب تخفق دائماً‮ ‬بدون عدادات،ودون قيود، ودون اسباب‮‬...

كفاية عليكم كده بقا...

هااااااااااااااااااااااااااا حد فاهم حاجة...؟؟؟


اعتقد محدش، ولا أنا كمان...

هههههههههههههههههههههههههههههههههههههههههههههههههههههههههههههههههههههههههههههههههه




يبقا فعلا، إعلان حالة مش أكتر......


الأربعاء، 19 نوفمبر، 2008

بتدور علي ايه يا قلبي ؟؟؟

بتدور علي ايه يا قلبي ؟؟؟

دا اللي في بالنا مش موجودين..

ملناش اللي ياخدنا من دنيا انا كرهتها وانت عايشها لمين ؟؟

ياربي ده مش اعتراض دا انا مؤمنة مامنه بيك بس الصبر يئس مني واحنا ليهم محتاجين محتاجه للي يكون فيه مني حجات محتاجه فيه اخلاصي وصدقي وفوق ده كلة القلب الكبير قلب ياخدني من احزاني قلب ياخدني من جروحي...

قلب نسمة علي خدي ياخد بايدي يمسح دمعي..

ممكن الاقي ده حقيقه ولا دي احلام ؟

خايفة الاقيه في يوم قدامي اجي اقربيطلع سراب واكتشف في النهايه ان الاماني دي مجرد اوهامبكره الليالي علينا تعدي ونلاقي اللي بنتمناه بين السنين..

ولا هنفضل انا وقلبي نحلم باللي مش موجودين؟؟

---------

ملحوظة: الكلام ده مش كلام اغاني ولا منقول ولا حتي انا اللي كاتبهده فعلا مكتوب ليا مخصوص من سنتين(حد ترجملي مشاعري بالكمات دي)

أبيض مش أبيض.....

أبيض نص نص...
أحياناً الإنسان بيفهم حاجة غلط، ويبقى فاكر نفسه صح، وماحدش بيقوله إنت غلطان، والمشكلة إنه بيفضل عايش فى الوهم ده كتير ومكمل فى طريقه، والدنيا مابترحمش..


لكن فجأة بيقابل حد يصحيه من الغيبوبة اللى هو فيها، من غير ما يقوله ولا كلمة، كفاية بس إنه يدخل حياته..
بالظبط زى فستان قدامك وإنت فاكر لونه أبيض، لما تحط جنبه الأبيض اللى بجد، بيبان مين أبيض ومين مش أبيض...


ملحوظة: منقولة من مدونتي السابقة

الاثنين، 17 نوفمبر، 2008

فيرس الفرح والسعادة....


إن العواطف فيروس ينتقل بالعدوى فعندما ينقل شخص فيروس الفرح والسعادة والسرور من خلال الانفعالات والكلمات، يأثر بالتالي علي بعض المحطين بهذا الشخص بقصد او بدون قصد منة....!!!!

ايوة فعلا، وتحس كده ان فيرس وانتشر في الجو، بخلاف بقا اذا كان مقصود او غير مقصود..

الطبيعي ان الواحد بيفرح لحد قريب منة او يعرفة كويس وبينهم وده وعشرة عمر....

زي ما حصل معايا وقت جواز صحبتي الانتيم اللي معايا من سنين، كانت فرحة ملهاش حد وكأنة فرحتي انا جوازي انا بالظبط، وزي ما حصل مع محمد زميلي في الجامعة اللي يعتبر برضة زميلي الانتيم ، يوم خطوبتة كانت فرحتي كبيرة قوي برغم من اني مكنتش اعرفة غير فترة مش كبيرة قوي كانت شهور يعني لسة بس مكنتش لحقت اتعرفت علية قوي لكن كنت اتعرفت علي جوانب كتير في شخصيتة احترمتها وقربت تفكيرنا من بعض، كان لية معزة خاصة وقت خطوبتة فرحت جدااا وانتقل الفرح ده من الشخص ده ليا وكاني انا اللي بتخطب او انا اللي بتجوز..جايز ده فعلا مش بيحصل معايا لكل الناس، لكن مش يمنع اني بفرح للناس من كل قلبي، بس منكرش ان فرحتي ليهم مش بتاثر قوي علية يعني مش بتفرق كيتر معايا او اني احسها وكأنة فرحتي انا فعلا ده مش بيحصل طول الوقت ولا مع اي شخص، لكن بتمنا الخير للناس كلها.. بس الاغرب من الغريب انك تفرح لحد كل اللي بينك وبينة مجرد عشرة وقت ونت وحوار ونقاش وتبادل افكار واراء ليس الا، مش غريب قوي، لكن الاغرب هو انك تحس فرحتو هي فرحتك وتحس وكأنك انت اللي حصلك نفس موقف الفرح ده..انا طبعا مش بقول علي انو شئ وحش ولكن غريب، يمكن لاني مكنتش متوقعة او منتظرة ان ده يحصل وافرح لحد عمري ما قابلتة ولا شوفتة لكن كان بينا بس مجرد عشرة ايام وصداقة محترمة..اللي بجد محيرني هو ان فرحة انتقل لينا كلنا كل اللي يعرفة الفرح انتقل لية وحتي مشاء الله يوم خطوبتة دي كانت يوم مبارك علي كل اللي يعرفو( بخلاف ان هو اصلا معروف انو بركة هههههههه) لكن بجد مشاء الله دي حاجة من عند ربنا اكيد.بس بجد حسة بعلامة استفهام كبيرة، ازاي الواحد كده بيتعدي من الفرح لاقرب الناس لية غريبة قوي؟؟من كتر التفكير تخيلت ان ده زي فيرس انقلوانزة، ممكن يجيلك برد لمجرد حاجتينيا اما انت مخدتش احطياتتك الامنية علشان تحافظ علي صحتك من البرد او الفيرس ده، وده عن طريق انك تاخد مثلا دش وتخرج في الجو فتاخد الفيرس او انك بتعمل عادت تجيبلك الفيرس زي انك في عز السقعة ومشغل مروحة او تكيف ( طبعا ده مش منطقي لكن بتحصل)..او انك تتعدي من حد مصاب بنفس الفيرس، ويقال ان لو انتقلت فيرس الانفلوانز من الشخص المصاب يخف وانت اللي تشيل الفيرس لوحدك، وطبعا انتقال العدوي لية اشكال كتير ومتعددة..

وتلاقي طول الوقت الدكاترة والمتخصصين يقولك الوقاية خير من العلاج، وده بينتطبق علي فيرس االانفلوانزا..
لكن بالنسبة لانفلوانزا الفرح دي بقا بيبقا بطريقة عجيبة وبدون اي تحفظات بتلاقي نفسك اتعديت من الشخص المصاب بالحالة دي، والعجيب انك بتصاب باردتك الداخلية وليس مجبرو علي انتقال الفيرس منو ليك.
وكمان الفيرس هنا متجدد بمعني انو ينتقل من عند الشخص المصاب للشخص الغير مصاب وليس السليم( لان الحزن مش هو الصح) ومع ذلك مش بينتهي من عند صاحب الفيرس يعني في انتقالة صحة للجميع وليس مرض،زي فيرس انفلوانزا بالظبط ولكن بعكس بعض الطرق ولكن النتيجة واحده هي العدوي..

طبعا انا مش محتاجة اقول انا بتكلم علي مين للي أكيد اغلب اللي هيدخل المدونة عارفينو..
لكن اللي لسة ميعرفوش ان ابتكلم علي محمد رشدي و أميرة...لانهم اصبحو اسم واحد طبعا وليس منفصلين..والشخص ده اسمو في عالم المدونات الحالم ( او حصان بري، اوالرومانسي الاخير)..
حبيت اول مدونة ليا تكون بجد بحالتي اللي بقالها كام يوم مسيطرة علية، وتخيلت ان مجرد يوم وهيعدي او حالة وهتمر.
لكن بجد اللي لفت انتباهي او خلاني اكتب التدوينة دي ان الحالة الحمد لله مستمرة ومسيطرة علية ومبسوطة بيها بس كنت حبه افكر فيها بشكل منطقي اكتر علشان احاول استدعي الحالة دي تاني وقت ما احتاجة، لكن طبعا مش طول الوقت اقدر اعمل كده، بس ده اللي قدرت اخرجة من جوايا حاليا..
وبجد ربنا يكرم كل الناس بالفرح وينشر فيرس الفرح والسعادة...

ما أجمل لحظات الفرح وما أقصرها، ففيها ينعدم إحساسنا بالوقت لروعتها....

الأحد، 16 نوفمبر، 2008

حــيــاتــي ...


حياتي أجمل مافيها اني بعيش من غير ما افكر في حاجة ماتهمنيش، أهم حاجة بحياتي إني بعشق حياتي ولا يوم بحاول أفكر في اللي فات وفي اللي عدا واللي ممكن يوم يكون مايهمنيش..

احساس جميل إني أكون عايشة الحياة من غير هموم، عايشة كل ثانية فيها أعشق أدوب أحلم أطير فوق السحاب.


حياتي وانا حرة فيها، دايما بحاول أكون إني أكون أنا بتحدى كل الكون واملا الدنيا امـــــــل..